രാജ്യംകണ്ട ഏറ്റവും വലിയ ഫാസിസ്റ്റായ നരേന്ദ്രമോദിയും അദ്ദേഹം നേതൃത്വം നല്‍കുന്ന സര്‍ക്കാരും ഭരണഘടന തകര്‍ക്കാനാണ് ശ്രമിക്കുന്നതെന്ന് മുല്ലപ്പള്ളി രാമചന്ദ്രന്‍. ഫാസിസം ഭീകരമായി ഇന്ത്യന്‍ സമൂഹത്തെ അസ്വസ്ഥമാക്കുകയാണ്. സമസ്തമേഖലയിലും ഇന്ത്യ തകര്‍ന്നെന്നും അദ്ദേഹം ചൂണ്ടിക്കാട്ടി. കെ.പി.സി.സി പ്രസിഡന്റായി സ്ഥാനമേറ്റ ശേഷം ഇന്ദിരാഭവനില്‍ സംസാരിക്കുകയായിരുന്നു അദ്ദേഹം. ജനാധിപത്യ, മതേര ശക്തികളിലുണ്ടായ ഭിന്നിപ്പ് മുതലെടുത്താണ് 2014ല്‍ നരേന്ദ്രമോദി അധികാരത്തിലേറിയത്. രാജ്യം സാമ്പത്തികമായി തകര്‍ന്നു, തൊഴിലില്ലായ്മ രൂക്ഷമായി, കാര്‍ഷികമേഖല തകര്‍ന്നു. ബി.ജെ.പിയെ അധികാരത്തില്‍ നിന്ന് പുറത്താക്കാന്‍ കോണ്‍ഗ്രസിനേ കഴിയൂ. അതിനാല്‍ ഒറ്റക്കെട്ടായി മുന്നോട്ട് പോകണം, മോദിയെ പുറത്താക്കണം. അതിനുള്ള പ്രവര്‍ത്തനം ഇന്ന് മുതല്‍ ആരംഭിച്ചിരിക്കുകയാണ് - മുല്ലപ്പള്ളി വ്യക്തമാക്കി.

മുന്‍ പ്രസിഡന്റ് എം.എം ഹസന്‍ പറഞ്ഞപോലെ സമീപകാലത്ത് കോണ്‍ഗ്രസിന്റെ പ്രവര്‍ത്തനങ്ങളില്‍ പിഴവുണ്ടായിട്ടുണ്ടെന്നും മുല്ലപ്പള്ളി പറഞ്ഞു. അതുകൊണ്ട് നേതാക്കളും പ്രവര്‍ത്തകരും ഒറ്റക്കെട്ടായി പ്രവര്‍ത്തിക്കണം. അതിന് കോണ്‍ഗ്രസിന് കഴിയും. മഹാത്മാ ഗാന്ധിയുടെ 150ാം ജന്‍മവാര്‍ഷികം കൊണ്ടാടുന്ന സമയമാണിത്. അതിനാല്‍ ഫാസിസത്തിനെതിരെ മതനിരപേക്ഷതയും ബഹുസ്വരതയും ഇയര്‍ത്തി യുദ്ധം നടത്താനും അഴിമതിക്കെതിരെ പോരാടാനും കോണ്‍ഗ്രസിനേ കഴിയൂ. കോണ്‍ഗ്രസ് പരാജയപ്പെട്ടപ്പോള്‍ വര്‍ഗീയ ശക്തികള്‍ ഉയര്‍ത്തെഴുന്നേറ്റു. 1976ല്‍ ദേശീയതലത്തിലും കേരളത്തിലും കോണ്‍ഗ്രസ് പരാജയപ്പെട്ടപ്പോള്‍ തിരിച്ചുവരില്ലെന്ന് പലരും പറഞ്ഞു. എന്നാല്‍ നമ്മള്‍ തിരിച്ചുവന്നു. അത് വീണ്ടും ആവര്‍ത്തിക്കും. രാഹുല്‍ഗാന്ധിയുടെ നേതൃത്വത്തില്‍ വലിയൊരു തലമുറമാറ്റമാണ് പാര്‍ട്ടിയില്‍ ഉണ്ടായിരിക്കുന്നതെന്നും മുല്ലപ്പള്ളി ചൂണ്ടിക്കാട്ടി.

വരുന്ന ലോക്‌സഭാ, നിയമസഭാ തെരഞ്ഞെടുപ്പുകളില്‍ കേരളത്തില്‍ സ്ത്രീകള്‍ക്ക് മതിയായ പ്രാധാന്യം നല്‍കുമെന്നും മുല്ലപ്പള്ളി വ്യ്ക്തമാക്കി. ദളിത്, പിന്നാക്ക, ന്യൂനപക്ഷങ്ങളാണ് പരമ്പരാഗതമായി കോണ്‍ഗ്രസിനെ പിന്തുണച്ചിരുന്നത്. അവരുടെ ഉന്നമനത്തിനായും പ്രവര്‍ത്തിക്കണം. കോണ്‍ഗ്രസിനോട് അന്ധമായവിരോധം പുലര്‍ത്തിയിരുന്നത് കമ്മ്യൂണിസ്റ്റ് പാര്‍ട്ടികളാണ്, കേരളത്തിലത് സി.പി.എമ്മാണ്. കോണ്‍ഗ്രസിനെ ആറടി മണ്ണില്‍ കുഴിച്ച് മൂടണമെന്ന് മുദ്രാവാക്യം വിളിച്ചവരാണവര്‍. ബി.ജെ.പി കോണ്‍ഗ്രസ് മുക്തഭാരതം ആവശ്യപ്പെടുമ്പോള്‍ അതേ വഴിയാണ് സി.പി.എമ്മും പിന്തുടരുന്നത്. അതിനാല്‍ ഹിന്ദുത്വ- കമ്മ്യൂണിസ്റ്റ് ശക്തികളുടെ പരാജയം അനിവാര്യമാണ്. അതൊരു രണ്ടാം സ്വാതന്ത്ര്യസമരമായി കണ്ട് പോരാടണമെന്നും കെ.പി.സി.സി പ്രസിഡന്റ് ആഹ്വാനം ചെയ്തു. 

മോദിക്ക് ഫാസിസ്റ്റ് സമീപനമാണെങ്കില്‍ കമ്മ്യൂണിസ്റ്റ് പാര്‍ട്ടിക്ക് സ്വേച്ഛാധിപത്യ ശൈലിയാണ്. റോബര്‍ട്ട് ഫോസ്റ്റര്‍ പറഞ്ഞത് പോലെ ഉറങ്ങുന്നതിന് മുമ്പ് ഒരു പാട് മുന്നോട്ട് പോകണം. കഠിനാധ്വാനം ചെയ്യണം. പ്രവര്‍ത്തിക്കണം വിജയം നമ്മുടേതാവും. അതിനുള്ള ഐക്യവും കൂട്ടായ്മയും വേണം. ലക്ഷ്യം നമ്മുടേതാവും. സ്വാതന്ത്ര്യസമര സേനാനിയായിരുന്നു എന്റെ പിതാവ്. കോണ്‍ഗ്രസ് എനിക്ക് വികാരമാണ്, ആവേശമാണ്, ന്റെ രക്തത്തിലും കോണ്‍ഗ്രസുണ്ട്. ഡി.എന്‍.എ പരിശോധിച്ചാലും കോണ്‍ഗ്രസ് മാത്രമാകും കാണാന്‍ കഴിയുക.

എ.കെ ആന്റണിയെ പോലെ നിരവധി നേതാക്കള്‍ മാര്‍ഗദര്‍ശനവും ഊര്‍ജ്ജവും നല്‍കിയിട്ടുണ്ട്. 1960ല്‍ കണ്ണൂരില്‍ നിന്ന് ആന്റണിക്കൊപ്പം കോഴിക്കോട്ടേക്ക് മടങ്ങവേ അദ്ദേഹം പോക്കറ്റില്‍ 100 രൂപ വച്ചു. അന്ന് അത് വലിയ തുകയായിരുന്നെന്നും മുല്ലപ്പള്ളി സ്മരിച്ചു. തന്റെ കരുത്ത് ഈ പ്രസ്ഥാനമാണ്. അതുകൊണ്ടാണ് മാസങ്ങള്‍ നീണ്ട ചര്‍ച്ചകള്‍ക്കും സമവായങ്ങള്‍ക്കും ശേഷം തന്നെയും വര്‍ക്കിംഗ് പ്രസിഡന്റ്മാരെയും പാര്‍ട്ടി പ്രഖ്യാപിച്ചതെന്നും മുല്ലപ്പള്ളി വ്യക്തമാക്കി.