പ്രസവത്തിനിടെ അമ്മയും കുഞ്ഞും  പാലക്കാട് തങ്കം ആശുപത്രിയില്‍  മരിച്ചത് ചികിത്സാപ്പിഴവു മൂലമെന്ന് മെഡിക്കല്‍ റിപ്പോര്‍ട്ട്. മൂന്നു ഡോക്ടര്‍മാര്‍ക്കു പിഴവുണ്ടായെന്നു മെഡിക്കല്‍ ബോര്‍ഡ് അറിയിച്ചു. ഇതിനു പിന്നാലെ ഡോക്ടര്‍മാരെ അറസ്റ്റ് ചെയ്ത് ജാമ്യത്തില്‍ വിട്ടു. രണ്ടു ദിവസം മുന്‍പാണ് പാലക്കാട് മെഡിക്കല്‍ ബോര്‍ഡ് യോഗം ചേര്‍ന്നത്. റിപ്പോര്‍ട്ട് കഴിഞ്ഞ ദിവസം ആരോഗ്യവകുപ്പിനു കൈമാറിയിരുന്നു.

ചിറ്റൂര്‍ തത്തമംഗലം സ്വദേശി രഞ്ജിത്തിന്റെ ഭാര്യ ഐശ്വര്യയും കുഞ്ഞുമാണ് ജൂലൈ ആദ്യവാരം മരിച്ചത്. ഐശ്വര്യയെ ചികിത്സിച്ച ഡോക്ടര്‍ക്ക് തെറ്റ് പറ്റിയെന്ന് അന്നുതന്നെ കുടുംബം ആരോപിക്കുകയുണ്ടായിരുന്നു.

പ്രസവ ശസ്ത്രക്രിയ ആദ്യം വേണമെന്ന് നിര്‍ദ്ദേശിക്കുകയും എന്നാല്‍ സാധാരണ പ്രസവം മതിയെന്ന് പിന്നീട് അറിയിക്കുകയുമായിരുന്നു. ഇതിനിടെ കുട്ടിയെ പുറത്തെടുക്കവെ അമിത രക്തസ്രാവം മൂലം വെന്റിലേറ്ററിലായ ഐശ്വര്യ മരിച്ചു. പൊക്കിള്‍കൊടി കഴുത്തില്‍ കുരുങ്ങിയ നിലയിലായിരുന്ന കുഞ്ഞിനെ വാക്വം ഉപയോഗിച്ച് പുറത്തെടുത്തതിനെ തുടര്‍ന്ന് കുഞ്ഞും മരിച്ചു.

പാലക്കാട് ടൗണ്‍ സൗത്ത് പൊലീസ് സംഭവത്തില്‍ പാലക്കാട് ടൗണ്‍ സൗത്ത് പൊലീസ് നേരത്തെ കേസ് രജിസ്റ്റര്‍ ചെയ്തിട്ടുണ്ടായിരുന്നു.