കോവിഡ് കാലത്ത് അതിഥിതൊഴിലാളികളുടെ പരിപാലനത്തിനായി തദ്ദേശ സ്ഥാപനങ്ങള്‍ ചെലവഴിക്കുന്ന തുക ഇനി മുതല്‍ പി.എം കെയര്‍ അക്കൗണ്ടില്‍ നിന്നുമായിരിക്കണമെന്ന് ദുരന്തനിവാരണ വകുപ്പ്. ഇതുസംബന്ധിച്ചുള്ള സര്‍ക്കാര്‍ ഉത്തരവ് പുറത്തിറങ്ങി. കോവിഡിനെ തുടര്‍ന്ന് നിയന്ത്രണങ്ങള്‍ ഏര്‍പ്പെടുത്തിയതിനെ തുടര്‍ന്ന് അതിഥിതൊഴിലാളികള്‍ക്ക് തൊഴില്‍ നഷ്ടമായിരുന്നു. തുടര്‍ന്ന് തദ്ദേശ സ്വയം ഭരണ സ്ഥാപനങ്ങളുടെ സഹകരണത്തോടെയാണ് ഇവര്‍ക്ക് ഭക്ഷണവും മറ്റു അടിസ്ഥാന സൗകര്യങ്ങളും ഏര്‍പ്പെടുത്തിയത്. ഈ തുക തദ്ദേശ ഭരണസ്ഥാപനങ്ങള്‍ ഏതു ഫണ്ടില്‍ നിന്നും വകമാറ്റുമെന്നത് സംബന്ധിച്ച് ധാരണയുണ്ടായിരുന്നില്ല. ഇതാണ് പുതിയ ഉത്തരവിലൂടെ വ്യക്തമാക്കുന്നത്.
നിയന്ത്രണങ്ങള്‍ പ്രാബല്യത്തില്‍ വന്ന മാര്‍ച്ച് 17 മുതല്‍ ഈ മാസം 18 വരെയുള്ള ചിലവുകള്‍ സംസ്ഥാന ദുരന്ത നിവാരണ ഫണ്ടില്‍ നിന്നും നല്‍കും. അതിന് ശേഷമുള്ള തുകയാണ് പി.എം കെയര്‍ അകൗണ്ടില്‍ നിന്നും കണ്ടെത്താന്‍ ദുരന്ത നിവാരണ അതോറിറ്റി തീരുമാനിച്ചത്. ചിലവ് സംബന്ധിച്ചുള്ള രേഖകള്‍ അസിസ്റ്റന്റ് ലേബര്‍ ഓഫീസര്‍മാരുടെയും തദ്ദേശ സ്വയം ഭരണ സ്ഥാപനങ്ങളിലെ സെക്രട്ടറിമാരുടെയുെ നേതൃത്വത്തില്‍ തയാറാക്കി ദുരന്ത നിവാരണ ചുമതലയുള്ള ഡെപ്യൂട്ടി കലക്ടര്‍ക്ക് സമര്‍പ്പിക്കേണ്ടത്. 15 ദിവസത്തിനുള്ളില്‍ ഫണ്ട് അനുവദിക്കേണ്ടതാണെന്നും ഉത്തരവില്‍ വ്യക്തമാക്കുന്നു.
ഇതിന് പുറമേ ഇന്‍സ്റ്റിട്യൂഷന്‍ ക്വാറന്റീന് ഫണ്ട് അനുവദിക്കുന്നതു സംബന്ധിച്ചുള്ള വ്യക്തയും ഉത്തരവിലുണ്ടായിരുന്നു. ജില്ലാദുരന്ത നിവാരണ അതോറിറ്റിയുടെ അനമുതിയോടെ 50 ശതമാനം ചിലവ് തദ്ദേശ സ്വയം ഭരണസ്ഥാപനം വഹിക്കമെന്നാണ് ഉത്തരവില്‍ വ്യക്തമാക്കുന്നത്. കൂടാതെ തദ്ദേശ സ്ഥാപനങ്ങള്‍ അനുവദിക്കുന്ന ക്വാറന്റീന്‍ സമ്മതിച്ച് വ്യക്തമായ നിര്‍ദേശവും ദുരന്ത നിവാരണ വകുപ്പ് ഇറക്കിയ ഉത്തരവിലുണ്ട്.