യാത്രക്കാർ ഒപ്പിച്ച് വയ്ക്കുന്ന ഒരൊ പൊല്ലാപ്പുകൾ കാരണം വിമാന സർവീസ് തന്നെ റദ്ദാക്കിവയ്ക്കേണ്ട അവസ്ഥവരെ ഉണ്ടായിട്ടുണ്ട്. ഇപ്പോൾ വിമാനത്താവളത്തിലെത്താൻ വൈകിയ യാത്രക്കാരി കാണിച്ചുകൂട്ടിയ പൊല്ലാപ്പ് ചില്ലറയൊന്നുമല്ല. സുരക്ഷ ജീവനക്കാരെ വെട്ടിച്ച് ഒരു യുവതി റൺവേയിലേക്ക് ചീറിപ്പാഞ്ഞ് പൈലറ്റിനെ കൈ കാണിച്ച് പറന്നുയരാൻ തുടങ്ങിയ വിമാനം താഴെയിറക്കാനുള്ള ശ്രമമാണ് നടത്തിയത്. ഇവരെ സുരക്ഷ ഉദ്യേഗസ്ഥർ പിടികൂടുകയും ചെയ്തു.

ഓസ്ട്രേലിയയിലെ കാന്‍ബെറ വിമാനത്താവളത്തിലാണ് ഈ സംഭവം. ക്വാണ്ടസ് ലിങ്കിന്‍റെ ഇ190എആര്‍ വിമാനത്തിലായിരുന്നു യുവതിക്ക് പോകേണ്ടിയിരുന്നത്. വിമാനത്താവളത്തിൽ എത്തിയപ്പോള്‍ വൈകിയതിന് പിന്നാലെ ബോർഡ് ചെയ്യാന്‍ പറ്റാതായി. തുടർന്നാണ് യുവതി അറ്റകൈ പ്രയോഗത്തിന് ശ്രമിച്ചത്. ബോർഡ് ചെയ്ത് യാത്രക്കാരുമായി ടേക്ക് ഓഫ് ചെയ്യാന്‍ വിമാനം ഒരുങ്ങുന്നതിനിടെയാണ് അതീവ സുരക്ഷ മേഖലയിലെ ജീവനക്കാരെ വെട്ടിച്ച് യുവതി റണ്‍വേയിലേക്ക് ഓടിയത്ത്.

വിമാനത്തിലെ പൈലറ്റിനോട് യുവതി സംസാരിക്കുന്നതും മുന്‍ ടയറുകള്‍ക്ക് അരികിലൂടെ നടക്കുന്നതുമായ ദൃശ്യങ്ങള്‍ ഇതിനോടകം പുറത്ത് വന്നു. എന്നാല്‍ വിമാനത്തില്‍ കയറ്റാന്‍ പൈലറ്റ് വിസമ്മതിച്ച പിന്നാലെ വിമാനത്താവളത്തിലേക്ക് തിരിച്ച് നടന്ന് വരുന്നതിനിടെയാണ് യുവതി അറസ്റ്റിലായത്.

ഉച്ചത്തില്‍ അപായ സൈറനുകള്‍ മുഴങ്ങുന്നതിനിടെ യുവതി റണ്‍വേയ്ക്ക് സമീപത്ത് നിന്ന് മടങ്ങുന്നതടക്കമുള്ള ദൃശ്യങ്ങളാണ് പുറത്ത് വന്നത്. അതീവ സുരക്ഷാ മേഖലയില്‍ അനുമതി കൂടാതെ അതിക്രമിച്ച് കയറിയതിനും വസ്തുവകകള്‍ക്ക് നാശം വരുത്തിയതിനും കഞ്ചാവ് കൈവശം വച്ചതിനുമാണ് യുവതിക്കെതിരെ കേസ് എടുക്കുകയും ജാമ്യം നിഷേധിച്ച യുവതിയെ കോടതിയില്‍ ഹാജരാക്കുകയും ചെയ്തു.