കലക്ടറും പൊലീസും കണ്ണൂരില്‍ പരസ്യ ഏറ്റുമുട്ടലില്‍
കണ്ണൂര്‍ ജില്ലയില്‍ ഹോട്‌സ്‌പോട്ട് അല്ലാത്തിടത്തു പോലും പൊലീസ് റോഡുകള്‍ അടച്ചത് കലക്ടറെ പ്രകോപിപ്പിച്ചു. തുടര്‍ന്ന് റോഡുകള്‍ തുറക്കണമെന്നു ആവശ്യപ്പെട്ട് കലക്ടര്‍ ടി.വി.സുഭാഷ് ജില്ലാ പൊലീസ് മേധാവി യതീഷ് ചന്ദ്രയ്ക്കു കത്തു നല്‍കിയത് ഭരണകൂടവും പൊലീസും തമ്മിലുള്ള ഏറ്റുമുട്ടല്‍ പരസ്യമാക്കി. ഏറ്റവും കൂടുതല്‍ കോവിഡ് രോഗികളും ഏറ്റവുമധികം ഹോട്‌സ്‌പോട്ടുകളുമുള്ള കണ്ണൂര്‍ ജില്ലയിലാണ് പ്രതിരോധ പ്രവര്‍ത്തനങ്ങളുടെ പേരില്‍ ഈ പോര്.
കോവിഡ് രോഗികളുമായി സമ്പര്‍ക്കത്തിലേര്‍പ്പെട്ടവര്‍ (പ്രൈമറി-സെക്കന്‍ഡറി കോണ്‍ടാക്റ്റുകള്‍) താമസിക്കുന്ന സ്ഥലങ്ങള്‍ കണ്ടെത്തിയാണു നിയന്ത്രണം ഏര്‍പ്പെടുത്തിയതെന്നും ഐജിമാരായ വിജയ് സാഖറേ, അശോക് യാദവ് എന്നിവര്‍ അതിനു നിര്‍ദേശങ്ങള്‍ നല്‍കിയിട്ടുണ്ടെന്നുമാണ് പൊലീസിന്റെ വിശദീകരണം.
മന്ത്രിയുടെ അധ്യക്ഷതയില്‍ ചേരുന്ന പ്രതിദിന അവലോകന യോഗത്തില്‍ എസ്പിയോ അദ്ദേഹത്തിന്റെ പ്രതിനിധിയോ പങ്കെടുക്കുന്നില്ല, സമൂഹവ്യാപന സാധ്യതയില്ലെന്നു ഡിഎംഒ റിപ്പോര്‍ട്ട് നല്‍കിയിട്ടുള്ളപ്പോള്‍, ജില്ലയെ കണ്ടയ്ന്റ്‌മെന്റ് സോണുകളാക്കാന്‍ യോഗങ്ങളില്‍ തീരുമാനമില്ലെന്നിരിക്കെ ജില്ലയെ കണ്ടയ്ന്റ്‌മെന്റ് സോണുകളാക്കിയത് എന്തിന്?, ഹോട്‌സ്‌പോട്ടുകളില്‍ കര്‍ശന നിയന്ത്രണം വേണമെന്ന സര്‍ക്കാര്‍ നിര്‍ദേശമിരിക്കെ, അതല്ലാത്ത സ്ഥലങ്ങളില്‍ റോഡുകള്‍ അടച്ചത് എന്താണ് എന്നെല്ലാമുള്ള ഗുരുതരമായ ആരോപണങ്ങളും കലക്ടറുടെ കത്തിലുണ്ട്. കൂടാതെ റോഡുകള്‍ അടിയന്തരമായി തുറക്കണമെന്നും തദ്ദേശ സ്ഥാപന സെക്രട്ടറിയുമായി ആലോചിക്കാതെ മേലില്‍ റോഡുകള്‍ അടയ്ക്കരുതെന്നും കത്തില്‍ ആവശ്യപ്പെട്ടിട്ടുണ്ട്.
ജില്ലാ പൊലീസ് മേധാവി ഉള്‍പ്പെടെ 3 എസ്പിമാരാണു ജില്ലയിലെ റോഡുകളില്‍ ഒരാഴ്ചയായി ഐജിമാരുടെ മേല്‍നോട്ടത്തില്‍, നിയന്ത്രണങ്ങള്‍ക്കു നേതൃത്വം നല്‍കുന്നത്. ഇതും കലക്ടറോട് ആലോചിക്കാതെയാണെന്നു വിവരമുണ്ട്. ആരോഗ്യ വകുപ്പ് അറിയാതെ പൊലീസ് കോവിഡ് രോഗികളുടെ വിവരശേഖരണം നടത്തുന്നത് ആരോഗ്യ വകുപ്പിന്റെയും എതിര്‍പ്പിനു കാരണമായിട്ടുണ്ട്.
ഒടുവില്‍ കണ്ണൂരില്‍ കര്‍ശന നിയന്ത്രണം തുടരുമെന്നു മുഖ്യമന്ത്രി വ്യക്തമാക്കുകയും തര്‍ക്കത്തില്‍ മുഖ്യമന്ത്രിയുടെ ഓഫിസ് ഇടപെടുകയും ചെയ്തതോടെ തങ്ങള്‍ തമ്മില്‍ അഭിപ്രായ വ്യത്യാസമില്ലെന്നു വ്യക്തമാക്കി കലക്ടറും എസ്പിയും രാത്രി സംയുക്ത പ്രസ്താവനയിറക്കി.
https://www.facebook.com/Malayalivartha
