ശബരിമലയില്‍ സ്ത്രീകളെ പ്രവേശിപ്പിക്കണമെന്ന സുപ്രീംകോടതി വിധി തന്ത്രിക്കും ബാധകമാണെന്ന് തിരുവിതാംകൂര്‍ ദേവസ്വം ബോര്‍ഡ്. വിധി എന്തായാലും നടപ്പാക്കും. സര്‍ക്കാരിനും ബോര്‍ഡിനും ഇക്കാര്യത്തില്‍ നിലപാടുണ്ട്. അതിനാല്‍ കോടതി തീരുമാനം ആര്‍ജ്ജവത്തോടെ നടപ്പാക്കും. കോടതി തീരുമാനം പാലിക്കാന്‍ തന്ത്രിയും ബാധ്യസ്ഥനാണ്. ഇക്കാര്യത്തില്‍ ദേവഹിതത്തിന്റെ കാര്യമില്ല. കേസില്‍ വീഴ്ച പറ്റിയിട്ടില്ലെന്നും ദേവസ്വം ബോര്‍ഡ് അറിയിച്ചു. ആചാര അനുഷ്ടാനങ്ങള്‍ പാലിക്കപ്പെടണമെന്നാണ് ബോര്‍ഡ് ആഗ്രഹിക്കുന്നതെന്നും ബോര്‍ഡ് വിശദമാക്കി. 

എന്നാല്‍ ശബരിമലയില്‍ സ്ത്രീകളെ പ്രവേശിപ്പിക്കുന്നത് കാലാകാലങ്ങളായുള്ള വിശ്വാസത്തിന്റേയും ആചാരാനുഷ്ഠാനങ്ങളുടേയും ലംഘനമാണെന്ന് ദേവസ്വം ബോര്‍ഡ് കോടതിയില്‍ വ്യക്തമാക്കിയിരുന്നു. നൈഷ്ഠിക ബ്രഹ്മചാരിയാണ് അയ്യപ്പന്‍. ശബരിമലയില്‍ തീര്‍ത്ഥാടനത്തിന് പോകുന്ന പുരുഷന്മാര്‍ 41 ദിവസം കഠിന വ്രതമെടുക്കാറുണ്ട്. സ്ത്രീകള്‍ക്ക് ആര്‍ത്തവം പോലുള്ള ശാരീരികാവസ്ഥ കാരണം ഇത്രയും ദിവസം വ്രതമെടുക്കാനാകില്ലെന്നും ദേവസ്വം ബോര്‍ഡ് കോടതിയില്‍ പറഞ്ഞിരുന്നു. അതിനെയെല്ലാം നിഷേധിക്കുന്നതാണ് വിധി വന്ന ശേഷമുള്ള നിലപാട്.

അതേസമയം, കോടതി വിധി നിരാശാജനകമാണെന്ന് ശബരിമല തന്ത്രി കണ്ഠരര് രാജീവര് പ്രതികരിച്ചു. സ്ത്രീകളുടെ ഭരണഘടനപരമായ അവകാശങ്ങള്‍ സംരക്ഷിക്കുന്ന സുപ്രധാന വിധിയാണിതെന്ന് മന്ത്രി ജി.സുധാരകരനും പ്രതികരിച്ചു. ജി.സുധാകരന്‍ മുമ്പ് ദേവസ്വം മന്ത്രിയായിരുന്നു.