കഴിഞ്ഞ ദിവസമാണ് സംഭവം. മലപ്പുറം ചങ്ങരംകുളത്ത് പ്രണയാഭ്യര്‍ത്ഥന നിരസിച്ചതിന് പെണ്‍കുട്ടിയെ ആക്രമിച്ച കേസിലെ പ്രതി അറസ്റ്റിലായതോടെ പുറത്ത് വരുന്നത് ഞെട്ടിക്കുന്ന വിവരങ്ങളാണ്. ചങ്ങരംകുളം കോക്കൂര്‍ സ്വദേശി ജുനൈദിനെയാണ് പോലീസ് പിടികൂടിയത്. ഇയാളുടെ നിരന്തരമായ ഉപദ്രവത്തെ തുടര്‍ന്ന് പെണ്‍കുട്ടി ആത്മഹത്യക്ക് ശ്രമിച്ചിരുന്നു.

ജുനൈദ് നിരന്തരം പ്രണയാഭ്യര്‍ത്ഥന നടത്തിയിരുന്നെന്നും നിരസിച്ചതിന്റെ പേരില്‍ പല തവണ ശാരീരികമായും മാനസികമായും ആക്രമിച്ചിരുന്നെന്നും പെണ്‍കുട്ടി നേരത്തെ ചങ്ങരംകുളം പൊലീസില്‍ പരാതി നല്‍കിയിരുന്നു.

ഈ കേസില്‍ ഇയാളെ നേരത്തെ അറസ്റ്റ് ചെയ്തതുമാണ്. എന്നാല്‍ ജാമ്യത്തിലിറങ്ങി വീണ്ടും ആക്രമണം തുടരുകയാണെന്ന് കാണിച്ച്‌ പെണ്‍കുട്ടിയുടെ കുടുംബം വീണ്ടും നല്‍കിയ പരാതിയിലാണ് ഇപ്പോള്‍ പൊലീസ് ജുനൈദിനെ പിടികൂടിയിരിക്കുന്നത്. പെണ്‍കുട്ടിക്ക് വരുന്ന വിവാഹ ആലോചനകള്‍ മുടക്കുന്നതായും പരാതിയില്‍ പറയുന്നു.

കഴിഞ്ഞ ദിവസം പെണ്‍കുട്ടിയുടെ വീട്ടിലെത്തിയ ജുനൈദ് കത്തി കഴുത്തില്‍ വെച്ച്‌ കൊല്ലുമെന്ന് ഭീഷണിപ്പെടുത്തി. വിവാഹത്തിന് സമ്മതമാണെന്ന് മൊബൈല്‍ഫോണില്‍ റിക്കോര്‍ഡ് ചെയ്തിരുന്നു.

ഭീഷണിയും മാനസിക പ്രയാസവും സഹിക്കാന്‍ കഴിയാതെയാണ് പെണ്‍കുട്ടി കൈയിലെ ഞരമ്ബ് മുറിച്ച്‌ ജീവനൊടുക്കാന്‍ ശ്രമിച്ചത്. പെണ്‍കുട്ടിയെ പ്രായപൂര്‍ത്തിയാകുന്നതിനു മുമ്ബ് ഉപദ്രവിച്ചതിന്റെ പേരില്‍ ജുനൈദിനെതിരെ പോക്‌സോ കേസും ചങ്ങരംകുളം പോലീസ്റ്റേഷനിലുണ്ട്.