കോഴിക്കോട് നഗരവാസികള്‍ കുറേക്കാലമായി ഒരു 'ചൈനീസ്' സംഗതി ജില്ലയിലെത്താന്‍ കാത്തിരിക്കയായിരുന്നു. അതിര്‍ത്തിയിലെ സംഘര്‍ഷത്തെ തുടര്‍ന്ന് ചൈനീസ് സാധനങ്ങള്‍ ബഹിഷ്‌ക്കരിക്കണമെന്ന മുറവിളി ഉയര്‍ന്നപ്പോള്‍ അവരുടെ ഉള്ളൊന്നു കാളി. കാരണം ഇന്‍ഡോര്‍ സ്റ്റേഡിയത്തിനു മുന്നില്‍ നിന്ന് രാജാജി റോഡിനുമുകളിലൂടെ പുതിയ സ്റ്റാന്‍ഡിലേക്കു നിര്‍മിക്കുന്ന നടപ്പാലത്തിനുള്ള എസ്‌കലേറ്ററും ലിഫ്റ്റും അനുബന്ധ ഉപകരണങ്ങളും ചൈനയിലെ ഷാങ്ഹായില്‍ നിന്നാണ് എത്തേണ്ടിയിരുന്നത്. അവ എത്തിയതോടെ റോഡിനു കുറുകെ നടപ്പാലത്തിനുള്ള പ്ലാറ്റ്‌ഫോം ഇന്നലെ സ്ഥാപിച്ചു. വൈകാതെ ലിഫ്റ്റും സ്ഥാപിക്കും.

കോവിഡ് കാലത്ത് പാടേ മുടങ്ങിയ 'അമൃത്' നിര്‍മാണപ്രവൃത്തി വീണ്ടും സജീവമാവുകയാണ്. അരയിടത്തുപാലത്തിനു സമീപമുള്ള ഓടനിര്‍മാണം ഇതിനിടെ ഉഷാറായി. പക്ഷേ, 116 കോടി രൂപയുടെ മലിനജല നിര്‍മാര്‍ജന പദ്ധതിക്കു മാത്രം പ്രതീക്ഷയില്ല. ടെന്‍ഡറിന് എത്തിയ കമ്പനി, ആവശ്യപ്പെട്ടിരിക്കുന്ന ഉയര്‍ന്ന തുകയില്‍ ഒരു മാറ്റവും വരുത്താന്‍ തയാറാവാത്തതോടെ നാലാംതവണ റീടെന്‍ഡറിലേക്കു നീങ്ങുകയാണ് പദ്ധതി. 3 ദിവസത്തിനുള്ളില്‍ ഇക്കാര്യത്തില്‍ തീരുമാനമാവും.

'അമൃത് 'ഫണ്ടില്‍ പെടുത്തി നഗരത്തില്‍ നടപ്പാക്കുന്ന പദ്ധതികള്‍ ഏറെക്കുറെ നല്ല രീതിയില്‍ പുരോഗമിക്കുന്നുണ്ടെന്നാണു വിലയിരുത്തല്‍. വലിയ പദ്ധതിയായ മലിനജല നിര്‍മാണ പദ്ധതി ഒഴിച്ചുനിര്‍ത്തിയാല്‍ മറ്റുള്ളവ 80% പൂര്‍ത്തീകരിച്ചു. ഈ വര്‍ഷം തന്നെ പാര്‍ക്കുകള്‍, ഓടകള്‍, നടപ്പാത, പാലം എന്നിവ പൂര്‍ത്തീകരിക്കാന്‍ സാധിക്കുമെന്നാണ് പ്രതീക്ഷ.

ഇന്‍ഡോര്‍ സ്റ്റേഡിയത്തിനു മുന്നില്‍ നിന്ന് പുതിയ സ്റ്റാന്‍ഡിലേക്കെത്താനാകും വിധമാണ് 11.35 കോടി ചെലവില്‍ എസ്‌കലേറ്ററും നടപ്പാലവും നിര്‍മിക്കുന്നത്. ഷിന്‍ഡ്ലര്‍ കമ്പനിയുടെതാണ് എസ്‌കലേറ്റര്‍. ലിഫ്റ്റ് ജോണ്‍സണിന്റെയും. നടപ്പാലം സ്ഥാപിച്ചു കഴിഞ്ഞാല്‍ ഇനി എസ്‌കലേറ്റര്‍, ലിഫ്റ്റ് എന്നിവയുടെ പണി തുടങ്ങും. ലിഫ്റ്റില്‍ 13 പേര്‍ക്കു കയറാം. എസ്‌കലേറ്ററില്‍ മണിക്കൂറില്‍ 11,700 പേര്‍ക്ക് പോകാം. നടപ്പാലത്തില്‍ 300 പേര്‍ക്കും ഒരേ സമയം കയറാം.

കൃത്യമായ പഠനങ്ങള്‍ നടത്താതെ തയാറാക്കിയ റിപ്പോര്‍ട്ടുമായി പണികള്‍ തുടങ്ങിയതാണ് കുരുക്കാവുന്നത്. 3 അടി വീതിയില്‍ ഓട നിര്‍മിച്ച് അവസാനിക്കാറായപ്പോള്‍ ഭൂമി ലഭിക്കുന്നില്ല. വീടുകളും സ്ഥാപനങ്ങളും പൊളിക്കണമെന്നതാണ് സ്ഥിതി. ഓട നിര്‍മാണം 80% പൂര്‍ത്തിയായി. ശേഷിക്കുന്ന 20% ജോലികളായിരിക്കും ഏറ്റവും പ്രതിസന്ധി നേരിടുന്നത്. ഫണ്ട് ഇല്ലാത്തതിനാല്‍ നഷ്ടപരിഹാരം കൊടുക്കാനും സാധിക്കില്ല.

ഓടയുടെ വീതി ഇങ്ങനെ പലയിടത്തും രണ്ട് അടിയായി കുറച്ചിട്ടുണ്ട്. ഇത് ഭാവിയില്‍ വ്യാപക വെള്ളക്കെട്ടിനും കാരണമായേക്കും. കാസര്‍കോട്ടെ സ്ഥാപനമാണ് ഓട നിര്‍മാണം ഏറ്റെടുത്തിരുന്നത്. ഇവര്‍ പുറംകരാര്‍ നല്‍കിയതോടെ പണികള്‍ മുടങ്ങി. വീണ്ടും കമ്പനിക്കാരുടെ ചെവിക്കു പിടിച്ച് 8 മാസം മുന്‍പ് നിര്‍മാണം ഏറ്റെടുപ്പിച്ചു. അതിനു ശേഷം ഓട നിര്‍മാണം 80% വരെ പൂര്‍ത്തിയായിട്ടുണ്ടെന്നാണ് വിലയിരുത്തല്‍.

എട്ട് പാര്‍ക്കുകളില്‍ 4 എണ്ണം പൂര്‍ത്തിയായി. 3 എണ്ണത്തില്‍ ഇലക്ട്രിക്കല്‍ ജോലികള്‍ ബാക്കിയുണ്ട്. ലൈറ്റുകള്‍ ലഭിക്കുന്നതിലെ കാലതാമസം മൂലം പണി വൈകുന്നു. മെഡിക്കല്‍ കോളജില്‍ 14.5 കോടിയുടെ മലിനജല സംസ്‌കരണ പ്ലാന്റിലെ ഇലക്ട്രോ കൊയാഗുലേഷന്‍ സാങ്കേതിക വിദ്യയ്ക്ക് മലിനീകരണ നിയന്ത്രണ ബോര്‍ഡിന്റെ അനുമതി ലഭിച്ചു. ഇനി നിര്‍മാണം വേഗത്തിലാവുമെന്ന് പ്രതീക്ഷ.

യാഥാര്‍ഥ്യവുമായി ഒരുതരത്തിലും പൊരുത്തപ്പെടാത്ത എസ്റ്റിമേറ്റ് ആണ് പദ്ധതിക്ക് തയാറാക്കിയിരിക്കുന്നതെന്ന് കമ്പനിക്കാര്‍. 116 കോടിയുടെ പദ്ധതിക്ക് മലപ്പുറം കമ്പനി ആവശ്യപ്പെട്ടിരിക്കുന്നത് 175 കോടിയാണ്. ഉയര്‍ന്ന തുക സംബന്ധിച്ച തര്‍ക്കം പരിഹരിക്കാന്‍ സെക്രട്ടറിയെ സര്‍ക്കാര്‍ ചുമതലപ്പെടുത്തി. ചര്‍ച്ചയ്ക്ക് സാധ്യതയുമില്ലെന്നാണ് കമ്പനിയുടെ പ്രതികരണം. 3 ദിവസത്തിനുള്ളില്‍ പരിഹാരം ഉണ്ടായില്ലെങ്കില്‍ പദ്ധതി നാലാം തവണയും റീടെന്‍ഡറിനു തീരുമാനിക്കും.