ഉറവിടം കണ്ടെത്താനാകാത്ത കേസുകൾ കേരളത്തിൽ വർധിക്കുന്നു. അതുകൊണ്ടു തന്നെ ഏത് നിമിഷവും സമൂഹ വ്യാപനം സംഭവിക്കാമെന്ന മുന്നറിയിപ്പുമായി ആരോഗ്യ മന്ത്രി കെ കെ ഷൈലജ. തലസ്ഥാനം ഉൾപ്പെടെ ആറ് ജില്ലകൾ ഇപ്പോൾ അതീവ ജാഗ്രതയിലാണ് . ഉറവിടം അറിയാത്ത കേസുകൾ വർധിക്കുന്ന സാഹചര്യത്തിലാണ് ഇത്തരത്തിൽ ഒരു വെല്ലുവിളി മുന്നിൽ ഉയർന്ന്‌ നിൽക്കുന്നത്. കേരളവും സമൂഹ വ്യാപന സാധ്യത തള്ളി കളയാനാകില്ലെന്നും മന്ത്രി പറഞ്ഞു . മാത്രമല്ല ഇപ്പോൾ തലസ്ഥാനത്തും അതീവ ജാഗ്രത തുടരുകയാണ്. മറ്റ് സംസ്ഥാങ്ങളിൽ നിന്ന് വരുന്നവർ ഇവിടെ കൂടുതലാണ്. അതുകൊണ്ടു തന്നെ അതീവ ജാഗ്രത പുലർത്തണമെന്ന കർശന നിർദേശമാണ് ഇപ്പോൾ ആരോഗ്യമന്ത്രി തന്നിരിക്കുന്നത്.

മാത്രമല്ല സംസ്ഥാനത്ത് കോവിഡ് നിയന്ത്രണങ്ങള്‍ കര്‍ശനമായി പാലിക്കുന്നുവെന്ന് ഉറപ്പുവരുത്താന്‍ കര്‍ശന നടപടിയുമായി പൊലീസും രംഗത്ത് ഉണ്ട് . ഇനി ബോധവല്‍ക്കരണമില്ലെന്നും കേസെടുക്കുമെന്ന് സംസ്ഥാന പൊലീസ് മേധാവി ലോക്നാഥ് ബെഹ്റ പറഞ്ഞു. അറസ്റ്റും പിഴയും ഉണ്ടാവും. പൊലീസ് കുറച്ചു ഇളവ് നല്‍കിയതിനാല്‍ നിയന്ത്രണങ്ങള്‍ കര്‍ശനമായി നടപ്പാക്കാന്‍ കഴിഞ്ഞിട്ടില്ല. ഇനി അതുണ്ടാവില്ലെന്നും കണ്ടെയ്ന്‍‍മെന്‍റ് സോണുകളിലും ക്വാറന്‍റീനിലുള്ളവരെയും കര്‍ശനമായി നിരീക്ഷിക്കുമെന്നും അദ്ദേഹം പറഞ്ഞു. കോവിഡ് പ്രതിരോധ പ്രവര്‍ത്തനങ്ങളില്‍ വ്യാഴാഴ്ച മുതല്‍ കൂടുതല്‍ പൊലീസുകാര്‍ രംഗത്തുണ്ടാകും. സാങ്കേതിക വിഭാഗത്തിലേത് ഉള്‍പ്പെടെ 90 ശതമാനം പൊലീസുകാരും കോവിഡ് ഡ്യൂട്ടിക്കിറങ്ങും. എല്ലാവരോടും രാവിലെ ജില്ലാ പൊലീസ് മേധാവികള്‍ക്കുമുന്നിൽ റിപ്പോര്‍ട്ട് ചെയ്യാന്‍ ആവശ്യപ്പെട്ടിരുന്നു. പൊലീസ് വിന്യാസ ചുമതല ബറ്റാലിയന്‍ എഡിജിപിക്കായിരിക്കും. സംസ്ഥാനത്ത് കോവിഡ് രോഗികളുടെ എണ്ണം കുതിച്ചുയരുന്നതിന് തടയിടാന്‍ കര്‍ശന നടപടികൾ സ്വീകരിക്കും.