2020-21 സാമ്പത്തിക വർഷത്തേക്കുള്ള സംസ്ഥാന ബഡ്ജറ്റ് ധനമന്ത്രി തോമസ് ഐസക്ക് അവതരിപ്പിച്ചു. നിയമസഭയിൽ നടത്തിയ ബജറ്റ് പ്രസംഗത്തിൽ കെഎസ്ആര്‍ടിസിക്ക് 1000 കോടി വകയിരുത്തി. കെഎസ്ആർടിസി പ്രതിസന്ധിയിലാണെന്ന വാർത്തകൾ പുറത്ത് വന്നിരുന്നു. ഇതിനു പിന്നാലെയുള്ള ബജറ്റിലെ പ്രഖ്യാപനം കെഎസ്ആർടിസിക്ക് ആശ്വാസകരമാകും. കഴിഞ്ഞ മാസം കെഎസ്ആർടിസി റെക്കോർ‌ഡ് വരുമാനം രേഖപ്പെടുത്തിയിരുന്നു. എങ്കിലും ജീവനക്കാർക്ക് കൃത്യമായി ശമ്പളം നൽകാൻ കെഎസ്ആർടിസിക്ക് കഴിഞ്ഞിരുന്നില്ല.

അതുകൊണ്ട് തന്നെ ബജറ്റിലെ പ്രഖ്യാപനം കെഎസ്ആർടിസിക്ക ആശ്വാസം പകരുന്ന ഒന്നാണ്. അതേസമയം സര്‍ക്കാര്‍ ജീവനക്കാരുടെ പതിനൊന്നാം ശമ്ബള പരിഷ്‌കരണം ഈ വര്‍ഷം നടപ്പിലാക്കുമെന്ന് ധനമന്ത്രി തോമസ് ഐസക് ബജറ്റ് അവതരണത്തിൽ പറഞ്ഞു. ഡിഎ കുടിശിക ഘട്ടങ്ങളായി അടുത്ത സാമ്ബത്തിക വര്‍ഷം നല്‍കും. ഹൗസ്ബില്‍ഡിങ് അഡ്വാന്‍സ് സര്‍ക്കാര്‍ ജീവനക്കാരുെട അഭിപ്രായം മാനിച്ച്‌ സര്‍ക്കാര്‍ നേരിട്ടു നല്‍കുന്ന രീതിയില്‍ പുനസ്ഥാപിക്കുമെന്നും മന്ത്രി അറിയിച്ചു. 2 ലക്ഷം വിലയുള്ള മോട്ടോര്‍ സൈക്കിളുകള്‍ക്ക് ഒരു ശതമാനം നികുതി വര്‍ദ്ധിപ്പിച്ചു. ജലഗതാഗത വകുപ്പിന് 111 കോടിയും സിവില്‍ സപ്ലൈസിന് 60 കോടി വകയിരുത്തി. 15 ലക്ഷം വരെ വില വരുന്ന കാറുകള്‍ക്കും മറ്റു സ്വകാര്യ വാഹനങ്ങള്‍ക്കും 2 ശതമാനം നികുതി കൂട്ടി. ഇലക്ട്രിക് ഓട്ടോറിക്ഷകള്‍ക്ക് ആദ്യ 5 വര്‍ഷം നികുതിയില്ലെന്നും മന്ത്രി അറിയിച്ചു

കേന്ദ്ര സർക്കാരിന്റെ നയങ്ങളെ നിശിതമായി വിമർശിച്ചുകൊണ്ടാണ് ധനമന്ത്രി തന്റെ ബഡ്ജറ്റ് അവതരണം തുടങ്ങിയത്. ജനാധിപത്യവും സ്വേച്ഛാധിപത്യവും രാജ്യത്ത് മുഖാമുഖം നിൽക്കുകയാണെന്നും വെറുപ്പിന്റെയും വിദ്വേഷത്തിന്റെയും ഭാഷ മാത്രം സംസാരിക്കുന്ന ഭരണാധികാരികളാണ് കേന്ദ്ര സർക്കാരിൽ ഉള്ളതെന്നും അദ്ദേഹം ചൂണ്ടിക്കാട്ടി. അക്രമവും ഹിംസവും കർമമെന്ന് വിശ്വസിക്കുന്ന അണികളാണ് അവർക്കുള്ളതെന്നും അദ്ദേഹം കുറ്റപ്പെടുത്തി. ഇന്ത്യൻ സാമ്പത്തിക ഘടന അങ്ങേയറ്റത്തെ തകർച്ചയിലാണെന്നും കേന്ദ്രം സംസ്ഥാനത്തിന് 8330 കോടി രൂപയിലധികം നൽകാനുണ്ടെന്നും സംസ്ഥാനം നിലവിൽ സാമ്പത്തികമായി ശ്വാസം മുട്ടുകയാണെന്നും അദ്ദേഹം ബജറ്റ് പ്രസംഗത്തിൽ ചൂണ്ടിക്കാട്ടി.

ധനക്കമ്മി മൂന്ന് ശതമാനത്തില്‍ താഴെ നിലനിര്‍ത്തിക്കൊണ്ടുള്ള 2020-21 സാമ്ബത്തിക വര്‍ഷത്തേക്കുള്ള ബജറ്റാണ് ധനമന്ത്രി തോമസ് ഐസക്ക് നിയമസഭയില്‍ അവതരിപ്പിച്ചത്. മുന്‍ വര്‍ഷത്തെ അപേക്ഷിച്ച്‌ സംസ്ഥാനത്തിന്റെ തനത് വരുമാനം ഉയര്‍ത്തുന്നതിനുള്ള നിര്‍ദ്ദേശങ്ങളും ബജറ്റിലുണ്ട്. ഇതിന്റെ ഫലമായി റവന്യു കമ്മി 2019-20ലെ പുതുക്കിയ കണക്കായ 2.01 ശതമാനത്തില്‍ നിന്ന് 1.55 ശതമാനമായി കുറയുമെന്നാണ് കണക്കാക്കുന്നത്.

2020-21ലെ ബജറ്റ് എസ്റ്റിമേറ്റ് പ്രകാരം റവന്യു വരുമാനം 1,14,635 കോടിയാകുമെന്നാണ് പ്രതീക്ഷിക്കുന്നത്. റവന്യു ചിലവ്- 1,29,837 കോടിയും റവന്യു കമ്മി- 15,201 കോടിയുമാകുമെന്ന് എസ്റ്റിമേറ്റില്‍ പറയുന്നു. എന്നാല്‍ 2019-20ലെ പുതുക്കിയ ബജറ്റ് എസ്റ്റിമേറ്റ് പ്രകാരം റവന്യു വരവ് 99,042 കോടി. റവന്യു ചിലവ് 1,16,516 കോടി. റവന്യു കമ്മി- 17,474 കോടി എന്നിങ്ങനെ ആയിരുന്നു.

2020-21ലെ ചിലവ് നടപ്പ് വര്‍ഷത്തേക്കാള്‍ 15 ശതമാനം കൂടുതലാണ്. സംസ്ഥാനത്തിന്റെ പൊതുകടം 2020-21 സാമ്ബത്തിക വര്‍ഷത്തില്‍ 84,491 കോടിയാകും. നടപ്പ് സാമ്ബത്തിക വര്‍ഷത്തില്‍ 19,987 കോടിയായിരുന്നു. വികസന ചിലവുകള്‍ വെട്ടിക്കുറയ്ക്കാതെ സംസ്ഥാനത്തെ നവീകരണത്തിന്റെ പാതയിലേക്ക് നയിക്കുക എന്ന ലക്ഷ്യത്തിനായി 1,103 കോടിയുടെ അധിക വിഭവ സമാഹരണവും ബജറ്റില്‍ പ്രഖ്യാപിച്ചിട്ടുണ്ട്.