വെസ്റ്റ് ബാങ്കില് കടുത്ത യുദ്ധം തുടങ്ങി ഇസ്രായേല്... പതിനഞ്ച് യുവാക്കള് കൊല്ലപ്പെട്ടു...
വെടിനിര്ത്തലിന്റെ ഭാഗമായുള്ള മൂന്നാം ഘട്ടം ബന്ദികൈമാറ്റവും തടവുകാരെ വിട്ടയക്കലും ഇന്നു നടക്കാനിരിക്കെ ഇസ്രായേല് വെസ്റ്റ് ബാങ്കില് കടുത്ത യുദ്ധം തുടങ്ങി. മടങ്ങിയെത്തിയ പലസ്തീനികള് ഹമാസിന് അനുകൂലമായി പരസ്യ പ്രകടനം നടത്തുന്നതില് പ്രകോപനംകൊണ്ടാണ് ഇസ്രായേല് കനത്ത ബോംബിംഗ് നടത്തുന്നത്. പതിനഞ്ച് യുവാക്കള് വെസ്റ്റ് ബാങ്കില് ഇസ്രായേലിന്റെ ആക്രമണത്തില് കൊല്ലപ്പെട്ടു. ഇസ്രായേല് വിരുദ്ധ മുദ്രാവാക്യങ്ങളും പ്ലക്കാര്ഡുകളുമായി ഇനി പ്രകടനം നടത്തിയാല് വെടിനിറുത്തല് കരാര് റദ്ദാക്കി ശക്തമായ തിരിച്ചടി നല്കുമെന്നാണ് ഇസ്രായേലിന്റെ മുന്നറിയിപ്പ്.
ഹമാസിനോട് അനുഭാവം പ്രകടിപ്പിച്ച് ആഹ്ലാദ പ്രകടനം നടത്തിയ 12 പേരെ കിഴക്കന് ജറുസലമില് ഇസ്രയേല് സൈന്യം അറസ്റ്റ് ചെയ്യുകയും ചെയ്തു. വെടിനിര്ത്തലിനോടനുബന്ധിച്ച് നടപ്പിലാക്കിയ നിയന്ത്രണങ്ങളുടെ ലംഘനമാണ് പലസ്തീനും ഹമാസും ചെയ്യുന്നതെന്ന് ഇസ്രായേല് സൈന്യം ആരോപിച്ചു. തെക്കന് ലബനോനില് ഇസ്രയേല് നടത്തിയ ഡ്രോണ് ആക്രമണത്തില് അന്പതു പേര്ക്ക് ഗുരുതരമായി പരുക്കേറ്റു. ആയുധങ്ങളുമായി പോയ ഹിസ്ബുല്ല വാഹനങ്ങളെയാണ് ഇസ്രായേല് സൈന്യം ആക്രമിച്ചത്.
വിഡിയോയില്നിന്നാണ് ഇസ്രായേലി യുവാക്കള് ഹമാസിന്റെ പതാക വീശിയും ആകാശത്തേക്ക് വെടിയുതിര്ത്തും ആഘോഷം നടത്തിയ കാര്യം വ്യക്തമായതെന്ന് ഇസ്രായേല് പറയുന്നു. തടവുകാരുടെ മോചനത്തില് ഹമാസ് അനുഭാവം പ്രകടിപ്പിക്കലും ആഹ്ലാദ പ്രകടനവും വെടിനിര്ത്തല് വേളയില് നിരോധിച്ചതാണെന്നാണ് ഇസ്രായേല് വാദം. ഇതിനു ലംഘനം വരു്തതിയാല് തിരിച്ചടി നല്കുമെന്ന് നെതന്യാഹു ആവര്ത്തിച്ചു.
ഇസ്രായേല് തടവറയില് നിന്ന് മോചിതരായി വരുന്നവര്ക്ക് ഫലസ്തീനില് വീരപരിവേഷത്തോടെയുള്ള സ്വീകരണമാണ് നല്കിക്കൊണ്ടിരിക്കുന്നത്. ഇതേ സമയം സിറിയയില് തുര്ക്കി പിന്തുണയുള്ള വിമതര് നടത്തിയ ആക്രമണത്തില് 14 പേര് കൊല്ലപ്പെട്ടു. നിലവിലെ സാഹചര്യത്തില് സിറിയ്ക്കുനേരേ ഏതു നിമിഷവും ഇസ്രായേല് സൈന്യം യുദ്ധം ആരംഭിക്കാനുള്ള സാധ്യതയാണ് മുന്നിലുള്ളത്.അധിനിവേശ വെസ്റ്റ് ബാങ്കിലും ഇസ്രായേല് ശക്തമായ ആക്രമണമാണ് നടത്തിവരുന്നത്.
വെസ്റ്റ് ബാങ്കിലെ ജെനിന് മേഖലയിലാണ് ഇസ്രായേല് മൂന്നാം ദിവസവും ആക്രമണം കനപ്പിക്കുന്നത്. കഴിഞ്ഞ രണ്ട് ദിവസങ്ങളില് പ്രദേശത്ത് പത്ത് പേര് കൊല്ലപ്പെടുകയും നാല്പതു പേര്ക്ക് പരിക്കേല്ക്കുകയും ചെയ്തിരുന്നു. ജെനിന് അഭയാര്ത്ഥി ക്യാമ്പിനെ വാസയോഗ്യമല്ലാതാക്കുന്ന തരത്തിലുള്ള ആക്രമണങ്ങളാണ് പ്രദേശത്ത് ഇസ്രായേല് നടത്തിവരുന്നത്.
ഹമാസ് ഒന്നര വര്ഷം മുന്പ് കൈവശപ്പെടുത്തി ബന്ദികളില് മൂന്ന് വനിതാ ബന്ദികളെയും അഞ്ച് തായ്ലാന്ഡ് തൊഴിലാളികളെയുമാണ് ഇന്ന് മോചിപ്പിക്കുന്നത്. ഇരുപത്തിയൊന്പതുകാരി അര്ബല് യെഹോദി, എണ്പതു വയസുള്ള ഗാദി മോസസ്, ഇസ്രായേല് വനിതാ സൈനിക അഗാം ബെര്ഗര് എന്നിവരെയാണ് ഇന്ന് ഹമാസ് ഇസ്രായേലിനു കൈമാറുക.
കഴിഞ്ഞ ശനിയാഴ്ച നടക്കേണ്ട ബന്ദിമോചനം ഇസ്രായേല് ആവശ്യപ്രകാരം മധ്യസ്ഥ രാജ്യങ്ങളുടെ ഇടപെടലിനെ തുടര്ന്ന് ഇന്നേക്ക് മാറ്റുകയായിരുന്നു. കഴിഞ്ഞയാഴ്ചയാണ് പലസ്തീനികള്ക്ക് വടക്കന് ഗാസയിലേക്ക് മടങ്ങാന് ഇസ്രായേല് അനുമതി നല്കിയത്. ഇതിനകം അഞ്ച് ലക്ഷത്തിലേറെ ഫലസ്തീനികളാണ് വടക്കന് ഗാസയില് തിരിച്ചെത്തിയത്.പതിനഞ്ചു മാസം നീണ്ട യുദ്ധത്തിലൂടെ ഇസ്രായേല് തകര്ത്തെറിഞ്ഞ പ്രദേശത്ത് തിരിച്ചെത്തിയ ഇവരുടെ ജീവിതം കൂടുതല് ദുരിതപൂര്ണമാണ്.
https://www.facebook.com/Malayalivartha
