കടല്‍തീരത്തടിഞ്ഞ അഞ്ജാത വസ്തുവിനെ പങ്കുവച്ച യുവതി പെട്ടുപോയി. ഏറെ വിചിത്രമായ പല ജീവികളും ലോകമെമ്ബാടുമുള്ള കടല്‍തീരങ്ങളില്‍ അടിഞ്ഞതിന്റെ വാര്‍ത്തകള്‍ സോഷ്യല്‍ മീ‌ഡിയ വഴി ലഭ്യമാണ്. അത്തരത്തില്‍ കടല്‍ തീരത്തടിഞ്ഞ എന്താണെന്ന് യാതൊരു ഉറപ്പുമില്ലാത്ത വിചിത്രമായ ഒരു വസ്തുവാണ് ഇപ്പോള്‍ സോഷ്യല്‍ മീഡിയയില്‍ സംശയവും അതോടൊപ്പം കൗതുകവും നിറയ്ക്കുന്നത്.

ഓസ്ട്രേലിയയിലെ വടക്കന്‍ ക്വീന്‍സ് ലാന്റിലെ ഒരു ബീച്ചാണ് നിഗൂഢ വസ്തുവിനെക്കുറിച്ചുള്ള വാര്‍ത്തകളുടെ ഉത്ഭവ സ്ഥാനം. ബീച്ച്‌ വഴി സവാരി നടത്തുകയായിരുന്ന യുവതിയാണ് കടല്‍ തീരത്ത് എന്തോ അടിഞ്ഞ് കിടക്കുന്നതായി ആദ്യം കണ്ടത്. ഏതോ കടല്‍ജീവിയില്‍ നിന്നും അറ്റ് പോയ ഭാഗമാണെന്ന് കരുതി യുവതി അതിന്റെ ദൃശ്യങ്ങള്‍ ടിക് ടോക് വഴി പങ്കുവെച്ചു. ആര്‍ക്കെങ്കിലും നിഗൂഢ വസ്തുവിനെ തിരച്ചറിയാന്‍ കഴിയുമെന്ന പ്രതീക്ഷയിലായിരുന്നു യുവതി ദൃശ്യങ്ങള്‍ സോഷ്യല്‍ മീഡിയ പങ്കു വെച്ചത്.

കടല്‍ തീരത്തടിഞ്ഞ വസ്തുവിന്റെ വലിപ്പം കാണിക്കാനായി അതിനോടായി യുവതി തന്റെ കാല് ചേര്‍ത്തു വയ്ക്കുന്നത് വീഡിയോയില്‍ കാണാം. അപ്പോഴേയ്ക്കും ചിലര്‍ അത് തിമിംഗലത്തിന്റെ ജനനേന്ദ്രിയമാണെന്ന സംശയവുമായി രംഗത്തെത്തി. പ്രദേശത്തെ കടലില്‍ ഇപ്പോള്‍ കൂനന്‍ തിമിംഗലങ്ങള്‍ പ്രജനനം നടത്തുന്ന സമയമാണെന്നായിരുന്നു ഈ ആരോപണവുമായി എത്തിയവരുടെ വിശദീകരണം.

വീഡിയോ കണ്ട വന്യ ജീവി ഗവേഷകയായ ഡോ. വനേസ പിറോട്ട ശാസ്ത്രജ്ഞര്‍ ആ വസ്തു നേരില്‍ കാണാതെ എന്താണെന്ന് സ്ഥിരീക്കാന്‍ പ്രയാസമാണെന്നാണ് പ്രതികരിച്ചത്. അവിടെ ധാരാളം കൂനന്‍ തിമിംഗലങ്ങള്‍ ഉണ്ടെങ്കിലും അവയ്ക്ക് പല്ലുകള്‍ക്ക് പകരം ബലീന്‍ എന്ന നീണ്ട ഇഴകളാണ് ഉള്ളതെന്നും അതായിരിക്കാം ചിലപ്പോള്‍ കടല്‍ തീരത്തടിഞ്ഞതെന്നുമുള്ല സംശയവും വനേസ പങ്കുവെച്ചു. എന്തായാലും യുവതി പങ്കു വെച്ച വീഡിയോയിലെ വസ്തു ഇപ്പോഴും ചുരുളഴിയാത്ത രഹസ്യമായി തന്നെ തുടരുകയാണ് .