അടുത്തമാസം അവസാനത്തിന് മുമ്പ് ലോക്‌സഭാ തെരഞ്ഞെടുപ്പിനുള്ള സ്ഥാനാര്‍ത്ഥികളെ നിശ്ചയിക്കണമെന്ന് കോണ്‍ഗ്രസ് ഹൈക്കമാന്‍ഡ് നിര്‍ദ്ദേശമുണ്ടെങ്കിലും യു.ഡി.എഫിലെ സീറ്റ് വിഭജനം തര്‍ക്കത്തിലേക്ക്. കക്ഷികളുടെ എണ്ണത്തില്‍ ഗണ്യമായ കുറവുണ്ടെങ്കിലും സീറ്റുകള്‍ക്ക് പുതിയ ആവശ്യവുമായി കക്ഷികള്‍ രംഗത്തുവന്നതാണ് യു.ഡി.എഫിനെ കുഴയ്ക്കുന്നത്. കഴിഞ്ഞ തവണത്തെ ധാരണാപ്രകാരം സീറ്റുകള്‍ വിഭജിച്ച് തെരഞ്ഞെടുപ്പ് പ്രവര്‍ത്തനങ്ങളിലേക്ക് പോകാമെന്ന് കരുതിയിരുന്നെങ്കിലും കേരള കോണ്‍ഗ്രസ്(ജേക്കബ്) പുതിയ ആവശ്യവുമായി രംഗത്ത് എത്തിയത് യു.ഡി.എഫിനെ കുഴയ്ക്കുന്നു.

ഇക്കുറി ലോക്‌സഭയിലേക്ക് തങ്ങള്‍ക്കും സീറ്റ് വേണമെന്ന ആവശ്യമാണ് അവര്‍ ഉന്നയിച്ചിരിക്കുന്നത്. ഇടുക്കി, കോട്ടയ, ചാലക്കുടി ഇവയില്‍ ഏതെങ്കിലും ഒരു സീറ്റ് തങ്ങള്‍ക്ക് കിട്ടണമെന്നാണ് ആവശ്യം. കഴിഞ്ഞ തവണ മത്സരിച്ച ഒരു കക്ഷി മുന്നണിയില്‍ നിന്നും വിട്ടുപോയ സാഹചര്യത്തില്‍ തുടക്കം മുതല്‍ യു.ഡി.എഫിന്റെ ഭാഗമായിരുന്ന തങ്ങള്‍ക്ക് ഒരു സീറ്റിന് അര്‍ഹതയുണ്ടെന്നാണ് ജേക്കബ് ഗ്രൂപ്പിന്റെ നിലപാട്. ഇന്ന് ചേരുന്ന യു.ഡി.എഫ് യോഗത്തില്‍ അവര്‍ ഇക്കാര്യം ശക്തമായി ഉന്നയിക്കുകയും ചെയ്യും.
മുന്നണിയില്‍ ചെറുകക്ഷികളുടെ കൂട്ടത്തിലാണ് ജേക്കബ് വിഭാഗം വരുന്നത്. കഴിഞ്ഞ നിയമസഭാ തെരഞ്ഞെടുപ്പില്‍ പോലും അവരുടെ സീറ്റുകള്‍ കോണ്‍രഗസ് പിടിച്ചെടുക്കുകയാണ് ഉണ്ടായത്. എന്നാല്‍ അതേ നിലയില്‍ ഇക്കുറി ജേക്കബ് ഗ്രൂപ്പ് എന്നല്ല, ഒരു കക്ഷിയേയും അവഗണിക്കാന്‍ കോണ്‍ഗ്രസിന് കഴിയില്ല. ഇപ്പോള്‍ തന്നെ യു.ഡി.എഫ് ദുര്‍ബലമാണ്. അതില്‍ ഇനി ഒരു കക്ഷികൂടി എന്തെങ്കിലും കടുത്ത നിലപാട് സ്വീകരിച്ചാല്‍ അത് കോണ്‍ഗ്രസിന് താങ്ങാനാവില്ല. മാത്രമല്ല, ജനാധിപത്യപരമായും എല്ലാ കക്ഷികളേയും തുല്യമായി പരിഗണിക്കുന്നതുമായ മുന്നണിയാണെന്ന കോണ്‍ഗ്രസിന്റെ വാദവും ഇതോടെ പൊളിയും. അതുകൊണ്ട് ഇന്നത്തെ സാഹചര്യത്തില്‍ ജേക്കബ് ഗ്രൂപ്പിനെ അങ്ങനെ പുറംകാലുകൊണ്ട് തള്ളിക്കളയാന്‍ കഴിയില്ല.

ഇടുക്കി, എറണാകുളം ജില്ലകളിലെ ചില കേന്ദ്രങ്ങളില്‍ പ്രത്യേകിച്ചും എറണാകുളം ജില്ലയില്‍ ജേക്കബ് ഗ്രൂപ്പിന് നല്ല സ്വാധീനമുണ്ട്. ആ സ്വാധീനം കോണ്‍ഗ്രസിന് ഇക്കുറി അനിവാര്യവുമാണ്. അതുകൊണ്ടാണ് എറണാകുളം ജില്ലയിലെ തങ്ങളുടെ ശക്തികേന്ദ്രങ്ങളില്‍ ചിലതുകൂടി വരുന്ന ചാലക്കുടി സീറ്റിന് അവര്‍ പിടിമുറുക്കുന്നതും. എന്നാല്‍ ചാലക്കുടി എന്ന ഒരു സീറ്റ് മാത്രം മുന്നോട്ടുവയ്ക്കാതെ ഓപ്ഷനുകള്‍ക്കായാണ് കോട്ടയവും ഇടുക്കിയും കൂടി ആവശ്യപ്പെട്ടിരിക്കുന്നത്.

മുന്നണിയില്‍ വര്‍ഷങ്ങളായി സജീവമായി നില്‍ക്കുന്ന തങ്ങള്‍ക്ക് എന്നും അവഗണന മാത്രമേ ഉണ്ടായിട്ടുള്ളുവെന്നാണ് അവരുടെ പരാതി. അതേസമയം ഇടതുമുന്നണി വിട്ടുവന്നപ്പോള്‍, ആര്‍.എസ്.പിയേയും വീരേന്ദ്രകുമാറിനെയും സിറ്റിംഗ് സീറ്റുകള്‍ പോലും നല്‍കാന്‍ തയാറായാണ് കോണ്‍ഗ്രസ് സ്വീകരിച്ച്. അങ്ങനെ സ്വീകരിച്ച് ഒരിടത്തുമില്ലാതിരുന്നപ്പോള്‍ എല്ലാ പിന്തുണയും നല്‍കിയിട്ടുപോലും വീരേന്ദ്രകുമാര്‍ മുന്നണി വിട്ടുപോയി. കഴിഞ്ഞ തവണ ഒരു സീറ്റില്‍ അവരാണ് മത്സരിച്ചത്. അതിന് പകരം തങ്ങള്‍ക്ക് ഒരു സീറ്റ് നല്‍കിയാല്‍ മതിയെന്നാണ് ജേക്കബ് ഗ്രൂപ്പിന്റെ ആവശ്യം. എന്നാല്‍ അതിന്റെ പേരില്‍ വീരേന്ദ്രകുമാര്‍ നാണം കെട്ട പാലക്കാട് തങ്ങള്‍ക്ക് വേണ്ടതില്ലെന്നും അവര്‍ അടിവരയിടുന്നു.

ഇന്ന് യു.ഡി.എഫ് യോഗം ചേരുന്നതുതന്നെ സീറ്റ് വിഭജനത്തില്‍ ഒരു അന്തിമരൂപം ഉണ്ടാക്കാനാണ്. ലീഗിന് പതിവുപോലെ രണ്ടു സീറ്റ്, മാണിവിഭാഗത്തിനും ആര്‍.എസ്.പിക്കും ഓരോ സീറ്റ് ബാക്കി 16 കോണ്‍ഗ്രസ് എന്നായിരുന്നു കണക്കുകൂട്ടല്‍. എന്നാല്‍ ഒരു സീറ്റ് കൂടുതല്‍ വേണമെന്ന ആവശ്യം ലീഗിന്റെ ഭാഗത്തുനിന്നുമുണ്ട്. ഇതിന് പുറമെ ഇടുക്കി വേണമെന്ന പഴയ ആവശ്യം മാണി ഗ്രൂപ്പിനുമുണ്ട്. അതിന് പുറമെയാണ് ജേക്കബ് വിഭാഗത്തിന്റെ സീറ്റ് ആവശ്യവും. ഇത് മുന്നണിയുടെ സീറ്റ് വിഭജനം അത്ര സുഗമായി അവസാനിക്കുന്നതിന് തടസമാകും. ഉഭയകക്ഷികള്‍ ചര്‍ച്ചകളും മറ്റും നടത്തിയാല്‍ മാത്രമേ രമ്യമായി പ്രശ്‌നപരിഹാരം സാദ്ധ്യമാകുകയുള്ളു. ഇന്ന് ചര്‍ച്ചകള്‍ തുടങ്ങിവച്ച് ഈ മാസം അവസാനത്തിനുള്ളില്‍ തന്നെ പൂര്‍ത്തിയാക്കാനായിരിക്കും നീക്കം. ആവശ്യങ്ങള്‍ പലതുണ്ടെങ്കിലും ഇതൊന്നും പരിഗണിക്കാനാവില്ലെന്ന നിലപാടിലാണ് കോണ്‍ഗ്രസും.