ഇസ്‌ലാം വിശ്വാസപ്രകാരം മോസ്‌ക് (പള്ളി) അഭിഭാജ്യഘടകമല്ലെന്ന സുപ്രീംകോടതി വിധി പുന:പരിശോധിക്കാന്‍ ഏഴംഗ വിശാല ബെഞ്ചിന് വിടണമെന്ന ആവശ്യം ചീഫ് ജസ്റ്റിസ് അധ്യക്ഷനായ ബെഞ്ച് തള്ളി. 1994ലെ ഇസ്മായില്‍ ഫറൂഖി കേസിലെ സുപ്രീംകോടതി പുനപരിശോധിക്കണമെന്നായിരുന്നു ഹര്‍ജിക്കാരുടെ ആവശ്യം. ഭരണഘടന ഉറപ്പ് നല്‍കുന്ന മതസ്വാതന്ത്ര്യത്തിന് എതിരാണ് കോടതി വിധിയെന്ന് ചൂണ്ടിക്കാട്ടിയാണ് ഇസ്ലാമിക സംഘടനകള്‍ സുപ്രീംകോടതിയില്‍ പുനഃപരിശോധന ഹര്‍ജി നല്‍കിയത്. . ചീഫ് ജസ്റ്റിസ് ജസ്റ്റിസ് ദീപക് മിശ്രയും അശോക് ഭൂഷണും അത് അംഗീകരിച്ചില്ല. എന്നാല്‍ ബെഞ്ചിലെ മൂന്നാമത്തെ അംഗമായ ജസ്റ്റിസ് അബ്ദുള്‍ നസീര്‍ വിയോജിപ്പ് രേഖപ്പെടുത്തി. വിധി ഏഴംഗ ഭരണഘടനാ ബെഞ്ചിന് വിടണമെന്ന് ജസ്റ്റിസ് അബ്ദുള്‍ നസീര്‍ വിധിയില്‍ പറയുന്നു. 

അയോധ്യ ഭൂമിതര്‍ക്ക കേസില്‍ ഫറൂഖികേസിന്റെ വിധി പ്രസക്തമല്ലെന്നാണ് സുപ്രീം കോടതിയുടെ കണ്ടെത്തല്‍. തര്‍ക്കഭൂമി മൂന്നായി വിഭജിക്കണമെന്ന 2010 സെപ്തംബര്‍ 30ലെ അലഹാബാദ് ഹൈക്കോടതി വിധി സുപ്രീം കോടതിയുടെ പരിഗണനയിലാണ്. തര്‍ക്കഭൂമി പ്രത്യേക ഓര്‍ഡിനന്‍സിലൂടെ കേന്ദ്രസര്‍ക്കാര്‍ ഏറ്റെടുത്തതിരെയാണ് 1993ല്‍ ഇസ്മായില്‍ ഫറൂഖി കോടതിയെ സമീപിച്ചത്. ഇസ്ലാം വിശ്വാസപ്രകാരം നമസ്‌കാരം പ്രധാനമാണെങ്കിലും മോസ്‌ക്കിന് വലിയ പ്രാധാന്യമില്ലെന്നായിരുന്നു അന്നത്തെ വിധി. അതിനാല്‍ കേന്ദ്രസര്‍ക്കാര്‍ തീരുമാനം കോടതി അംഗീകരിക്കുകയായിരുന്നു. 

അയോധ്യയിലെ 2.27 ഏക്കര്‍ തര്‍ക്കഭൂമി ഹിന്ദുക്കള്‍ക്കും മുസ്‌ലിംകള്‍ക്കും നിര്‍മോഹി അഖാഡയ്ക്കുമായി മൂന്നായി വിഭജിക്കണമെന്ന് അലഹബാദ് ഹൈക്കോടതിയുടെ ലക്‌നൗ ബെഞ്ച് വിധിച്ചിരുന്നു. അതിനെതിരെ നിര്‍മോഹി അഖാഡ, ഹിന്ദു മഹാസഭ, ജംയത്തുല്‍ ഉലമ ഹിന്ദ്, സുന്നി സെന്‍ട്രല്‍ വഖഫ് ബോര്‍ഡ് തുടങ്ങിവരും ചില വ്യക്തികളും നല്‍കിയ ഹര്‍ജികള്‍ സുപ്രീം കോടതിയുടെ പരിഗണനയിലാണ്. അയോധ്യഭൂമി കേസ് ഇതേ ബെഞ്ച് പരിഗണിക്കും. ഏതൊരു ഭൂമി തര്‍ക്കത്തെയും പോലെ കേസ് പരിഗണിക്കുമെന്നാണ് കോടതി വ്യക്തമാക്കിയിരിക്കുന്നത്.