നാവിക സേനാ ഹെലികോപ്റ്റര്‍ യന്ത്രത്തകരാറിനെ തുടര്‍ന്നു ചമ്മനാട് ക്ഷേത്രമൈതാനത്ത് അടിയന്തരമായി ഇറക്കി. കോപ്റ്ററിലുണ്ടായിരുന്ന 2 പൈലറ്റുമാര്‍ ഉള്‍പ്പെടെ മൂന്നുപേരും സുരക്ഷിതര്‍. നന്നാക്കാന്‍ കഴിയാത്തതിനാല്‍ കോപ്റ്റര്‍ ട്രക്കില്‍ കയറ്റി കൊച്ചിയിലേക്കു കൊണ്ടുപോകാനുള്ള ശ്രമം രാത്രിയും നടക്കുകയാണ്. ഇന്നലെ ഉച്ചയ്ക്ക് 1.30നു ദേശീയപാതയ്ക്കരികില്‍ പടിഞ്ഞാറെ ചമ്മനാട് ദേവീക്ഷേത്ര മൈതാനത്ത് ഇറക്കിയത് ദക്ഷിണ നാവിക കമാന്‍ഡിന്റെ ഐഎന്‍ 429 ചേതക് എന്ന ഹെലികോപ്റ്ററാണ്.

പിന്നാലെ മറ്റൊരു കോപ്റ്ററില്‍ വിദഗ്ധര്‍ എത്തിയെങ്കിലും നന്നാക്കാന്‍ കഴിഞ്ഞില്ല. ഇളക്കിമാറ്റിയ പങ്കകള്‍ കൊച്ചി നേവല്‍ ബേസിലേക്കു കൊണ്ടുപോയി. ആദ്യമെത്തിച്ച ട്രക്കിനു വീതി കുറവായതിനാല്‍ കൂടുതല്‍ വലുപ്പമുള്ള ട്രക്ക് എത്തിച്ചു കോപ്റ്റര്‍ കൊണ്ടുപോകാന്‍ രാത്രിയിലും ശ്രമം നടക്കുകയാണ്. തീരദേശ നീരീക്ഷണത്തിനിടയിലാണ് കോപ്റ്റര്‍ കേടായത്. യന്ത്രത്തകരാറുണ്ടായാല്‍ തൊട്ടടുത്തു സൗകര്യമുള്ള സ്ഥലത്ത് ഇറക്കണമെന്നാണു പൈലറ്റുമാര്‍ക്കുള്ള നിര്‍ദേശം.

മൂന്നരയോടെയാണു 15 സാങ്കേതിക വിദഗ്ധര്‍ മറ്റൊരു കോപ്റ്ററില്‍ എത്തിയത്. സ്ഥലമില്ലാത്തതിനാല്‍, കേടായ കോപ്റ്റര്‍ നാട്ടുകാരും പൊലീസും പൈലറ്റുമാരും ചേര്‍ന്നു തള്ളി നീക്കിയ ശേഷമാണ് മെക്കാനിക്കല്‍ വിഭാഗത്തിന്റെ കോപ്റ്റര്‍ മൈതാനത്തിറക്കിയത്. മറ്റൊരു കോപ്റ്റര്‍ കൂടി എത്തിയെങ്കിലും ഇറങ്ങാന്‍ കഴിയാതെ മടങ്ങി.പങ്കകള്‍ അഴിച്ചു ക്രെയിന്‍ ഉപയോഗിച്ചാണു വാഹനത്തില്‍ കയറ്റാന്‍ ശ്രമം നടക്കുന്നത്. ഹെലികോപ്റ്റര്‍ ഇറങ്ങിയതു കണ്ട് മൈതാനത്തു തടിച്ചുകൂടിയ ആളുകളെ നിയന്ത്രിക്കാന്‍ കുത്തിയതോട് പൊലീസും സ്ഥലത്തെത്തിയിരുന്നു. മൈതാനത്തു നിന്ന് നേവി ഉദ്യോഗസ്ഥരും നാട്ടുകാരും ചേര്‍ന്നു തള്ളിയാണ് കോപ്റ്റര്‍ ദേശീയപാതയിലെത്തിച്ചത്.

കോപ്റ്റര്‍ ട്രക്കില്‍ കയറ്റാനുള്ള ശ്രമം കാരണം ദേശീയപാതയില്‍ 2 മണിക്കൂര്‍ ഗതാഗതം തടസ്സപ്പെട്ടുകഴിഞ്ഞ മാര്‍ച്ചില്‍ നാവിക സേനയുടെ മറ്റൊരു കോപ്റ്റര്‍ (ഐഎന്‍ 413 ചേതക്) യന്ത്രത്തകരാറിനെ തുടര്‍ന്നു മുഹമ്മ കാവുങ്കല്‍ വടക്കേക്കരി പാടത്ത് ഇറക്കിയിരുന്നു. മാര്‍ച്ച് 17-ന് രാവിലെയായിരുന്നു അത്. പരിശീലനപ്പറക്കലിന് ഇടയിലാണു തകരാറുണ്ടായത്. അന്നു 2 കോപ്റ്ററുകളിലായി 4 സാങ്കേതിക വിദഗ്ധരെത്തി തകരാര്‍ പരിഹരിച്ചു കൊച്ചിയിലേക്കു പറന്നു.