സംസ്ഥാനത്ത് കളളുഷാപ്പുകളുടെ പ്രവർത്തനം തുടങ്ങി. പക്ഷേ, ആവശ്യത്തിന് കള്ളെത്താത്തതിനാൽ പകുതിയോളം ഷാപ്പുകൾ മാത്രമാണ് തുറക്കാനായത്.പാഴ്‌സലായി മാത്രമാണ് കള്ള് വാങ്ങാന്‍ സാധിക്കുന്നത്. ലോക്ഡൗണ്‍ നിയന്ത്രണങ്ങളില്‍ ഇളവ് വരുത്തിയതിനെ തുടര്‍ന്നാണ് ഇന്നു മുതല്‍ കള്ള് ഷാപ്പ് തുറന്നു പ്രവര്‍ത്തിപ്പിക്കാമെന്ന തീരുമാനത്തിൽ സര്‍ക്കാര്‍ എത്തിയത് . ഒരു കുപ്പി കള്ളിന് 120 രൂപയാണ് നിലവിലെ വില. 50 ദിവസത്തിന് ശേഷമാണ് ഷാപ്പുകള്‍ തുറന്നത് എങ്കിലും ആകെയുള്ള ഷാപ്പുകളില്‍ പകുതി മാത്രമാണ് ഇന്ന് പ്രവര്‍ത്തിക്കുന്നത്. പലയിടത്തും തുറന്ന് ആദ്യമണിക്കൂറില്‍ തന്നെ കള്ള് തീരുകയുംചെയ്തു. .

നിലവിലെ തീരുമാനമനുസരിച്ച് ഒരാള്‍ക്ക് പരമാവധി ഒന്നര ലിറ്റര്‍ കള്ളാണ് ലഭിക്കുക. രാവിലെ ഒമ്പതു മുതല്‍ വൈകിട്ട് ഏഴു മണി വരെയാണ് കള്ള് ഷാപ്പുകള്‍ തുറന്നു പ്രവര്‍ത്തിക്കുന്നത്. ഉപഭോക്താക്കളും കള്ള് ഷാപ്പിലെ ജീവനക്കാരും മാസ്‌കുകള്‍ ധരിക്കുകയും സാമൂഹിക അകലമടക്കം സര്‍ക്കാര്‍ നിഷ്‌കര്‍ഷിക്കുന്ന നിബന്ധനകള്‍ പാലിക്കുകയും ചെയ്യണം. വില്‍പ്പനക്കാര്‍ കൈയുറകളും ധരിക്കേണ്ടതുണ്ട്. സർക്കാർ നിർദേശമനുസരിച്ച് അഞ്ചു പേരില്‍ കൂടുതല്‍ ക്യൂവില്‍ നില്‍ക്കാന്‍ പാടില്ല. ഷാപ്പില്‍ ഇരുന്നുള്ള മദ്യപാനം അനുവദിക്കില്ല. ഷാപ്പില്‍ ഭക്ഷണം ഉണ്ടാക്കാനോ വിതരണം ചെയ്യാനോ പാടില്ല. കള്ള് വാങ്ങാനെത്തുന്നവര്‍ കുപ്പികള്‍ കൊണ്ടുവരണം തുടങ്ങിയ നിബന്ധനകളോടെയാണ് കള്ള് ഷാപ്പുകള്‍ തുറന്നു പ്രവര്‍ത്തിക്കുന്നത്.

അതേ സമയം, പലയിടത്തും നാടന്‍ കള്ളിന്റെ ലഭ്യതയില്‍ കുറവുണ്ടായതായും റിപ്പോര്‍ട്ടുകളുണ്ട്. നിയന്ത്രണങ്ങള്‍ നിലനിന്നിരുന്നതിനാല്‍ വൈകി മാത്രമാണ് കള്ള് ചെത്ത് പുനരാരംഭിച്ചത് 100 ലിറ്റര്‍ വരെ വില്‍പ്പന നടത്തിയിരുന്ന ഷാപ്പുകളില്‍ 10 ലിറ്റര്‍ പോലും ലഭ്യതയുണ്ടാവുമോ എന്നും സംശയമുണ്ട്. പാലക്കാട് നിന്നു വരുന്ന കള്ളിലാണ് ഇപ്പോള്‍ പ്രതീക്ഷയത്രയും എന്നാണ് റിപ്പോര്‍ട്ടുകള്‍ പറയുന്നത്. പാലക്കാടു നിന്നെത്തുന്ന കള്ള് എക്‌സൈസ് വകുപ്പിന്റെ കര്‍ശന പരിശോധനയ്ക്ക് ശേഷമാകും വില്‍പ്പനയ്ക്കായി അനുവദിക്കുക. അതേ സമയം, പാലക്കാട് നിന്ന് സാധാരണ എത്തുന്ന കള്ളിന്റെ പത്തിലൊന്ന് മാത്രമാണ് ഇന്ന് എത്തിയിരിക്കുന്നത്.

പല ജില്ലകളിലും തുറന്ന ഉടന്‍ തന്നെ കള്ള് തീരുന്നു എന്ന റിപ്പോര്‍ട്ടുകളും പുറത്തു വരുന്നുണ്ട്. ലോക്ഡൗണ്‍ കാരണം ലേലംവിളി പൂര്‍ത്തിയാവാത്തതും ലൈസന്‍സ് പ്രശ്‌നങ്ങളും ഇതോടൊപ്പം നിലനില്‍ക്കുന്നുണ്ട്. കഴിഞ്ഞ വര്‍ഷം 5,500 ഷാപ്പുകള്‍ സംസ്ഥാനത്ത് തുറന്നു പ്രവര്‍ത്തിച്ചിരുന്നുവെങ്കില്‍ ലോക്ഡൗണ്‍ ആരംഭിക്കുന്നതിന് മുമ്പ് 65 ശതമാനം ലൈസന്‍സുകളുടെ മാത്രം ലേലം വിളിയാണ് നടന്നിട്ടുള്ളത്. ഇതിനിടയില്‍ ലോക്ഡൗണ്‍ പ്രഖ്യാപിച്ചതിനാല്‍ ഇതില്‍ തന്നെ പലരും നടപടിക്രമങ്ങള്‍ പൂര്‍ത്തിയാക്കിയിട്ടില്ല.

പത്തനംതിട്ടയില്‍ ഷാപ്പുകള്‍ തുറന്നില്ല എന്നാണ് പ്രാഥമിക റിപ്പോര്‍ട്ടുകള്‍. 559 ഷാപ്പുകളുള്ള എറണാകുളം ജില്ലയിലാകട്ടെ മുപ്പതോളം ഷാപ്പുകള്‍ മാത്രമേ തുറന്നുള്ളൂ എന്നും വിവരമുണ്ട്. കള്ളുത്പാദനം പ്രധാനമായി നടക്കുന്ന പാലക്കാട് ജില്ലയില്‍ ആകെയുള്ള 805 ഷാപ്പുകളില്‍ 530 ഷാപ്പുകള്‍ തുറന്നു. അതേ സമയം, ഇവിടെയും കള്ളിന്റെ ലഭ്യതക്കുറവ് റിപ്പോര്‍ട്ട് ചെയ്തിട്ടുണ്ട്. തെങ്ങുകള്‍ ചെത്തിത്തുടങ്ങിയിട്ട് ഏതാനും ദിവസങ്ങള്‍ മാത്രമേ ആയിട്ടുള്ളൂ എന്നതിനാലും നാല്‍പ്പത് ദിവസമെങ്കിലുമെടുക്കും പൂര്‍ണ ഉത്പാദനം നടക്കാനുമെന്നുമാണ് തൊഴിലാളികള്‍ പറയുന്നത്. ലോക്ഡൗണ്‍ കാരണം, തൊഴിലാളികളെ ലഭ്യമല്ലാത്തതും കാരണമാണ്.

ഇപ്പോള്‍ കള്ളുഷാപ്പുകള്‍ക്ക് മാത്രമാണ് തുറന്നു പ്രവര്‍ത്തിപ്പിക്കാന്‍ അനുമതിയുള്ളത്. ബിവ്‌റേജ് ഷോപ്പുകള്‍, ബാറുകള്‍ തുടങ്ങിയവയ്ക്ക് അനുമതി ഇല്ലാത്തതിനാല്‍ ഷാപ്പുകളില്‍ എത്തുന്നവരുടെ എണ്ണവും വർധിച്ചിട്ടുണ്ട്.. ഈ സാഹചര്യം മുതലെടുത്ത് വ്യാജ കള്ള് എത്താനുള്ള സാധ്യതകളും നിലനില്‍ക്കുന്നുണ്ട്. ഔട്ലെറ്റുകൾ തുറക്കുമ്പോൾ വെര്‍ച്വല്‍ ക്യൂ സംവിധാനം ഏര്‍പ്പെടുത്താന്‍ ബിവറേജസ് കോര്‍പറേഷന്‍ സ്റ്റാര്‍ട്ടപ് മിഷന്റെ സഹായം തേടിയിട്ടുണ്ട്. മൊബൈല്‍ ആപ് വഴിയും സ്മാര്‍ട്ട ഫോണ്‍ ഇല്ലാത്തവര്‍ക്ക് എസ്എംഎസ് അയച്ചും മദ്യം ബുക്ക് ചെയ്യാവുന്ന വിധത്തിലാണ് സംവിധാനം ഒരുക്കുക.