സ്‌കൂളില്‍ നിന്ന് ഉച്ചഭക്ഷണം കഴിച്ചതിന് പിന്നാലെ കുട്ടികള്‍ക്ക് തലകറക്കവും ഛര്‍ദ്ദിയും. ബീഹാറിലെ സര്‍ക്കാര്‍ സ്‌കൂളില്‍ ഇന്നലെയായിരുന്നു സംഭവം. നളന്ദ ജില്ലയിലെ പരാസിയിലുള്ള സ്‌കൂളിലാണ് സംഭവമുണ്ടായത്. തലകറക്കം, ഛര്‍ദ്ദില്‍ എന്നിവ അനുഭവപ്പെട്ടതോടെയാണ് 36 വിദ്യാര്‍ത്ഥിനികളെ ആശുപത്രിയില്‍ പ്രവേശിപ്പിച്ചത്. സ്‌കൂളിലെ പാചകക്കാരന്‍ ഉപ്പ് എന്ന് തെറ്റിദ്ധരിച്ച് ഭക്ഷണത്തില്‍ സോപ്പുപൊടി ഇടുകയായിരുന്നു. ദേഹാസ്വാസ്ഥ്യമുണ്ടായ കുട്ടികളെ ബീഹാര്‍ഷരീഫ് ആശുപത്രിയിലാണ് പ്രവേശിപ്പിച്ചത്. ഇവരുടെ ആരോഗ്യനില തൃപ്തികരമാണെന്ന് അധികൃതര്‍ അറിയിച്ചു.

സോയബീന്‍ ഉള്‍പ്പെടുന്ന ഉച്ചഭക്ഷണം ഒരു എന്‍ജിഒ ആണ് വിതരണം ചെയ്യുന്നതെന്ന് പ്രിന്‍സിപ്പാള്‍ ശൈലേന്ദ്ര കുമാര്‍ സിംഗ് പറഞ്ഞു. ചില കുട്ടികള്‍ ഭക്ഷണം നേരത്തെതന്നെ കഴിച്ചു. എന്നാല്‍ ചിലര്‍ ഭക്ഷണത്തില്‍ ഉപ്പ് കുറവാണെന്ന് പരാതിപ്പെട്ടു. തുടര്‍ന്ന് പാചകക്കാരന്‍ ഉപ്പെന്ന് കരുതി സോപ്പുപൊടി ഭക്ഷണത്തില്‍ ചേര്‍ക്കുകയായിരുന്നു. ഉപ്പും സോപ്പുപൊടിയും അടുക്കളയില്‍ ഒരേ സ്ഥലത്ത് സൂക്ഷിച്ചിരുന്നതാണ് അബദ്ധത്തിന് കാരണമായതെന്നും പ്രിന്‍സിപ്പാള്‍ വ്യക്തമാക്കി.

അസ്വസ്ഥത അനുഭവപ്പെട്ടതിനെത്തുടര്‍ന്ന് സ്‌കൂളില്‍തന്നെ വിദ്യാര്‍ത്ഥികള്‍ക്ക് ഫസ്റ്റ് എയ്ഡ് നല്‍കിയെങ്കിലും ഫലമുണ്ടാകാത്തതിനെത്തുടര്‍ന്ന് ആശുപത്രിയിലേയ്ക്ക് കൊണ്ടുപോവുകയായിരുന്നു. സിവില്‍ സര്‍ജന്‍ ഡോ.ജയ് പ്രകാശ് സിംഗ് ആശുപത്രി സന്ദര്‍ശിക്കുകയും കുട്ടികള്‍ അപകടനില തരണം ചെയ്തതായി അറിയിക്കുകയും ചെയ്തു. ബീഹാര്‍ ഗ്രാമവികസന മന്ത്രി ശ്രാവണ്‍ കുമാറും ആശുപത്രിയിലെത്തി വിദ്യാര്‍ത്ഥികളെ കണ്ടു. കുട്ടികളുടെ ആരോഗ്യസ്ഥിതി സംബന്ധിച്ച് ഡോക്ടര്‍മാരുമായി കൂടിക്കാഴ്ച നടത്തുകയും ചെയ്തു. സംഭവത്തില്‍ അന്വേഷണം നടത്തുമെന്ന് മന്ത്രി അറിയിച്ചു.