നാടിനെ നടുക്കിയ പട്ടണക്കാട്ടെ പിഞ്ചുകുഞ്ഞിന്റെ കൊലപാതക ശേഷവും പൊലീസ് കസ്റ്റഡിയില്‍ പതര്‍ച്ചയില്ലാതെ അമ്മ ആതിര. കുഞ്ഞിന്റെ മരണത്തില്‍ വേദനയോ വിഷമമോ പ്രകടപ്പിക്കാതെയുള്ള ആതിരയുടെ പെരുമാറ്റം പൊലീസിനെയും കുഴയ്ക്കുകയാണ്. പട്ടണക്കാട് ഗ്രാമപഞ്ചായത്ത് എട്ടാം വാര്‍ഡില്‍ കൊല്ലന്‍വെളി കോളനിയില്‍ ഷാരോണിന്റെ മകള്‍ 15 മാസം പ്രായമുള്ള ആദിഷയെയാണ് കഴിഞ്ഞ ശനിയാഴ്ച വീടിനുള്ളില്‍ വെച്ച് അമ്മ ആതിര കൊലപ്പെടുത്തിയത്. പൊലീസിന്റെ പല ചോദ്യങ്ങളോടും കാര്യമായി പ്രതിക്കാന്‍ പോലും ആതിര തയ്യാറാകുന്നില്ല. 

കൊലപാതകകുറ്റം സമ്മതിക്കുന്ന ആതിര പക്ഷെ അബദ്ധത്തില്‍ മരണ സംഭവിച്ചു പോയതെന്നാണ് ഇപ്പോഴും പൊലീസിനോട് പറയുന്നത്. കുട്ടി നിര്‍ത്താതെ കരഞ്ഞപ്പോഴുണ്ടായ ദേഷ്യത്തില്‍ വായയും മൂക്കും പൊത്തിപിടിച്ചപ്പോള്‍ മരണം സംഭവിക്കുയായിരുന്നു. കൊല്ലണമെന്ന് താന്‍ ഒരിക്കലും കരുതിയിരുന്നില്ല- ആതിര പറയുന്നു. എന്നാല്‍ ആതിരയുടെ മൊഴി അംഗീകരിക്കാന്‍ പൊലീസ് തയ്യാറല്ല. വായയും മൂക്കും പൊത്തിപിടിക്കുമ്പോള്‍ അതിന്റെ പാടുകളോ ലക്ഷണങ്ങളോ മുഖത്തോ മറ്റോ വരേണ്ടതാണ്. എന്നാല്‍ ഇതൊന്നും പോസ്റ്റ്‌മോര്‍ട്ടത്തില്‍ കണ്ടെത്തിയിട്ടില്ല. കൂടാതെ കുട്ടിയെ ഇതിനുമുമ്പും ആതിര നിരവധി തവണ ഉപദ്രവിച്ചിട്ടുണ്ട്. രണ്ട് മാസം പ്രായമുള്ളപ്പോള്‍ കുഞ്ഞിനെ ഉപദ്രവിച്ചപ്പോള്‍ ഭര്‍തൃമാതാവ് പൊലീസില്‍ പരാതി നല്‍കിയിരുന്നു.

എന്നാല്‍ കുടുംബ വഴക്കിന്റെ ഭാഗയായുളളതാണെന്നാണ് അന്ന് പൊലീസ് കരുതിയത്. പിന്നീട് ഭര്‍തൃമാതാവിനെ ഉപദ്രവിച്ച സംഭവത്തില്‍ ദിവസങ്ങളോളം ആതിര ജയില്‍ശിക്ഷയും അനുഭവിച്ചിട്ടുണ്ട്. കൂടാതെ കൊലപാതകത്തില്‍ മറ്റാര്‍ക്കെങ്കിലും പങ്കുണ്ടോയെന്നും പൊലീസ് വിശദമായി അന്വേഷിക്കുന്നുണ്ട്. കുഞ്ഞിനു മുലപ്പാല്‍ നല്‍കാറുണ്ടെന്ന ആതിരയുടെ വാക്കുകള്‍ പൊലീസ് പൂര്‍ണമായി വിശ്വസിച്ചിട്ടില്ല. കുഞ്ഞ് രാത്രി ഉണരുമ്പോള്‍ ആതിരയുടെ ഉറക്കം നഷ്ടമാകുന്നതുള്‍പ്പെടെ സൈ്വരജീവിതത്തിനു തടസ്സമാണെന്ന വിശ്വാസത്തില്‍ കുഞ്ഞിനോടു ദേഷ്യം വച്ചുപുലര്‍ത്തി പതിവായി ഉപദ്രവിക്കുമായിരുന്നെന്ന് അന്വേഷണത്തില്‍ കണ്ടെത്തി.

മരണം സംഭവിച്ച വീട്ടില്‍ ഇന്നലെ ശാസ്ത്രീയ പരിശോധനാ വിഭാഗവും വിരലടയാള വിദഗ്ധരും പരിശോധിച്ചു. ആതിരയ്‌ക്കെതിരെ നാട്ടുകാരുടെ പ്രതിഷേധമുള്ളതിനാല്‍ തെളിവെടുപ്പും തുറന്ന കോടതിയില്‍ ഹാജരാക്കലും പൊലീസ് ഒഴിവാക്കി. ഇന്നലെ വൈദ്യപരിശോധനയ്ക്കു ശേഷം മജിസ്‌ട്രേട്ടിനു മുന്നില്‍ ഹാജരാക്കിയ ശേഷം ആതിരയെ റിമാന്‍ഡ് ചെയ്തു. ആവശ്യമെങ്കില്‍ പിന്നീടു കസ്റ്റഡിയില്‍ വാങ്ങുമെന്നു പൊലീസ് അറിയിച്ചു. കുഞ്ഞിനെ അബദ്ധത്തില്‍ കൊലപ്പെടുത്തിയതാണെന്ന് ആതിര നല്‍കിയ മൊഴി പൊലീസ് പൂര്‍ണമായും മുഖവിലയ്‌ക്കെടുത്തിട്ടില്ല. കൂടുതല്‍ ചോദ്യം ചെയ്യലിലൂടെ മാത്രമേ കൊലപാതകത്തിന്റെ കാരണം വ്യക്തമാകൂ എന്നാണ് പൊലീസ് പറയുന്നത്. ആതിരയ്ക്ക് മറ്റെന്തെങ്കിലും ബന്ധമുണ്ടോ, കൊലപാതകത്തിന് മറ്റാരുടെയെങ്കിലും സഹായമുണ്ടോ , എന്തെങ്കിലും മാനസിക പ്രശ്‌നങ്ങളുണ്ടോ തുടങ്ങിയ കാര്യങ്ങളും പരിശോധിക്കുമെന്ന് പൊലീസ് അറിയിച്ചു.