നെയ്യാറ്റിന്‍കര നഗരസഭയില്‍ സി.പി.എം -കോണ്‍ഗ്രസ് സംഘര്‍ഷം. രാവിലെ 11 മണിയോടെയായിരുന്നു സംഘര്‍ഷം ആരംഭിച്ചത്. നഗരസഭയക്കെതിരെയുള്ള അഴിമതി ആരോപണങ്ങള്‍ ചൂണ്ടിക്കാട്ടി യൂത്ത് കോണ്‍ഗ്രസ് മൂന്ന് ദിവസത്തോളമായി സമരം നടത്തിവരുകയായിരുന്നു. ഇതിന്റെ ഭാഗമായിട്ടാണ് ഇന്ന് സംഘര്‍ഷം നടന്നത്.
യൂത്ത് കോണ്‍ഗ്രസ് നടത്തിവന്നിരുന്ന ഉപവാസസമരം ഉദ്ഘാടനം ചെയ്ത് മുന്‍ കെപിസിസി അധ്യക്ഷന്‍ എം.എം ഹസന്‍ മടങ്ങിയതോടെതാണ് സംഭവങ്ങള്‍ക്ക് തുടക്കമായത്. യൂത്ത് കോണ്‍ഗ്രസ് പ്രവര്‍ത്തകര്‍ നഗരസഭ ചെയര്‍പേഴ്‌സണ്‍ ഡബ്യൂ.ആര്‍ ഹീബ രാജിവയ്ക്കണമെന്ന ആവശ്യവുമായി നഗരസഭാ കവാടവും റോഡും ഉപരോധിക്കുകയായിരുന്നു. പ്രതിഷേധക്കാരെ പോലീസെത്തി അറസ്റ്റ് ചെയ്ത് നീക്കി. ഇതിനിടയില്‍ കൗണ്‍സില്‍ കഴിഞ്ഞ പുറത്തിറങ്ങിയ ഡബ്യൂ.ആര്‍ ഹീബയെ നഗരസഭാ പ്രതിപക്ഷ നേതാവും കൂട്ടപ്പന വാര്‍ഡ് കൗസിലറുമായ ലളിത കയ്യേറ്റം ചെയ്യുകയായിരുന്നു. തുടര്‍ന്ന് പരസ്പരം ഉന്തും തള്ളും ആയതോടെ ഇരുവരും നിലത്തുവീണു. പരിക്കേറ്റ ഇരുവരെയും ആദ്യം നെയ്യാറ്റിന്‍കര ജനറല്‍ ആശുപത്രിയില്‍ പ്രവേശിപ്പിച്ച ശേഷം തിരുവനന്തപുരം ജനറല്‍ ആശുപത്രിയിലേക്ക് കൊണ്ടുപോയി.
കഴിഞ്ഞ കുറെ നാളുകളായി നെയ്യാറ്റികരയില്‍ നിലനിന്നിരുന്ന സിപിഎം-കോണ്‍ഗ്രസ് പോര് ഇതോടെ രൂക്ഷമായി. ചെയര്‍പേഴ്‌സണ് നേരെ നടന്ന അക്രമണത്തിനെതിരെ ശക്തമായ ഭാഷയിലാണ് സി.പി.എം പ്രതികരിച്ചത്. ഇനി സംഘര്‍ഷ സാധ്യത കണക്കിലെടുത്ത് നെയ്യാറ്റിന്‍കര ഡിവൈഎസ്പി എസ്. അനില്‍കുമാറിന്റെ നേതൃത്വത്തിലുള്ള സംഘം സ്ഥലത്ത് ക്യാമ്പു ചെയ്യുകയാണ്. പ്രതിഷേധ സമരം നടത്തിയ യൂത്ത് കോണ്‍ഗ്രസ് നേതാക്കള്‍ക്കെതിരെ പോലീസ് കേസെടുത്തിട്ടുണ്ട്.