വനിതാ ഡോക്ടറുടെ വീട്ടില്‍ നിന്ന് 70 പവന്‍ സ്വര്‍ണവും ഒരു ലക്ഷം രൂപയും കവര്‍ന്ന കേസിലെ പ്രതികളെ പിടികൂടി ആറ് മാസമായിട്ടും തൊണ്ടിമുതല്‍ കണ്ടെടുക്കാന്‍ പൊലീസ് ഉത്സാഹം കാണിക്കുന്നില്ലെന്ന് പരാതി. അത്താണി കെ.എസ്.ഇ.ബി ഓഫീസിന് സമീപം താമസിക്കുന്ന ഡോക്ടര്‍ ഗ്രേസ് മാത്യുവാണ് പരാതിയുമായി രംഗത്തെത്തിയത്.

തനിച്ച് താമസിക്കുകയായിരുന്ന ഡോക്ടറെ രണ്ട് വര്‍ഷം മുമ്ബ് അര്‍ദ്ധരാത്രിയിലാണ് മുഖംമൂടി ധരിച്ചെത്തിയ അക്രമികള്‍ കെട്ടിയിട്ട ശേഷം കവര്‍ച്ച നടത്തിയത്. കേസിലെ പ്രധാന പ്രതി കുപ്രസിദ്ധ കുറ്റവാളി മധുര സ്വദേശി സൗന്ദര്‍രാജ് കഴിഞ്ഞ ഫെബ്രുവരിയിലാണ് ചെങ്ങമനാട് പൊലീസിന്റെ പിടിയിലായത്. സംഭവത്തിന് പിന്നില്‍ സൗന്ദര്‍രാജാണെന്ന് തുടക്കത്തില്‍ തന്നെ പൊലീസിന് വ്യക്തമായിരുന്നു. ഡോക്ടറുടെ വീട്ടില്‍ നിന്ന് ഇയാളുടെ വിരലടയാളം ലഭിച്ചതാണ് കാരണം. വീടിന്റെ പിന്നിലെ വാതിലിന്റെയും കിടപ്പ് മുറിയുടെയും കതകിന്റെ കുറ്റികള്‍ അഴിച്ചു മാറ്റിയാണ് രണ്ടംഗ കവര്‍ച്ചാ സംഘം അകത്ത് കടന്നത്. ഇവരിലൊരാള്‍ ഡോക്ടറെ കട്ടിലിലേക്ക് തള്ളി വീഴ്ത്തിയ ശേഷം പുതപ്പ് കൊണ്ട് മൂടി കൈയില്‍ പിടിച്ചു നിന്നു. ഈ സമയം രണ്ടാമന്‍ സ്വര്‍ണവും പണവും വാരിക്കൂട്ടി ചുരിദാറിന്റെ ഷാളില്‍ പൊതിഞ്ഞെടുത്തു. സൗന്ദര്‍രാജിനെ പിടികൂടി ചോദ്യം ചെയ്തപ്പോഴാണ് ഈ സമയം സംഘത്തിലെ മൂന്നാമന്‍ ഭഗവതി വീടിന് പുറത്ത് ഉണ്ടായിരുന്നതായി വിവരം ലഭിച്ചത്. ഇയാളെ ഇതുവരെ കണ്ടെത്താനായിട്ടില്ല. പിടിയിലായ പ്രതികളെ ഡോക്ടറുടെ വീട്ടിലെത്തിച്ച് തെളിവെടുപ്പു നടത്തിയിരുന്നു. പ്രതികളുടെ മൊഴിയുടെ അടിസ്ഥാനത്തില്‍ കോഴിക്കോട്ടെ ചില ജുവലറികളില്‍ പൊലീസ് അന്വേഷണം നടത്തിയെങ്കിലും സ്വര്‍ണം കണ്ടെത്താനായില്ല.
അതേസമയം, മൂന്നാമത്തെ പ്രതിയെ കൂടി പിടികൂടിയാലേ തൊണ്ടിമുതല്‍ സംബന്ധിച്ച് കൂടുതല്‍ വ്യക്തത വരൂ എന്ന് ചെങ്ങമനാട് പൊലീസ് പറഞ്ഞു. കേസ് അന്വേഷിച്ച പൊലീസ് ഉദ്യോഗസ്ഥര്‍ തിരഞ്ഞെടുപ്പ് ഡ്യൂട്ടി കാരണം സ്ഥലം മാറിപ്പോയതും കാരണമായി. മേലുദ്യോഗസ്ഥരുടെ ഭാഗത്തു നിന്ന് വേണ്ടത്ര സമ്മര്‍ദമുണ്ടായില്ലെന്നും സൂചനയുണ്ട്.