രണ്ടരക്കോടിയിലധികം ആരാധകരുള്ള ലോകത്തിലെ തന്നെ ഏറ്റവും പ്രചാരമുള്ള ലൈഫ് സ്റ്റൈല്‍ മാസികയായ പ്ലേബോയ് തങ്ങളുടെ ഫേസ്ബുക്ക് പേജ് ഡിലീറ്റ് ചെയ്തതായി റിപ്പോർട്ടുകൾ.

വ്യക്തി വിവരങ്ങള്‍ ചോര്‍ന്നതിനെത്തുടര്‍ന്ന് ഫെയ്‌സ്ബുക്കിനെതിരെ വ്യാപക പ്രതിഷേധങ്ങൾ ഉയർന്നതിന്റെ പിന്നാലെയാണ് മാസികയുടെ ഇത്തരത്തിലൊരു തീരുമാനം.

ഇതേകാരണത്താല്‍ മുൻപ് കോര്‍പ്പറേറ്റ് സ്ഥാപനങ്ങളായ ടെസ്ലെയും, സ്‌പേസ് എക്‌സും ഫേസ്ബുക്ക് അക്കൗണ്ട് ഡിലീറ്റ് ചെയ്ത് രംഗത്ത് വന്നിരുന്നു. ബോളിവുഡ് താരം ഫര്‍ഹാന്‍ അക്തറും ഇത്തരത്തില്‍ പ്രതിഷേധിച്ചിരുന്നു.

പ്ലേ ബോയ് ചീഫ് ക്രിയേറ്റീവ് ഓഫീസര്‍ കൂപ്പര്‍ ഹെഫ്‌നറാണ് തങ്ങളുടെ ഫേസ്ബുക്ക് പേജ് ഡിലീറ്റ് ചെയ്‌തെന്ന വാര്‍ത്ത പുറത്തുവിട്ടത്. സ്വകാര്യ വിവരങ്ങള്‍ ചോര്‍ത്തുന്നതുമായി ബന്ധപ്പെട്ട് വിവരങ്ങള്‍ പുറത്തു വന്നതിന്റെ പശ്ചാത്തലത്തില്‍ ലോകത്തിന്റെ വിവിധ കോണുകളില്‍ നിന്നും ഫേസ്ബുക്കിന് നേരെ വ്യാപക പ്രതിഷേധങ്ങളാണ് ഉയരുന്നത്.

ലൈഫ് സ്റ്റൈല്‍ മാസികയായ പ്ലേബോയിക്ക് രണ്ടരക്കോടിയിലധികം ആരാധകരാണ് ഫെയ്‌സ്ബുക്കില്‍ ഉണ്ടായിരുന്നത്. അതുകൊണ്ടു തന്നെ ഉപയോക്താക്കളുടെ വിവരങ്ങള്‍ അവരെങ്ങനെ കൈകാര്യം ചെയ്യുമെന്ന കാര്യത്തില്‍ ആശങ്കയുണ്ടെന്ന് ആരാധകന്റെ ആവശ്യം കണക്കിലെടുത്താണ് ഇത്തരത്തിലൊരു നീക്കമെന്ന് കൂപ്പര്‍ ഹെഫ്‌നര്‍ ട്വിറ്ററില്‍ വ്യക്തമാക്കി.