കോവിഡ് പ്രതിരോധ നടപടികള്‍ ലംഘിക്കുന്നവരുടെ് അറസ്റ്റ് രേഖപ്പെടുത്തിയശേഷം വിട്ടയയ്ക്കും. പിന്നീടു കേസ് കോടതിയില്‍ ഫയല്‍ ചെയ്യും. കുറ്റത്തിന്റെ ഗൗരവമനുസരിച്ച് 10,000 രൂപ വരെ പിഴ ലഭിക്കാം. പിഴയടച്ചില്ലെങ്കില്‍ തടവുശിക്ഷ അനുഭവിക്കണം.

രാത്രി 9-നു ശേഷം അനധികൃതമായി പുറത്തിറങ്ങുക, വ്യാപാര സ്ഥാപനങ്ങളില്‍ സാനിറ്റൈസറോ കൈ കഴുകുന്നതിനുള്ള സംവിധാനമോ ഏര്‍പ്പെടുത്താതിരിക്കുക, നിര്‍ദേശിച്ചതില്‍ കൂടുതല്‍ ആളുകളെ കടയില്‍ കയറ്റുക, ക്വാറന്റീന്‍ ലംഘനം,അകലം പാലിക്കാതെയുള്ള കൂട്ടം ചേരല്‍, വാഹനങ്ങളില്‍ അധികം യാത്രക്കാരെ കയറ്റുക തുടങ്ങിയ നിയമ ലംഘനങ്ങള്‍ക്കാണ് നടപടി.

വിവാഹത്തിനു പരമാവധി 50 പേരും മരണത്തിന് 20 പേരുമാകാം. മാസ്‌ക് ധരിക്കാതെ പുറത്തിറങ്ങിയാല്‍ ആദ്യം 200 രൂപ പിഴ. വാഹനത്തില്‍ സഞ്ചരിക്കുമ്പോഴും മാസ്‌ക് നിര്‍ബന്ധം. കടകളില്‍ പരമാവധി 5 പേര്‍ക്ക് ഒരേ സമയം കയറാം. വലിയ കടകളില്‍ വിസ്തീര്‍ണത്തിന്റെ അടിസ്ഥാനത്തില്‍ ഇളവുണ്ട്. കാറുകളില്‍ ഡ്രൈവറടക്കം 4 പേര്‍ക്കു വരെ സഞ്ചരിക്കാം. ഇരുചക്ര വാഹനത്തില്‍ കുടുംബാംഗമാണെങ്കില്‍ 2 പേര്‍. കൂടുതല്‍ ആളെ കയറ്റുന്ന വാഹന ഉടമയ്‌ക്കെതിരെ കേസെടുത്തു വാഹനം പിടിച്ചെടുക്കും.

കണ്ടെയ്ന്‍മെന്റ് സോണില്‍ നിന്നു പുറത്തേക്കും അകത്തേക്കും പ്രവേശനമില്ല. സംസ്ഥാനം നേരത്തെ കൊണ്ടു വന്ന ഓര്‍ഡിനന്‍സിന്റെ അടിസ്ഥാനത്തില്‍ കൂടിയ പിഴ ഈടാക്കുന്നതില്‍ ആശയക്കുഴപ്പമുണ്ട്. കേന്ദ്ര നിയമത്തില്‍ ഇതിലും കുറഞ്ഞ തുകയാണു പിഴയെന്നു ചൂണ്ടിക്കാണിക്കപ്പെടുന്നു. കേന്ദ്ര സംസ്ഥാന നിയമങ്ങള്‍ തമ്മില്‍ വൈരുധ്യം വന്നാല്‍ കേന്ദ്ര നിയമം ആണു ബാധകം. ഈ സാഹചര്യത്തിലാണ് ആശയക്കുഴപ്പം.

തിരുവനന്തപുരം സിറ്റി പൊലീസ് , ക്വാറന്റീന്‍ ലംഘിച്ചതിന് കഴിഞ്ഞ 19 വരെ 13 കേസുകള്‍ റജിസ്റ്റര്‍ ചെയ്തിട്ടുണ്ട്. പത്തനംതിട്ട ജില്ലയില്‍ ഇതുവരെ 76 പേര്‍ക്കെതിരെ കേസെടുത്തു. ഇടുക്കി ജില്ലയില്‍ ഇന്നലെ മാത്രം138 പേര്‍ക്കെതിരെ കേസുണ്ടായി. എറണാകുളം ജില്ലയില്‍ 214 പേര്‍ക്കെതിരെ കേസെടുത്തു, 165 പേര്‍ അറസ്റ്റിലായി. 42 വാഹനങ്ങളും പിടിച്ചെടുത്തു.പാലക്കാട് 715 പേര്‍ക്കു പൊലീസ് നോട്ടീസ് നല്‍കി. 64 കേസുകള്‍ റജിസ്റ്റര്‍ ചെയ്തിട്ടുണ്ട്. 14 വാഹനങ്ങളും പിടിച്ചെടുത്തു. കാസര്‍കോട് ജില്ലയില്‍ 838 കേസുകളാണു റജിസ്റ്റര്‍ ചെയ്തത്.