മാല ദ്വീപില്‍ നിലനില്‍ക്കുന്ന അടിയന്തരാവസ്ഥ അടുത്ത 30 ദിവസത്തേക്കുകൂടി നീട്ടാന്‍ തീരുമാനിച്ചു. പ്രസിഡന്റ് അബ്ദുള്ള യമീന്‍ ഇത് സംബന്ധിച്ച് മുന്നോട്ട് വച്ച നിര്‍ദ്ദേശം പാര്‍ലമെന്റ് അംഗീകരിച്ചതിനെ തുടര്‍ന്നാണ് പുതിയ തീരുമാനം. ഫെബ്രുവരി അഞ്ചിന് പ്രഖ്യാപിച്ച അടിയന്തരാവസ്ഥ അവസാനിക്കാന്‍ മണിക്കൂറുകള്‍ മാത്രം ബാക്കി നില്‍ക്കെയാണ് 38 എം.പിമാര്‍ ചേര്‍ന്ന് പാര്‍ലമെന്റില്‍ പുതിയ നിര്‍ദ്ദേശം വോട്ട് ചെയ്ത് പാസാക്കിയത്.

മാല ദ്വീപിലെ ഭരണഘടന പ്രകാരം 43 പേരുടെ വോട്ട് ലഭിച്ചാല്‍ മാത്രമേ അടിയന്തരാവസ്ഥ സംബന്ധിച്ച് തീരുമാനം എടുക്കാന്‍ കഴിയുകയുള്ളു. എന്നാല്‍ ഇത് മറികടന്നാണ് യമീന്‍ അടിയന്തരാവസ്ഥ നീട്ടിയത്. അധികാരത്തിലുള്ള പ്രോഗ്രസീവ് പാര്‍ട്ടിയുടെ അംഗങ്ങളാണ് വോട്ട് ചെയ്ത 38 പേരും. ഇത് കണക്കിലെടുത്ത് രാജ്യത്ത് മാര്‍ച്ച് 22 വരെ അടിയന്തരാവസ്ഥ നിലനില്‍ക്കും. മുന്‍ പ്രസിഡന്റ് മുഹമ്മദ് നഷീദടക്കമുള്ള രാഷ്ട്രീയ തടവുകാരെ വിട്ടയയ്ക്കണമെന്ന സുപ്രീംകോടതി ഉത്തരവാണ് മാലദ്വീപിലെ സ്ഥിതി വഷളാക്കിയത്. 
അടിയന്തരാവസ്ഥ പ്രഖ്യാപിച്ചശേഷം സുപ്രീം കോടതി ചീഫ് ജസ്റ്റിസിനെയും മറ്റൊരു ജഡ്ജിയെയും അറസ്റ്റ് ചെയ്ത അബ്ദുള്ള യമീന്‍, പ്രതിപക്ഷ നേതാവും മുന്‍ പ്രസിഡന്റുമായ മൗമൂന്‍ അബ്ദുല്‍ ഗയൂമിനെ വീട്ടുതടങ്കലിലാക്കുകയും ചെയ്തിരുന്നു.