അഫ്ഗാനിസ്ഥാന്‍ തലസ്ഥാനമായ കാബൂളിലെ ഇന്ത്യന്‍ എംബസിക്ക് സമീപം വന്‍ സ്‌ഫോടനം. എംബസിയുടെ വാതിലുകളും ജനലുകളും സ്‌ഫോടനത്തില്‍ തകര്‍ന്നു. കാബൂളിലെ നയതന്ത്ര മേഖല ശക്തമായ പുകയില്‍ മുങ്ങി. ആരാണ് അക്രമികളെന്നോ എന്താണ് ലക്ഷ്യമെന്നോ വ്യക്തമല്ല. അമ്പതോളം പേര്‍ മരിച്ചെന്നാണ് ആദ്യ റിപ്പോര്‍ട്ട്. പരിക്കേറ്റവരെ സമീപത്തുള്ള ആശുപത്രിയില്‍ പ്രവേശിപ്പിച്ചു.

കാര്‍ബോംബ് സ്‌ഫോടനമാണെന്നാണ് പ്രാഥമിക റിപ്പോര്‍ട്ട്. സന്‍ബാഖ് സ്‌ക്വയറില്‍ നിര്‍ത്തിയിട്ടിരുന്ന കാറാണ് പൊട്ടിത്തെറിച്ചത്. പ്രദേശം പൊലീസ് വിന്യസിച്ചിട്ടുണ്ട്.

അടുത്തിടെയായി കാബൂളില്‍ അക്രമപരമ്പരയാണ് അരങ്ങേറുന്നത്. ഈ മാസമാദ്യത്തില്‍ ഉണ്ടായ ചാവേര്‍ ആക്രമണത്തില്‍ 8 സാധാരണക്കാര്‍ കൊല്ലപ്പെട്ടിരുന്നു.