സര്‍ക്കാര്‍ ജീവനക്കാരുടെയും അധ്യാപകരുടെയും മറ്റും ശമ്പളം പിടിക്കുന്നതു സ്റ്റേ ചെയ്ത ഹൈക്കോടതി വിധിയെ ഓര്‍ഡിനന്‍സ് ഇറക്കി മറികടക്കാന്‍ മന്ത്രിസഭ തീരുമാനിച്ചു. ദുരന്തങ്ങളോ ആരോഗ്യ അടിയന്തരാവസ്ഥയോ പ്രഖ്യാപിച്ചാല്‍ സര്‍ക്കാര്‍ ജീവനക്കാരുടെയും അധ്യാപകരുടെയും ശമ്പളത്തിന്റെ 25% വരെ മാറ്റിവയ്ക്കാന്‍ സംസ്ഥാന സര്‍ക്കാരിന് അധികാരം നല്‍കുന്നതാണ് ഓര്‍ഡിനന്‍സ്.

കേരള ഡിസാസ്റ്റര്‍ ആന്‍ഡ് പബ്ലിക് ഹെല്‍ത്ത് എമര്‍ജന്‍സി സ്‌പെഷല്‍ പ്രൊവിഷന്‍ എന്നു പേരിട്ട ഓര്‍ഡിനന്‍സ് ഗവര്‍ണര്‍ ഒപ്പുവയ്ക്കുന്നതോടെ നിലവില്‍ വരും. അതിനു ശേഷം ഈ മാസത്തെ ശമ്പളം വിതരണം ചെയ്താല്‍ മതിയെന്നാണു തീരുമാനം. 25% വരെ എന്നു വ്യവസ്ഥയുണ്ടെങ്കിലും മുന്‍പു പ്രഖ്യാപിച്ചതു പോലെ 5 മാസത്തേക്ക് 6 ദിവസത്തെ വീതം ശമ്പളമാവും പിടിക്കുക. ഇതു സംബന്ധിച്ചു പിന്നീടു സര്‍ക്കാര്‍ ഉത്തരവിറക്കും. ഇങ്ങനെ മാറ്റിവയ്ക്കുന്ന തുക ഏതു രീതിയില്‍, എന്നു തിരിച്ചു നല്‍കുമെന്ന് 6 മാസത്തിനകം അറിയിച്ചാല്‍ മതിയെന്നാണ് വ്യവസ്ഥ.

ശമ്പളം പിടിക്കുന്നതിനുള്ള ഓര്‍ഡിനന്‍സില്‍ നിയമോപദേശം തേടിയ ശേഷമായിരിക്കും ഗവര്‍ണര്‍ തീരുമാനമെടുക്കുക. ഇന്നലെ മന്ത്രിസഭ അംഗീകരിച്ച 3 ഓര്‍ഡിനന്‍സുകള്‍ സംബന്ധിച്ചും നിയമ സെക്രട്ടറി, ഗവര്‍ണറെ കണ്ടു വിശദീകരിക്കും. ശമ്പളം പിടിക്കുന്നതിന്റെ നിയമസാധുതയെച്ചൊല്ലി പ്രതിപക്ഷ സര്‍വീസ് സംഘടനകളും ഭരണപക്ഷവും തമ്മില്‍ പോരു മുറുകുകയാണ്. ഹൈക്കോടതി വിധി മറികടക്കുന്നതിനുള്ള ഓര്‍ഡിനന്‍സ് ഗവര്‍ണര്‍ക്കു തള്ളാമെന്നും ഈ ആവശ്യമുന്നയിച്ചു ഗവര്‍ണറെ സമീപിക്കുമെന്നും പ്രതിപക്ഷ സര്‍വീസ് സംഘടനകള്‍ അറിയിച്ചു.

ഹൈക്കോടതി സ്റ്റേ ചെയ്തതിനു പിന്നാലെ, സര്‍ക്കാര്‍ ജീവനക്കാരുടെയും അധ്യാപകരുടെയും 6 ദിവസത്തെ ശമ്പളം വീതം 5 മാസത്തേക്കു പിടിക്കാനുള്ള ഉത്തരവു നടപ്പാക്കുന്നതു കേരള അഡ്മിനിസ്‌ട്രേറ്റീവ് ട്രൈബ്യൂണലും (കെഎടി) 2 മാസത്തേക്കു സ്റ്റേ ചെയ്തു.
ഹൈക്കോടതി തുടര്‍ നടപടികള്‍ക്കു വിധേയമായി ട്രൈബ്യൂണലും ഹര്‍ജികള്‍ പരിഗണിക്കും. എന്‍ജിഒ അസോസിയേഷന്‍ ഉള്‍പ്പെടെ നല്‍കിയ ഹര്‍ജിയാണു ട്രൈബ്യൂണല്‍ എറണാകുളം ബെഞ്ച് പരിഗണിച്ചത്.

'പിടിക്കുന്ന ശമ്പളം എങ്ങനെ, എപ്പോള്‍ നല്‍കുമെന്ന് ഇപ്പോള്‍ പറയാനാവില്ല. കേസ് കൊടുക്കാനുള്ള എല്ലാ അവകാശവും പ്രതിപക്ഷത്തിനുണ്ട്. അവര്‍ കേസിനു പോകട്ടെ.' - മന്ത്രി തോമസ് ഐസക് പറഞ്ഞു.