കെഎസ്ആർടിസി മാനേജിംഗ് ഡയറക്ടർ ടോമിൻ ജെ തച്ചങ്കരിയെ മാറ്റില്ലെന്ന് മുഖ്യമന്ത്രി സി പി എം സംസ്ഥാന സെക്രട്ടറിയെയും ഗതാഗത മന്ത്രിയെയും അറിയിച്ചു. തച്ചങ്കരിയെ മാറ്റണമെന്ന സി പി എം, എ കെ ശശീന്ദ്രൻ എന്നിവരുടെ ആവശ്യം മുഖ്യമന്ത്രി തത്കാലം തള്ളി. അതേ സമയം തൊഴിലാളികളെ പിണക്കാതെ മുന്നോട്ടു കൊണ്ടു പോകണമെന്ന് മുഖ്യമന്ത്രി തച്ചങ്കരിക്ക് നിർദ്ദേശം നൽകും.

കെഎസ്ആർടിസിയെ രക്ഷപ്പെടുത്താനാണ് തച്ചങ്കരിക്ക് ഇത്തരത്തിൽ സ്വാതന്ത്ര്യം നൽകിയതെന്നാണ് മുഖ്യമന്ത്രിയുടെ വാദം. എന്നാൽ തച്ചങ്കരിയെ മാറ്റണമെന്ന ആവശ്യത്തിൽ സി പി എം ഉറച്ചു നിൽക്കുകയാണ്. ആനന്ദത്തലവട്ടം ആനന്ദൻ കോടിയേരി ബാലകൃഷ്ണന്റെ മുന്നിൽ വച്ച നിർദ്ദേശമാണ് കോടിയേരി മുഖ്യമന്ത്രിയെ അറിയിച്ചത്. എന്നാൽ മുഖ്യമന്ത്രിയുടെ നിലപാട് കണക്കിലെടുത്ത് ശശീന്ദ്രൻ കാലുമാറി.

ഉദ്യോഗസ്ഥർക്ക് അവർ അർഹിക്കുന്ന സ്വാതന്ത്ര്യം നൽകാനാണ് മുഖ്യമന്ത്രി ആഗ്രഹിക്കുന്നത്. അങ്ങനെ ചെയ്തില്ലെങ്കിൽ സർക്കാരിന്റെ പ്രവർത്തനങ്ങൾക്ക് വിഘാതം സംഭവിക്കും. കെഎസ്ആർടിസിയിൽ ആദ്യമായാണ് ഉണർവുണ്ടായത്. ഏറെ നാളായി പലരെയും കോർപ്പറേഷൻ മേധാവിയാക്കി. എന്നാൽ ഒരു ഫലവുമുണ്ടായില്ല. പലരും സ്ഥാനത്ത് വന്നിരുന്ന് വെറുതെ തിരിച്ചുപോയി. അപ്പോഴാണ് തച്ചങ്കരിയെ സർക്കാർ കൊണ്ടുവന്നത്. തച്ചങ്കരി സ്ഥാനമേറ്റപ്പോൾ തന്നെ അദ്ദേഹത്തിന് സ്വാതന്ത്ര്യം നൽകാൻ മുഖ്യമന്ത്രി തീരുമാനിച്ചിരുന്നു.

മന്ത്രി എ കെ ശശീന്ദ്രനെതിരാണ് തച്ചങ്കരി.നേരത്തെ തച്ചങ്കരിയെ ഗതാഗത കമീഷണർ സ്ഥാനത്ത് നിന്നും നീക്കിയത് മന്ത്രി ശശീന്ദ്രനാണ്. പിന്നീട് തച്ചങ്കരിയെ അദ്ദേഹത്തിന് കീഴിൽ നിയമിച്ചു. മറ്റൊരാളെ തരണമെന്ന് മന്ത്രി ആവശ്യപ്പെട്ടെങ്കിലും അതിന് മുഖ്യമന്ത്രി തയ്യാറായില്ല. അതിനിടയിൽ യൂണിയനുകൾ തച്ചങ്കരിക്കെതിരെ രംഗത്തെത്തി. തച്ചങ്കരിയാകട്ടെ യൂണിയനോട് അടിയറ പറഞ്ഞില്ല. താൻ മുഖ്യമന്ത്രിയോട് സംസാരിക്കാമെന്നാണ് തച്ചങ്കരി തന്നെ പറയുന്നത്. മുഖ്യമന്ത്രിയുമായി തനിക്കുള്ള അടുപ്പം ഇതിലൂടെ അദ്ദേഹം വ്യക്തമാക്കുന്നു. ഒരു ഉദ്യോഗസ്ഥന്റെ മുന്നിൽ സി പി എം മുട്ടുമടക്കുന്ന കാഴ്ച ആദ്യത്തേതാണ്.

അതേസമയം കെഎസ്ആർടിസിയിലെ സി പി എം യൂണിയൻ തകർച്ചയുടെ വക്കിലാണെന്ന് റിപ്പോർട്ടുണ്ട്. തച്ചങ്കരിയുടെ മുന്നിൽ മുട്ടുമടക്കുന്ന യൂണിയനോടൊപ്പം എന്തിന്നിൽക്കുന്നു എന്നാണ് അവരുടെ ചോദ്യം. സി പി എം യൂണിയൻ വിടുന്നവരെ ലക്ഷ്യമിട്ട് കോൺഗ്രസും രംഗത്തുണ്ട്. അംഗത്വം വർധിപ്പിക്കാൻ മുൻകൈയെടുക്കുന്നത് വി എസ് ശിവകുമാർ തന്നെയാണ്.