നിയമസഭ തിരഞ്ഞെടുപ്പ് ഫലമറിയാന്‍ ഇനി വെറും 7 ദിവസമാണ് ശേഷിക്കുന്നത്. ഇടതുമുന്നണി ഭരണത്തുടര്‍ച്ച അവകാശപ്പെടുന്നുണ്ടെങ്കിലും സീറ്റുകളുടെ എണ്ണത്തില്‍ വലിയ കുറവ് വരുമെന്ന ആശങ്ക ഉണ്ട്. 2016 ല്‍ വന്‍ വിജയം സ്വന്തമാക്കിയ പല ജില്ലകളിലും വന്‍ അട്ടിമറികള്‍ തന്നെ ഉണ്ടാകുമെന്നും മുന്നണി കണക്ക് കൂട്ടുന്നു.     ഇക്കൂട്ടത്തില്‍ കഴിഞ്ഞ തവണ ഇടതുപക്ഷം തിളക്കമാര്‍ന്ന വിജയം സ്വന്തമാക്കിയ ആലപ്പുഴ ജില്ലയും ഉള്‍പ്പെടുന്നു. കഴിഞ്ഞ നിയമസഭ തിരഞ്ഞെടുപ്പില്‍ ആലപ്പുഴ ജില്ലയില്‍ ആകെയുള്ള 9 ല്‍ എട്ട് സീറ്റുകളും നേടിയായിരുന്നു ഇടതുമുന്നണിയുടെ അട്ടിമറി വിജയം. കോണ്‍ഗ്രസിന് ആശ്വസിക്കാന്‍ വക നല്‍കിയത് രമേശ് ചെന്നിത്തലയുടെ ഹരിപ്പാട് മാത്രം. 2019 ല്‍ എഎം ആരിഫ് ലോക്‌സഭയിലേക്ക് തിരഞ്ഞെടുക്കപ്പെട്ടതോടെ നടന്ന ഉപതിരഞ്ഞെടുപ്പില്‍ ഷാനി മോള്‍ ഉസ്മാനിലൂടെ അരൂര്‍ യുഡിഎഫ് വിജയിച്ചിരുന്നു.    
അധികാരം പിടിക്കാന്‍ നിര്‍ണായകമായ തെക്കന്‍ ജില്ലകളില്‍ ഒന്നായ ആലപ്പുഴയില്‍ ഇത്തവണ പക്ഷേ സേഫ് അല്ല കാര്യങ്ങളെന്നാണ് എല്‍ഡിഎഫ് വിലയിരുത്തുന്നത്. ഇടതുപക്ഷത്തിന്റെ കോട്ടകള്‍ എന്ന് വിലയിരുത്തുന്ന മണ്ഡലങ്ങളില്‍ പലതിലും നേതൃത്വത്തിന് ഉറച്ച പ്രതീക്ഷ ഇല്ലെന്നാണ് പാര്‍ട്ടി നേതൃത്വം വ്യക്തമാക്കുന്നത്. വെറും മൂന്ന് മണ്ഡലങ്ങളിലാണ് ഇടതുപക്ഷത്തിന് പ്രതീക്ഷ. ആലപ്പുഴ, മാവേലിക്കര, ചെങ്ങന്നൂര്‍ എന്നിവയാണ് ഈ മൂന്ന് മണ്ഡലങ്ങള്‍   സിപിഎം കോട്ടയായ ജി സുധാകരന്റെ അമ്പലപ്പുഴയില്‍ പോലും ഇടത് പക്ഷത്തിന് ഉറച്ച വിജയ പ്രതീക്ഷ ഇല്ലെന്നാണ് റിപ്പോര്‍ട്ട്. ഇത്തവണ എച്ച് സലാമാണ് ഇവിടെ എല്‍ഡിഎഫിന് വേണ്ടി മത്സരിച്ചത്. ജില്ലാ കോണ്‍ഗ്രസ് കമ്മിറ്റി മുന്‍ അധ്യക്ഷന്‍ എം ലിജുവാണ് യുഡിഎഫിനായി മത്സരിച്ചത്.       ചേര്‍ത്തല, അരൂര്‍, കുട്ടനാട് എന്നീ മണ്ഡലങ്ങളും ഇടതുപക്ഷത്തിന് ഉറച്ച വിജയ സാധ്യത ഇല്ലാത്ത മണ്ഡലങ്ങളാണ്. മാത്രവുമല്ല പലയിടത്തും കാവിപ്പട നിര്‍ണായക ശക്തിയായി മാറുന്നുണ്ട്. ബി.ജെ.പിയുടെ വോ്ട്ട് ഷെയര്‍ ചിലയിടത്തെങ്കിലും സിപിഎമ്മിന് ക്ഷീണമാകും.     മാത്രവുമല്ല കാവിപ്പ്ട വാട്‌സ് ആപ്  ഗ്രൂപ്പുമായി ബന്ധപ്പെട്ട് പുറത്ത് വന്ന വാര്‍ത്തകള്‍ സത്യമാണെങ്കില്‍ യുഡിഎഫിന് ചിരിക്കാം എല്‍ഡിഎഫിന് കരയാം. ബി.ജെ.പിക്ക് ചെങ്കോട്ടയില്‍ ്കാവിപ്പടയെന്ന് ആശ്വസിക്കുകയും ചെയ്യാം.