പിഎസ്‌സി പരീക്ഷാ നടത്തിപ്പില്‍ ക്രമക്കേടാരോപിച്ച് അസിസ്റ്റന്‍റ് പബ്ലിക് പ്രോസിക്യൂട്ടര്‍ (എപിപി) പരീക്ഷയെഴുതിയ ഉദ്യോഗാര്‍ഥികൽ രംഗത്തു വന്നിരിക്കുന്നു . പരീക്ഷയിലെ നൂറ് ചോദ്യങ്ങളില്‍ എണ്‍പതെണ്ണവും ഒരേ ഗൈഡില്‍ നിന്നു തന്നെ ചോദിച്ചതിനു പിന്നില്‍ അസ്വാഭാവികതയുണ്ടെന്നാണ് ആരോപണം . തെളിവുകളടക്കം ഉദ്യോഗാർത്ഥികൾ പി എസ സിക്ക് പരാതി നല്‍കി. എന്നാൽ ഇതവഗണിച്ച് നിയമന നടപടികളുമായി മുന്നോട്ടു പോവുകയാണ് പിഎസ്‌സി എന്നാണു ആരോപണം .

2019 ജനുവരി ഇരുപത്തിരണ്ടിനായിരുന്നു അസിസ്റ്റന്‍റ് പബ്ലിക് പ്രോസിക്യൂട്ടര്‍ നിയമനത്തിനുളള പിഎസ്‌സി പരീക്ഷ. 100 ചോദ്യങ്ങളടങ്ങിയ ചോദ്യക്കടലാസിലെ 80 എണ്ണവും യൂണിവേഴ്സല്‍ പബ്ലിക്കേഷന്‍സിന്‍റെ പഠനസഹായിയില്‍ നിന്ന് ആയിരുന്നു . ഗൈഡില്‍ നിന്നുളള ചോദ്യങ്ങൾ അതേരീതിയിൽ പകർത്തിയതായിരുന്നു ചോദ്യപേപ്പർ

മാത്രമല്ല പരീക്ഷയെഴുതിയ ഒരു വിഭാഗം ഉദ്യോഗാര്‍ഥികള്‍ക്ക് ഈ ഗൈഡില്‍ നിന്നാണ് ചോദ്യങ്ങള്‍ വരികയെന്ന സൂചന നേരത്തെ കിട്ടിയിരുന്നുവെന്നും ആരോപണമുയര്‍ന്നിട്ടുണ്ട്. ഒരു ഗൈഡില്‍ നിന്ന് തന്നെ ചോദ്യങ്ങള്‍ ചോദിച്ച സംഭവം മുമ്പുണ്ടായപ്പോള്‍ പരീക്ഷ റദ്ദാക്കിയ പിഎസ്‌സി ഇത്തവണ പക്ഷേ പരാതി കണ്ടില്ലെന്ന് നടിക്കുകയാണ്.
പരീക്ഷാ ക്രമക്കേടാരോപിച്ച് അഡ്മിനിസ്ട്രേറ്റീവ് ട്രിബ്യൂണലിലടക്കം ഉദ്യോഗാര്‍ഥികളുടെ പരാതി നിലനില്‍ക്കുമ്പോള്‍ തന്നെ നിയമന നടപടികളുമായി മുന്നോട്ടു പോവുകയാണ് സംസ്ഥാന പബ്ലിക് സര്‍വീസ് കമ്മിഷന്‍.