വിദേശത്ത് നിന്നെത്തി നിരീക്ഷണത്തിലായിരിക്കെ മരിച്ച യുവാവിന് കൊവിഡ് ബാധയില്ലെന്ന് റിപ്പോർട്ട്. ഇന്നലെ കോട്ടയം മെഡിക്കല്‍ കോളേജ് ആശുപത്രിയില്‍ വച്ച് കോട്ടയം കുറുമുള്ളൂര്‍ സ്വദേശി മഞ്ജുനാഥാണ് (39) മരണമടഞ്ഞത്. ഇദ്ദേഹത്തിന്റെ സാമ്ബിള്‍ പരിശോധനാഫലം ഇന്ന് രാവിലെയാണ് ലഭിച്ചത്.

അതേസമയം മഞജുനാഥിന് ചികിത്സ വൈകിയെന്ന് ബന്ധുക്കൾ ആരോപിച്ചിരുന്നു. എന്നാൽ രണ്ട് രോഗികള്‍ ഒരേ സമയം എത്തിയപ്പോള്‍ സ്വാഭാവിക കാലതാമസം മാത്രമാണ് ഉണ്ടായതെന്നാണ് മെഡിക്കല്‍ കോളേജ് ആശുപത്രി നല്‍കുന്ന വിശദീകരണം.

മഞ്ജുനാഥിനെ അബോധാവസ്ഥയില്‍ കണ്ടയുടന്‍ വീട്ടുകാര്‍ പ്രാഥമിക ആരോഗ്യ കേന്ദ്രത്തില്‍ അറിയിച്ചിരുന്നു. ആരോഗ്യ വകുപ്പ് അധികൃതര്‍ വീട്ടില്‍ എത്തിയെങ്കിലും യുവാവ് നിരീക്ഷണത്തിലായതിനാല്‍ മെഡിക്കല്‍ കോളജില്‍ കൊണ്ടുപോകണമെന്ന് നിര്‍ദേശിച്ചു. മെഡിക്കല്‍ കോളേജിലേക്ക് കൊണ്ടുപോകാനായി രാവിലെ അറിയിച്ചെങ്കിലും വൈകിട്ട് നാലോടെയാണ് ആംബുലന്‍സ് എത്തിയതെന്നായിരുന്നു ബന്ധുക്കളുടെ ആരോപണം.

21ന് ദുബായില്‍ നിന്നെത്തിയ മഞ്ജുനാഥ് വീട്ടില്‍ ഒറ്റ‌യ്ക്ക് നിരീക്ഷണത്തില്‍ കഴിയുകയായിരുന്നു. ഇന്നലെ രാവിലെ പത്ത് മണിക്ക് സഹോദരന്‍ ഭക്ഷണവുമായി എത്തിയപ്പോള്‍ നേരത്തേ നല്‍കിയ ഭക്ഷണം എടുക്കാത്തത് ശ്രദ്ധയില്‍പെട്ടു. തുടര്‍ന്നു പരിശോധിച്ചപ്പോൾ അബോധാവസ്ഥയില്‍ കണ്ടെത്തുകയായിരുന്നു.