ബിജെപിയുടെ കേരളത്തിൽ എക്കാലത്തേയും പ്രതീക്ഷ നടനും എംപിയുമായ സുരേഷ് ​ഗോപിയിലാണ്. അദ്ദേഹം അത് തന്നാൽ കഴിയും വിധം കാത്തു സൂക്ഷിക്കും എന്നത് തന്നെയാണ് ഇതിന് കാരണം. അതുകൊണ്ട് അദ്ദേഹത്തിനെ തേടി നിരവധി അം​ഗീകാരങ്ങൾ എത്താറുമുണ്ട്.

അത്തരത്തിൽ ഒരു വലിയ സ്ഥാനം അദ്ദേഹത്തെ തേടിയെത്തുന്നു എന്നാണ് ഇപ്പോൾ റിപ്പോർട്ടുകൾ ലഭിച്ചിരിക്കുന്നത്. സുരേഷ് ഗോപി വൈകാതെ പാർട്ടിയെ നയിക്കാൻ തലപ്പത്തെത്തുമെന്നാണ് സൂചന ലഭിക്കുന്നത്. കേന്ദ്ര നേതൃത്വം ഇടപെട്ട് കേരളത്തിൽ നടപ്പിലാക്കേണ്ട ചുമതലകൾ സുരേഷ് ഗോപിയെ നേരിട്ട് ഏൽപ്പിക്കുകയാണ് ചെയ്യുന്നത്.

എംപിയുടെ പകിട്ട് മറ്റ് പരിപാടികളിൽ പ്രതിഫലിക്കുകയും ചെയ്യുന്നുണ്ട്. തിരഞ്ഞെടുപ്പിലേറ്റ കനത്ത തോൽവിയുടെ പശ്ചാത്തലത്തിൽ പാർട്ടിയിൽ അടിമുടി അഴിച്ചു പണി ഉടൻ ഉണ്ടാവുമെന്ന സൂചനയും കേന്ദ്ര നേതൃത്വത്തിനോട് അടുപ്പമുള്ളവരിൽ നിന്നും ലഭിക്കുന്നുണ്ട്.

ബൂത്ത് തലം മുതൽ അഴിച്ചു പണി വേണമെന്നാണ് പാർട്ടി കേന്ദ്ര നേതൃത്വം സ്വീകരിക്കുന്ന നിലപാട്. മറ്റ് സംസ്ഥാനങ്ങളിൽ അഴിച്ചു പണി നടത്തിക്കോണ്ടിരിക്കുന്ന സാഹചര്യത്തിലാണ് ഇപ്പോൾ കേരളത്തിലും സമാനമായ നിലപാട് സ്വീകരിക്കുന്നത്.

നിയമസഭ തിരഞ്ഞെടുപ്പിൽ സംസ്ഥാനത്ത് കനത്ത തോൽവിയാണ് ബിജെപിക്കുണ്ടായത്. സീറ്റുകളുടെ എണ്ണം വർദ്ധിപ്പിക്കുവാൻ കഴിയാത്തതിന് പുറമേ, കൈയിലുണ്ടായിരുന്ന നേമം നഷ്ടമായതും സംസ്ഥാന നേതൃത്വത്തിന്റെ പിടിപ്പ്‌ കേടായി വിലയിരുത്തിയിരുന്നു.

നിയമസഭാ തിരഞ്ഞെടുപ്പിലെ പരാജയത്തിന്റെ കാരണങ്ങളെ കുറിച്ചുള്ള റിപ്പോർട്ട് കഴിഞ്ഞ ദിവസം സംസ്ഥാനാദ്ധ്യക്ഷൻ കെ. സുരേന്ദ്രൻ ദേശീയ ജനറൽ സെക്രട്ടറിക്ക് കൈമാറിയിരുന്നു.

ഇത് കൂടി പരിശോധിച്ച ശേഷമാവും അടുത്ത നടപടിയിലേക്ക് പാർട്ടി കടക്കുക. സംസ്ഥാന നേതൃത്വത്തിനെതിരെ പരാതിയുമായി അടുത്തിടെ പാർട്ടിയിലെത്തിയ നേതാക്കളും കേന്ദ്ര നേതൃത്വത്തെ സമീപിച്ചതായി റിപ്പോർട്ടുകളുണ്ടായിരുന്നു.

അതേസമയം ബി.ജെ.പി സംസ്ഥാന ഘടകത്തിൽ നേതൃമാറ്റം ഉണ്ടാകുമെന്ന വാർത്തകൾ സംസ്ഥാന അദ്ധ്യക്ഷൻ കെ. സുരേന്ദ്രൻ തള്ളിയിട്ടുണ്ട് എന്നും അറിയാൻ കഴിയുന്നുണ്ട്. അദ്ധ്യക്ഷനെ മാറ്റാൻ നീക്കം നടക്കുന്നതായുള്ള വാർത്തകൾ അഭ്യൂഹം മാത്രമാണ് എന്നാണ് അദ്ദേഹം പ്രതികരിച്ചത്. അതു സംബന്ധിച്ച് തനിക്ക് വിവരമൊന്നുമില്ലെന്നും സുരേന്ദ്രൻ വ്യക്തമാക്കി.

സംഘടനാ സംവിധാനം ശക്തിപ്പെടുത്താനുള്ള നടപടികൾ തുടരുകയാണെന്നും അദ്ദേഹം പറഞ്ഞു. പാർട്ടി പരിപാടികളിൽ സജീവമാകുമ്പോഴും അദ്ധ്യക്ഷ സ്ഥാനം തന്റെ മനസിലില്ലെന്ന് ആവർത്തിക്കുകയാണ് സുരേഷ് ഗോപി. സിനിമാക്കാരനല്ല രാഷ്ട്രീയക്കാരനാണ് ആ പദവിയിൽ ഇരിക്കേണ്ടതെന്നാണ് താരം അഭിപ്രായപ്പെടുന്നത്.

ബിജെപി സംസ്ഥാന അധ്യക്ഷനാകാൻ ഇല്ലെന്ന് ആവർത്തിച്ച് പറയുകയാണ് സുരേഷ് ഗോപി. വി. മുരളീധരനോ കെ. സുരേന്ദ്രനോ പറഞ്ഞാലും താൻ ആ സ്ഥാനത്തേക്ക് ഇല്ല. മോദിയും അമിത് ഷായും അതു പറയില്ല. അധ്യക്ഷൻ ആകേണ്ടത് സിനിമാക്കാരല്ല രാഷ്ട്രീയക്കാരാണെന്നും സുരേഷ് ​ഗോപി പറഞ്ഞു.