ആരാധകരുടെ കാത്തിരിപ്പിന് വിരാമം കുറിച്ച് കൊറിയൻ ബോയ് ബാൻഡ് ബിടിഎസ് വീണ്ടും ഒന്നിക്കുന്നുവെന്നു റിപ്പോർട്ടുകൾ പുറത്ത്. ഫിഫ ലോകകപ്പിന്റെ പ്രമോഷൻ ഗാനത്തിനായാണ് സംഘം വീണ്ടും ഒന്നിക്കുന്നത് എന്നാണ് അറിയാൻ കഴിയുന്നത്. ലോകകപ്പിന്റെ ഗോൾ ഓഫ് ദ് സെഞ്ചുറി എന്ന് പേരിട്ട ക്യാംപെയ്നിന്റെ ഭാഗമായാണ് ബിടിഎസ് താരങ്ങൾ പാടുന്നത്. ഫുട്ബോൾ ഐക്കണ്‍ സ്റ്റീവ് ജെറാര്‍ഡ്, കൊറിയന്‍ ദേശീയ ഫുട്‌ബോള്‍ ടീം ക്യാപ്റ്റന്‍ പാര്‍ക്ക് ജിസുങ്, യുനെസ്‌കോ അംബാസഡര്‍ നാദിയ നാഡിം, ഫാഷന്‍ ഡിസൈനര്‍ ജെറമി സ്‌കോട്ട്, പ്രശസ്ത ശില്‍പി ലോറെന്‍സോ ക്വിന്‍ എന്നിവരുമായി സഹകരിച്ചാണ് ബിടിഎസ് ആല്‍ബവുമായി എത്തുന്നത് എന്നാണ് റിപ്പോർട്ട്.

അങ്ങനെ ബിടിഎസിന്റെ പാട്ട് വീണ്ടും കേൾക്കാനായി ആകാംക്ഷയോടെ കാത്തിരിക്കുകയാണ് ലോകമെമ്പാടുമുള്ള ആരാധകർ. ആൽബം എപ്പോൾ പുറത്തിറങ്ങുമെന്ന കാര്യത്തിൽ ഔദ്യോഗിക സ്ഥിരീകരണം ഇതുവരെ വന്നിട്ടില്ല. കൂടാതെ ലോകകപ്പ് ഉദ്ഘാടന വേദിയിൽ ബിടിഎസ് താരങ്ങൾ അതിഥികൾ ആയി എത്തുമെന്ന പ്രതീക്ഷയിലാണ് ആരാധകവൃന്ദം.

അതോടൊപ്പം തന്നെ അടുത്തിടെ, വേള്‍ഡ് എക്സ്പോയുടെ അംബാസഡര്‍മാര്‍മാരായി ബിടിഎസിനെ ഔദ്യോഗികമായി പ്രഖ്യപിച്ചത് ആര്‍മി ഒന്നടങ്കം ഏറ്റെടുത്തിരുന്നു. നിലവില്‍ സോളോ ആല്‍ബങ്ങളില്‍ താരങ്ങള്‍ ശ്രദ്ധ കേന്ദ്രീകരിക്കുമെന്ന് പ്രഖ്യാപിച്ചിരിക്കുകയാണ്. ഇതിന്റെ ഭാഗമായി ജെഹോപ്പിന്റെ ‘ജാക്ക് ഇന്‍ ദ് ബോക്‌സ്’ എന്ന സ്വതന്ത്ര ആല്‍ബം പുറത്തിറക്കുന്നതുമായി ബന്ധപ്പെട്ട വാര്‍ത്തകളും എത്തിയിരുന്നു.

സംഗീതലോകത്തു നിന്നു തങ്ങൾ അനിശ്ചിതകാല ഇടവേള എടുക്കുകയാണെന്നും വൈകാതെ തിരികെ വരുമെന്നും അറിയിച്ചുകൊണ്ട് ജൂൺ 15നാണ് സംഘം ഒരിടവേള എടുക്കുന്നതായി പ്രഖ്യാപനം നടത്തിയത്. ബാൻഡ് രൂപീകരിച്ച് 9 വർഷം പൂർത്തിയാക്കിയ വേളയിൽ തന്നെ നടത്തിയ പ്രത്യേക അത്താഴ വിരുന്നിനു ശേഷമായിരുന്നു ബിടിഎസിന്റെ ഔദ്യോഗിക പ്രഖ്യാപനം വന്നത്.

അങ്ങനെ ഓരോരുത്തരുടേയും കഴിവിനെ കൂടുതൽ വളർത്തിയെടുക്കാനും ജീവിതത്തിലെ പുതിയ ദിശ കണ്ടെത്താനുമായി തങ്ങൾ താൽക്കാലികമായി ഒരു ഇടവേളയെടുക്കുന്നുവെന്നാണ് ബിടിഎസ് അറിയിച്ചിരിക്കുന്നത്.