പാകിസ്ഥാന്റെ മുൻ പ്രധാനമന്ത്രി ഇമ്രാൻ ഖാന്റെ ഇൻസ്റ്റാഗ്രാം അക്കൗണ്ട് ഹാക്ക് ചെയ്യപ്പെട്ടതായി റിപ്പോർട്ട്. പിന്നാലെ അക്കൗണ്ട് ഹാക്ക് ചെയ്തവർ ഇമ്രാം ഖാന്റെ ഫോട്ടോയ്ക്ക് പകരം ടെസ്ല മോട്ടോഴ്സ് സ്ഥാപകൻ എലോൺ മസ്‌കിന്റെ ഫോട്ടോ അഭിനന്ദന കുറിപ്പോടെ ചേർക്കുകയും ചെയ്തു. മസ്‌കിന്റെ ഫോട്ടോ കണ്ടതോടെയാണ് ഇമ്രാൻ ഖാന്റെ ഇൻസ്റ്റാഗ്രാം ഹാക്ക് ചെയ്യപ്പെട്ടതായി പാർട്ടി അനുയായികൾക്ക് മനസിലാക്കാൻ കഴിഞ്ഞത്.

അതേസമയം ഇൻസ്റ്റാഗ്രാമിന്റെ മാതൃ കമ്പനിയായ മെറ്റാ പ്ലാറ്റ്‌ഫോമിന്റെ സഹായത്തോടെ ഹാക്ക് ചെയ്യപ്പെട്ട അക്കൗണ്ട് വീണ്ടെടുത്തതായി ഇമ്രാൻ ഖാന്റെ പാർട്ടിയുടെ സോഷ്യൽ മീഡിയ ഹെഡ് അർസ്ലാൻ ഖാലിദ് മാദ്ധ്യമങ്ങളോട് വെളിപ്പെടുത്തുകയുണ്ടായി. ഇമ്രാൻ ഖാന് പുറമേ മുൻ ഫെഡറൽ പ്ലാനിംഗ് മന്ത്രി അസദ് ഉമറിന്റെ അക്കൗണ്ടും പിടിഐ സെക്രട്ടറി ജനറലിന്റെ ട്വിറ്റർ അക്കൗണ്ടും കഴിഞ്ഞയാഴ്ച ഹാക്ക് ചെയ്യപ്പെട്ടിരുന്നു.

കൂടാതെ രാഷ്ട്രീയ നാടകങ്ങളിലൂടെ പാക് പ്രധാനമന്ത്രി കസേര നഷ്ടമായെങ്കിലും വീണ്ടും അധികാരത്തിൽ തിരിച്ചെത്താൽ കിണഞ്ഞു പരിശ്രമിക്കുകയാണ് ഇമ്രാൻ ഖാൻ. രാജ്യത്തെ പൊതു തിരഞ്ഞെടുപ്പ് നേരത്തേയാക്കാനുള്ള സമരപരിപാടികളിലാണ് ഇമ്രാൻ നിലവിൽ ശ്രദ്ധ ഊന്നുന്നത്. അടുത്തിടെ പാക് പഞ്ചാബിൽ നടന്ന തിരിഞ്ഞെടുപ്പിൽ പാർട്ടി നേടിയ വിജയം ഇമ്രാന് ആത്മവിശ്വാസം പകരുന്നതാണ് എന്നാണ് ചൂണ്ടിക്കാണിക്കുന്നത്.