അട്ടപ്പാടിയില്‍ വന്‍ കഞ്ചാവ് വേട്ട. വിപണിയില്‍ രണ്ട് കോടിയോളം വിലവരുന്ന 1200 കഞ്ചാവ് ചെടികള്‍ പൊലീസ് പിടിച്ചെടുത്ത് നശിപ്പിച്ചു. മേലെ തുടുക്കി ഊരിന്റെ പഞ്ചക്കാടിനു മുകളിലായി വെട്ടുമലയില്‍ 25 സെന്റ്് സ്ഥലത്തു 50 തടങ്ങളിലായാണ് കഞ്ചാവ് കൃഷി നടത്തിയിരുന്നത്. ഒരു തടത്തില്‍ 25 മുതല്‍ 30 എണ്ണം കഞ്ചാവ് ചെടികള്‍ ഏഴ് അടി മുതല്‍ എട്ട് അടി വരെ ഉയരത്തില്‍ ആറ് മാസത്തോളം പൂര്‍ണ വളര്‍ച്ചയെത്തിയവ ആയിരുന്നു. അഗളി എ.എസ്.പി സുജിത് ദാസും സ്‌ക്വാഡും, തണ്ടര്‍ ബോള്‍ട്ടും ഇന്നലെ പുലര്‍ച്ചെ 3.30 നു ഇടവാണി മലയില്‍ നിന്നും തുടങ്ങി ഓടക്കടവ്, ദുടുമുട്ടി, പട്ടിപന ഷോല, ചിന്നക്കടവ്, എല്ലക്കണ്ടി മല, ഗലസി, മേലെ തുടുക്കി തുടങ്ങിയ വന്യ മൃഗങ്ങള്‍ വസിക്കുന്ന കാട്ടു പാതകളിലൂടെ 12 കിലോമീറ്റര്‍ സഞ്ചരിച്ചാണ് കഞ്ചാവ് തോട്ടത്തില്‍ പൊലീസ് എത്തിയത്. 

അഗളി എ.എസ്.പി സുജിത് ദാസിന്റെ നേതൃത്വത്തില്‍ ഒരു മാസത്തിനുള്ളില്‍ നടത്തുന്ന മൂന്നാമത്തെ കഞ്ചാവ് വേട്ടയാണിത് . സമുദ്ര നിരപ്പില്‍ നിന്നും 1306 അടി ഉയരത്തിലായാണ് കഞ്ചാവ് തോട്ടം സ്ഥിതി ചെയ്തിരുന്നത്. കൃഷി പൂര്‍ണമായും തീയ്യിട്ട് നശിപ്പിച്ച് സംഘം മേലെ തുടുക്കിയില്‍ നിന്ന് താഴെ തുടുക്കി വഴി ഇരുകരയും മുട്ടി ഒഴുകുന്ന ഭവാനി പുഴ അതി സാഹസികമായി കടന്ന് ആനവായി വരെ 10 കിലോമീറ്റര്‍ കാല്‍നടയായാണ് തിരികെയെത്തിയത്. താഴെ തുടുക്കി ഫോറെസ്റ്റ് ക്യാമ്പ് ഷെഡിന്റെ ഏതാനും കിലോമീറ്റര്‍ ചുറ്റളവില്‍ പെടുന്ന സ്ഥലത്താണ് കഞ്ചാവ് തോട്ടം കണ്ടെത്തിയത്. 

എ.എസ്.പിയും സ്‌ക്വാഡും, തണ്ടര്‍ ബോള്‍ട്ടും ചേര്‍ന്ന് കഴിഞ്ഞ മാസം പത്താം തീയ്യതി കുള്ളാട് മലയില്‍ നിന്ന് 5000 ത്തില്‍ അധികം കഞ്ചാവ് ചെടികളും, ഈ മാസം മൂന്നാം തീയ്യതി സത്യക്കല്ല് മലയില്‍ നിന്ന് 1000 ത്തിലധികം കഞ്ചാവ് ചെടികളും കണ്ടെത്തി നശിപ്പിച്ചിരുന്നു. മാവോയിസ്റ്റ് റൈഡിന്റെ ഭാഗമായി അട്ടപ്പാടിയിലെ വനങ്ങളില്‍ നടത്തുന്ന തിരച്ചിലുകള്‍ക്കിടയിലാണ് ഇത്തരം കഞ്ചാവ് തോട്ടങ്ങള്‍ കണ്ടെത്തുന്നതും അവ നശിപ്പിക്കുന്നതും. മേല്‍ പറഞ്ഞ സംഭവങ്ങളില്‍ പൊലീസ് കേസെടുക്കുകയും അന്വേഷണം നടത്തുകയും ചെയ്യുന്നുണ്ട്. വരും ദിവസങ്ങളിലും റൈഡ്കള്‍ക്കിടയില്‍ ഇത്തരം കഞ്ചാവ് കൃഷികള്‍ കണ്ടെത്തുകയാണെങ്കില്‍ അവ നശിപ്പിക്കുകയും, അതിനെതിരെ ശക്തമായ നിയമനടപടികളുമായി മുന്നോട്ടു പോവുകയും ചെയ്യുന്നതായിരിക്കും.