തലസ്ഥാനത്ത് വെച്ച് 20 കോടി രൂപ വിലവരുന്ന 10 കിലോഗ്രാം ഹാഷിഷ് ഓയിൽ പിടികൂടിയ കേസിൽ അന്തർ സംസ്ഥാന ലഹരിമരുന്ന് കടത്തുകാരനായ സൈബു തങ്കച്ചന് ജാമ്യമില്ല. സൈബുവും  കൂട്ടുപ്രതികളായ രാജാക്കാട് സണ്ണിയുമടക്കമുള്ള മൂന്ന് പ്രതികൾക്കും നേരത്തേ ജാമ്യം നിഷേധിച്ചിരുന്നു. ജാമ്യം തള്ളിയ തിരുവനന്തപുരം നാലാം അഡീഷണൽ ജില്ലാ സെഷൻസ് കോടതി പ്രതികൾ തടവറക്കുള്ളിൽ കഴിഞ്ഞ് വിചാരണ നേരിടാൻ ഉത്തരവിട്ടു. പ്രതികളെ നവംബർ 22  ന് ഹാജരാക്കാൻ പൂജപ്പുര ജില്ലാ ജയിൽ സൂപ്രണ്ടിന് പ്രൊഡക്ഷൻ വാറണ്ടയക്കാൻ  കോടതി ഉത്തരവിട്ടു. ആദ്യ ജാമ്യഹർജി മെയ് മാസം തള്ളിയതിനെ തുടർന്ന് പ്രതികൾ സെപ്റ്റംബറിൽ  സമർപ്പിച്ച രണ്ടാമത്തെ ജാമ്യഹർജി  കോടതി വീണ്ടും തള്ളിയിരുന്നു. തുടർന്നാണ്  രണ്ടാം പ്രതി സൈബു തങ്കച്ചൻ മൂന്നാമതും ജാമ്യഹർജി സമർപ്പിച്ചത്. ആദ്യ ജാമ്യ ഹർജിയും രണ്ടാമത്തെ ജാമ്യ ഹർജിയും  തള്ളിയപ്പോഴുണ്ടായ അതേ സാഹചര്യമാണ് ഇപ്പോഴും നിലവിലുള്ളതെന്നും സാഹചര്യങ്ങളിൽ മാറ്റമുണ്ടായിട്ടില്ലെന്നും ജഡ്ജി സിജു ഷെയ്ക്ക് ജാമ്യം നിരസിച്ച ഉത്തരവിൽ ചൂണ്ടിക്കാട്ടി. ക്രിമിനൽ നടപടി ക്രമത്തിലെ വകുപ്പ് 439 പ്രകാരമുള്ള ജാമ്യഹർജിയാണ് കോടതി തള്ളിയത്.