മ്യാന്‍മാറില്‍ നിന്നും പാലായനം ചെയ്ത് അനധികൃതമായി ഇന്ത്യയിലെത്തിയ രോഹിങ്ക്യകള്‍ കൂട്ടത്തോടെ കേരളത്തിലേക്ക് ചേക്കേറുന്നതായി റെയില്‍വേയുടെ മുന്നറിയിപ്പ്. വിദേശികളായ ഇവര്‍ക്കെതിരെ ഉത്തരേന്ത്യയിലടക്കം ശക്തമായ നടപടികള്‍ അധികാരികളെടുക്കുന്നതാണ് കേരളത്തിലേക്കെത്താന്‍ ഇവരെ പ്രേരിപ്പിക്കുന്നത്.

കേന്ദ്ര ആഭ്യന്തര മന്ത്രി രാജ്‌നാഥ് സിംഗും രോഹിഗ്യകളുടെ സാന്നിദ്ധ്യം രാജ്യത്തിന്റെ തെക്ക് ഭാഗത്തായി കേന്ദ്രീകരിക്കുന്നതില്‍ സംസ്ഥാനങ്ങള്‍ക്ക് മുന്നറിയിപ്പ് നല്‍കിയിരുന്നു. ഈ മാസം 26ന് റെയില്‍വേ സുരക്ഷാ വിഭാഗം പുറത്തിറക്കിയ സര്‍ക്കുലര്‍ ഇക്കാര്യം ശരിവയ്ക്കുന്നുണ്ട്.

ഉത്തരേന്ത്യയില്‍ നിന്നും ധാരാളം രോഹിങ്ക്യകള്‍ രാജ്യത്തിന്റെ തെക്ക് ഭാഗത്തേയ്ക്കുള്ള ട്രെയിനുകളില്‍ സഞ്ചരിക്കുന്നതായി ശ്രദ്ധയില്‍ പെട്ടുവെന്നും, കേരളമാണ് അവര്‍ ലക്ഷ്യം വയ്ക്കുന്നതെന്നും റിപ്പോര്‍ട്ടിലുണ്ട്. ഇവരുടെ ചലനങ്ങള്‍ നിരീക്ഷിക്കണമെന്നതടക്കം ഇവര്‍ സഞ്ചരിക്കുന്ന ട്രെയിനുകളുടെ വിവരങ്ങളുമായാണ് സര്‍ക്കുലര്‍ പുറത്തിറക്കിയിരിക്കുന്നത്.