മൂന്നു ബ്രൂവറികൾ, ഒരു ഡിസ്റ്റിലറി എന്നിവയ്ക്ക് ഭരണാനുമതി നൽകിയ സർക്കാർ നടപടിയെ പരിഹസിച്ച് അഡ്വക്കേറ്റ് എ ജയശങ്കർ .ഫേസ്ബുക്കിലൂടെയാണ് ജയശങ്കർ തന്റെ നിലപാട് വ്യക്തമാക്കിയത് .

പ്രളയക്കെടുതിയിൽ നിന്നും കരകയറാൻ എക്‌സൈസ് വകുപ്പിന്റെ എളിയ കാണിക്ക എന്ന വിമർശനത്തോടെയാണ് ഫേസ്ബുക്ക് പോസ്റ്റ് ആരഭിക്കുന്നത് .യു .ഡി.ഫ്.ഭരണകാലത്തു പൂട്ടിയ ബാറുകൾ തുറന്നുനല്കി ഇടതുസർക്കാർ അബ്കാരി സഖാക്കളുടെ കണ്ണീരൊപ്പുകയാണെന്നും ജയശങ്കർ വിമർശിക്കുന്നു .

ബ്രൂവറികളും ഒരു ഡിസ്റ്റിലറിയും അനുവദിച്ച സർക്കാർ നടപടി നിയമവിരുദ്ധമാണെന്നും ഇതിന് പിന്നിൽ അഴിമതിയുണ്ടെന്നും ആരോപിച്ച് പ്രതിപക്ഷനേതാവ് രമേശ് ചെന്നിത്തല രംഗത്ത് വന്നിരുന്നു. സർക്കാരിന്റെ നടപടിയെ കുറിച്ച് അറിയില്ലെന്നും പ്രതിപക്ഷത്തിന്റെ ആരോപണം ഗൗരവമുള്ളതാണെന്നുമായിരുന്നു സി.പി .ഐ സംസ്ഥാന പ്രസിഡന്റെ കാനം രാജേന്ദ്രന്റെ പ്രതികരണം .

അഡ്വക്കേറ്റ് എ ജയശങ്കറുടെ ഫേസ്ബുക്ക് പോസ്റ്റ്

പ്രളയക്കെടുതിയിൽ നിന്നു കേരളത്തെ കരകയറ്റാൻ എക്‌സൈസ് വകുപ്പിന്റെ എളിയ കാണിക്ക- മൂന്നു ബ്രൂവറികൾ, ഒരു ഡിസ്റ്റിലറി.

യുഡിഎഫ് ഭരണകാലത്ത് പൂട്ടിയ ബാറുകൾ തുറന്നു കൊടുത്ത് അബ്കാരി സഖാക്കളുടെ കണ്ണീരൊപ്പിയ എൽഡിഎഫ് സർക്കാർ ഇനി മദ്യവ്യവസായികളെ പരിപോഷിപ്പിച്ച് സുസ്ഥിര വികസനം ഉറപ്പാക്കാനാണ് ഉദ്ദേശിക്കുന്നത്.

ഇതിൽ യാതൊരു അഴിമതിയുമില്ല. സർവ്വം സുതാര്യം, സത്യസന്ധം, പ്രകടന പത്രികാനുസൃതം.