പെരുവണ്ണാമൂഴി ഫോറസ്റ്റ് സ്റ്റേഷന്‍ അധികൃതര്‍, കാട്ടിറച്ചി പിടികൂടിയ സംഭവവുമായി ബന്ധപ്പെട്ട കേസിന്റെ മൊഴിയില്‍ പേര് സൂചിപ്പിച്ചിരുന്ന യുവാവിനെ അന്വേഷണത്തിന്റെ ഭാഗമായി ചോദ്യം ചെയ്യാന്‍ കസ്റ്റഡിയില്‍ എടുത്തതിനെ തുടര്‍ന്ന് യുവാവിന്റെ അമ്മ അല്ലിറാണിയും ഭാര്യ അനുഷയും ഫോറസ്റ്റ് സ്റ്റേഷനു മുന്‍പില്‍ കുത്തിയിരിപ്പ് സമരം നടത്തി. യുവാവിനെ അകാരണമായി കസ്റ്റഡിയിലെടുത്ത് മര്‍ദിച്ചെന്നാണ് പരാതി.

യുവാവിനെ വീട്ടില്‍ വച്ചും ഉദ്യോഗസ്ഥര്‍ മര്‍ദിച്ചതായും കേസില്‍ പ്രതി അല്ലാത്ത യുവാവിനെ ഉദ്യോഗസ്ഥര്‍ മാനസികമായി പീഡിപ്പിക്കുകയാണെന്നും കുടുംബാംഗങ്ങള്‍ പറഞ്ഞു. 8-ാം തീയതി വരെ കേസില്‍ യുവാവിനെ അറസ്റ്റ് ചെയ്യരുതെന്ന് ഹൈക്കോടതി ഉത്തരവുണ്ടെന്നു പറയുന്നു.

ഇന്നലെ രാവിലെ 9-ന് ആണ് മുതുകാട് ചെക് പോസ്റ്റിനു സമീപത്തെ പുതുക്കുടിമീത്തല്‍ പി.എം.സച്ചിദാന്ദനെ (26) പെരുവണ്ണാമൂഴി ഡപ്യൂട്ടി റേഞ്ച് ഫോറസ്റ്റ് ഓഫിസര്‍ കെ.ഷാജീവും സംഘവും ചേര്‍ന്ന് വീട്ടില്‍ നിന്നു കേസ് അന്വേഷണത്തിന്റെ ഭാഗമായി കസ്റ്റഡിയില്‍ എടുത്തത്. പെരുവണ്ണാമൂഴി ഫോറസ്റ്റ് ഓഫിസില്‍ മൊഴിയെടുത്ത ശേഷം ഉദ്യോഗസ്ഥര്‍ പറഞ്ഞു വിട്ടു.

എന്നാല്‍ യുവാവ് വീട്ടില്‍ എത്തിയില്ല. അതേ തുടര്‍ന്ന് അമ്മ അല്ലിറാണിയും ഭാര്യ അനുഷയും ഫോറസ്റ്റ് സ്റ്റേഷനു മുന്‍പില്‍ കുത്തിയിരിപ്പ് സമരം നടത്തി. ബ്ലോക്ക് പഞ്ചായത്ത് അംഗം ജിതേഷ് മുതുകാട്,മുന്‍ പഞ്ചായത്ത് അംഗം ജയിംസ് മാത്യു എന്നിവര്‍ ഉദ്യോഗസ്ഥരുമായി നടത്തിയ ചര്‍ച്ചയെ തുടര്‍ന്ന് ഉച്ചയ്ക്ക് 1ന് സമരം അവസാനിപ്പിച്ചു.പിന്നീട് വനം വകുപ്പ് ഉദ്യോഗസ്ഥര്‍ മര്‍ദിച്ചുവെന്ന് ആരോപിച്ച് സച്ചിദാനന്ദന്‍ പേരാമ്പ്ര താലൂക്ക് ആശുപത്രിയില്‍ ചികിത്സ തേടി.

കാട്ടിറച്ചി പിടികൂടിയ സംഭവവുമായി ബന്ധപ്പെട്ട കേസിന്റെ മൊഴിയില്‍ സച്ചിദാനന്ദന്റെ പേര് സൂചിപ്പിച്ചതു കൊണ്ട് അന്വേഷണത്തിന്റെ ഭാഗമായാണ് ചോദ്യം ചെയ്യാന്‍ കസ്റ്റഡിയില്‍ എടുത്തതെന്നും മര്‍ദിച്ചിട്ടില്ലെന്നും വനം വകുപ്പ് അധികൃതര്‍ പറഞ്ഞു.