നാലാം ഘട്ട ലോക്ക് ഡൗൺ ഉണ്ടാകാനിരിക്കെ കൊച്ചി മെട്രോ സർവീസ് ആരംഭിക്കാനുള്ള നടപടികളും പുരോഗമിക്കുന്നു . നേരത്തെ കൊവിഡ് പ്രതിരോധ പ്രവർത്തനങ്ങൾ ശക്തിപ്പെടുത്തുന്നതിൻ്റെ ഭാഗമായി നിർത്തിവെച്ചതായിരുന്നു സർവീസ് .ഇനി ആരംഭിക്കുമ്പോൾ കേന്ദ്ര സർക്കാർ നൽകുന്ന ഇളവുകൾക്കനുസരിച്ച് കർശന നിയന്ത്രണങ്ങൾ പാലിച്ചാകും സർവീസ് ആരംഭിക്കുക. എന്ന് മുതലാണ് സർവീസ് ആരംഭിക്കുകയെന്ന കാര്യത്തിൽ വ്യക്തത വന്നിട്ടില്ല.

175 യാത്രക്കാർക്ക് മാത്രമാകും ടിക്കറ്റ് നൽകുക. ടിക്കറ്റിങ്ങിന് കോൺടാക്‌ട് ലെസ് സംവിധാനം ഏർപ്പെടുത്തും. പ്രധാന സ്‌റ്റേഷനുകളിൽ തെർമൽ സ്‌കാനിങ് ക്യാമറയിലൂടെയാകും യാത്രക്കാരെ കടത്തിവിടുക.

പ്രത്യേകമായി സ്ഥാപിച്ചിരിക്കുന്ന പെട്ടിയിൽ പണം ഇടുമ്പോൾ ടിക്കറ്റ് ലഭ്യമാകുണ്ണ രീതിയാണ് അവലംബിക്കുന്നത് . പ്രധാന സ്‌റ്റേഷനുകളായ ഇടപ്പള്ളി, കലൂർ സ്‌റ്റേഡിയം തുടങ്ങിയ പ്രധാന സ്‌റ്റേഷനുകളിൽ ഡിജിറ്റൽ തെർമൽ സ്‌കാനിങ് ക്യാമറയിലൂടെയാകും യാത്രക്കാരെ കടത്തിവിടുക. ഒരാഴ്‌ചയ്‌ക്കുള്ളിൽ മറ്റ് സ്‌റ്റേഷനുകളിലും ഇത് സജ്ജമാക്കും. ഇവിടെയും സമാനമായ രീതിയിൽ പരിശോധനയുണ്ടാകും. ട്രെയിനിലെ താപനില 24 ഡിഗ്രി സെല്‍ഷ്യസിനും 26 ഡിഗ്രി സെല്‍ഷ്യസിനുമിടയില്‍ ക്രമീകരിക്കും.

നാലാംഘട്ട ലോക്ക് ഡൗൺ ഉണ്ടാകുമെന്ന് പ്രധാനമന്ത്രി നരേന്ദ്ര മോദി വ്യക്തമാക്കിയ സാഹചര്യത്തിൽ പൊതുഗതാഗതം തുടങ്ങുന്നത് സംബന്ധിച്ച് ആശയക്കുഴപ്പം നിലനിൽക്കുകയാണ്. പ്രധാനമന്ത്രിയുമായി നടത്തിയ ചർച്ചയിൽ കേരളം വിവിധ ആവശ്യങ്ങൾ ഉന്നയിച്ചിരുന്നു. ഇക്കാര്യങ്ങൾ പാലിച്ചാകും കേരളത്തിൽ ഇളവുകൾ ഉണ്ടാകുക.