ശബരിമലയില് ദര്ശനം നടത്തിയ കനകദുര്ഗയെയും ബിന്ദുവിനെയും സ്റ്റാഫ് ഗേറ്റിലൂടെ മേലേതിരുമുറ്റത്ത് എത്താന് അനുവദിച്ചത് എങ്ങനെയെന്ന് അറിയില്ലെന്നു ഹൈക്കോടതിയോട് ശബരിമല നിരീക്ഷക സമിതി...
ശബരിമലയില് ദര്ശനം നടത്തിയ കനകദുര്ഗയെയും ബിന്ദുവിനെയും സ്റ്റാഫ് ഗേറ്റിലൂടെ മേലേതിരുമുറ്റത്ത് എത്താന് അനുവദിച്ചത് എങ്ങനെയെന്ന് അറിയില്ലെന്നു ശബരിമല നിരീക്ഷക സമിതി ഹൈക്കോടതിയെ അറിയിച്ചു. അജ്ഞാതരായ അഞ്ചു പേരുടെ അകമ്പടിയിലാണു യുവതികളെത്തിയത്. വിഐപികളും ബോര്ഡ് ഉദ്യോഗസ്ഥരും കടന്നുപോകുന്ന ഈവഴി സാധാരണ ഭക്തരെ പൊലീസ് കടത്തിവിടാറില്ല. സാധാരണക്കാര്ക്കു പ്രവേശനമില്ലാത്ത, കൊടിമരത്തിനു പിന്നിലെ വാതിലിലൂടെയാണു യുവതികള് ശ്രീകോവിലിനു മുന്നിലെത്തിയതെന്നു വിവരമുണ്ടെന്നും റിപ്പോര്ട്ടില് പറയുന്നു. സര്ക്കാരിനെ വീണ്ടും പ്രതിക്കൂട്ടിലാക്കുന്നതാണ് റിപ്പോര്ട്ട്.
സീസണ് കഴിയുംവരെ യുവതികള്ക്കു വ്യക്തിഗത പൊലീസ് സംരക്ഷണം നല്കരുതെന്നു മുന് റിപ്പോര്ട്ടില് പറഞ്ഞതു സമിതി ചൂണ്ടിക്കാട്ടി. പ്രതിഷേധ ഘോഷയാത്രയില് പങ്കെടുത്തതിന്റെ പേരില് ചിലരെ തിരുവാഭരണ ഘോഷയാത്രയില് നിന്ന് ഒഴിവാക്കരുതെന്നു നിര്ദേശം നല്കി. ഈ വിഷയം സംസാരിക്കാന് എസ്പിയോടു വരാന് പറഞ്ഞെങ്കിലും ഡിജിപിയുടെ നിര്ദേശപ്രകാരം പന്തളത്ത് ആയതിനാല് വരാനാവില്ലെന്ന് അറിയിച്ചതിനാലാണു നിര്ദേശം നല്കിയതെന്നും സമിതി അറിയിച്ചു. സമിതിയെ വകവയ്കാത്ത പോലീസ് നടപടികളെ പൂര്ണ്ണമായി വിമര്ശിക്കുന്ന റിപ്പോര്ട്ടാണ് സമിതി നല്കിയിരിക്കുന്നത്.
മുന്പ് ബിന്ദുവിനും കനക ദുര്ഗയ്ക്കും പ്രത്യേക അജണ്ടയുണ്ടോ സര്ക്കാരിനോട് ഹൈക്കോടതി സര്ക്കാരിനോട് ചോദിച്ചിരുന്നു.യുവതികള് ശബരിമയില് ദര്ശനം നടത്തിയ സംഭവത്തില് സര്ക്കാര് വിശദമായ സത്യവാങ്മൂലം നല്കാന് ഹൈക്കോടതി ഉത്തരവ് നല്കിയിരുന്നു .
ശബരിമലയില് സര്ക്കാരിന്റെയോ പോലീസിന്റെയോ പ്രകടനങ്ങള് അനുവദിക്കില്ലെന്നും കോടതി വ്യക്തമാക്കിയിരുന്നു. വിശ്വാസികളാണോ ദര്ശനം നടത്തിയ യുവതികളെന്നും ഇവര് ദര്ശനം നടത്തിയത് പ്രത്യേകമായി എന്തെങ്കിലും സ്ഥാപിച്ചെടുക്കാനാണോ എന്നും കോടതി ചോദിച്ചിരുന്നു. ശബരിമല വിശ്വാസികള്ക്കുള്ള ഇടമാണെന്നും നിയമ ലംഘനം നടക്കുന്നത് പോലീസ് സുരക്ഷയിലാണെന്നും കോടതി പറഞ്ഞു.
ബിന്ദുവിന്റേയും കനകദുര്ഗെയുടെയും ദര്ശനത്തില് സര്ക്കാര് വാശി കാണിച്ചെന്നും നടപടിക്രമങ്ങള് എല്ലാം തെറ്റിച്ചെന്നും പരാതി നില്ക്കുന്നതിനിടയിലാണ് നിരീക്ഷക സമിതിയുടെ ഈ പ്രഹരം.
"
https://www.facebook.com/Malayalivartha
