ഇനി സൈബര്‍ ആക്രമണങ്ങളുടെ കാലം. ഇന്ത്യ അടക്കമുള്ള ലോകത്തെ വന്‍ സൈനിക ശക്തികളുടെ പ്രതിരോധ രഹസ്യങ്ങള്‍ ചോര്‍ത്തി, കംപ്യൂട്ടര്‍ നിയന്ത്രണത്തിലുള്ള അണ്വായുധം വിക്ഷേപിച്ചു ലോകത്തെ തകര്‍ക്കാന്‍ ലക്ഷ്യമിട്ട് ഐഎസ് ഹാക്കര്‍മാര്‍ രംഗത്ത്. ലോകത്തിന്റെ വിവിധ ഭാഗത്തു നിന്നുള്ള അരലക്ഷം സ്ലീപ്പര്‍ സെല്‍ ഹാക്കര്‍മാരുമായാണ് ഐഎസ് പോരാളികള്‍ വന്‍ ലോക രാജ്യങ്ങളെ തകര്‍ക്കാനുള്ള ഫൈനല്‍ ബാറ്റിലിനു തയ്യാറെടുക്കുന്നത്. ഇന്ത്യ അടക്കമുള്ള രാജ്യങ്ങളില്‍ നിന്നുള്ള അരലക്ഷം ഹാക്കര്‍മാരില്‍ മലയാളികളും ഉണ്ടെന്ന സൂചനയാണ് ഐഎസ് വൃത്തങ്ങളില്‍ നിന്നുള്ള റിപ്പോര്‍ട്ടുകളെ ഉദ്ധരിച്ച് ലോക മാധ്യമങ്ങള്‍ റിപ്പോര്‍ട്ട് ചെയ്യുന്നത്.
ഇറാഖിലും സിറിയയിലും വേരുറപ്പിച്ച ഐഎസ് സഖ്യസേനയുടെ ലക്ഷ്യം, ലോകം മുഴുവന്‍ പിടിച്ചടക്കി ഖലീഫയുടെ രാജ്യം സ്ഥാപിക്കലാണ്. ഇതിനായുള്ള തന്ത്രങ്ങള്‍ ഒരുക്കുകയാണ് ഐഎസ് ഇപ്പോള്‍ ചെയ്യുന്നത്. നേരിട്ട് സൈനികമായ ഏറ്റുമുട്ടലിലൂടെ ലോകത്തെ വന്‍ ശക്തികളെ പരാജയപ്പെടുത്താനാവില്ലെന്നു കൃത്യമായി ഐഎസ് തിരിച്ചറിയുന്നുണ്ട്. അതുകൊണ്ടു തന്നെ അമേരിക്കയും, ജപ്പാനും ചൈനയും റഷ്യയും അടക്കമുള്ള രാജ്യങ്ങളുടെ കംപ്യൂട്ടര്‍ ശൃംഖലയില്‍ കടന്നു കയറി ആക്രമണം നടത്തുകയാണ് ഇപ്പോള്‍ ഐഎസ് പദ്ധതി തയ്യാറാക്കിയിരിക്കുന്നത്.
ഓരോ രാജ്യങ്ങളില്‍ നിന്നും കംപ്യൂട്ടര്‍ രംഗത്ത് വിദഗ്ധരായവരെ ലക്ഷങ്ങള്‍ പ്രതിഫലം നല്‍കി സ്വന്തമാക്കിയാണ് ഐഎസ് ഇപ്പോള്‍ അരലക്ഷം വരുന്ന ഹാക്കര്‍ ആര്‍മി തയ്യാറാക്കിയിരിക്കുന്നത്. ഇന്ത്യയില്‍ നിന്നും അഞ്ഞൂറു പേരുടെ പ്രാഥമിക പട്ടിക ഐഎസ് തയ്യാറാക്കിയിട്ടുണ്ടെന്നാണ് സൂചന. ഇതില്‍ മലയാളികളും ഉള്‍പ്പെട്ടിട്ടുണ്ടെന്നും വിദേശ മാധ്യമങ്ങള്‍ ഐഎസ് വ്യക്താക്കളെ ഉദ്ധരിച്ചു റിപ്പോര്‍ട്ട് ചെയ്യുന്നു. ലോകത്തെ വന്‍ശക്തികളുടെ സൈനിക കംപ്യൂട്ടറുകളില്‍ ഹാക്ക് ചെയ്തു കയറുന്നതിനും, ഇവരുടെ അണ്വായുധം വഹിക്കാന്‍ ശേഷിയുള്ള മിസൈലുകള്‍ നിയന്ത്രിക്കുന്ന കംപ്യൂട്ടറുകളുടെ നിയന്ത്രണം തട്ടിയെടുക്കുന്നതിനും അവശ്യഘട്ടത്തില്‍ ഇത് പ്രയോഗിക്കുന്നതിനുമാണ് ഇപ്പോള്‍ ഐഎസ് പദ്ധതിയിടുന്നത്.