കുമളിയില്‍ പാടത്ത് പൊട്ടി വീണ വൈദ്യുതി ലൈനില്‍ നിന്ന് ഷോക്കേറ്റ് പിതാവിനും രണ്ടാണ്‍മക്കള്‍ക്കും ദാരുണാന്ത്യം. വണ്ടന്‍മേട് രാജക്കണ്ടം നായര്‍സിറ്റി ചെമ്പകശ്ശേരില്‍ കനകാധരന്‍ (57), മക്കളായ വിഷ്ണു (31), വിനീത് (24) എന്നിവരാണ് മരിച്ചത്. ഇന്നലെ ഉച്ചകഴിഞ്ഞ് മൂന്ന് മണിയോടെയായിരുന്നു ദുരന്തമുണ്ടായത്.

ഉച്ചയ്ക്ക് ശേഷമുണ്ടായ ശക്തമായ മഴയില്‍ ഏലത്തോട്ടത്തില്‍ മരം വീണ് വൈദ്യുതി ലൈന്‍ പൊട്ടി പാടത്തേക്ക് വീണിരുന്നു.മഴയ്ക്ക് ശേഷം പശുവിന് പുല്ല് ചെത്താന്‍ പാടത്ത് പോയ കനകാധരനെ ഏറെ നേരമായിട്ടും കാണാതായതോടെയാണ് മക്കള്‍ തിരഞ്ഞിറങ്ങിയത്.

അവരെയും കാണാത്തതിനെ തുടര്‍ന്ന് മാതാവ് ഓമന അന്വേഷിച്ചെത്തിയപ്പോഴാണ് മൂവരെയും ഷോക്കേറ്റ നിലയില്‍ പാടത്ത് കണ്ടത്. ഓമനയുടെ നിലവിളി കേട്ട് ഓടിക്കൂടിയവര്‍ കെ.എസ്.ഇ.ബിയില്‍ വിളിച്ചറിയിച്ച് വൈദ്യുതി ബന്ധം വിച്ഛേദിച്ച് ആശുപത്രിയിലെത്തിച്ചെങ്കിലും ജീവന്‍ നഷ്ടപ്പെട്ടിരുന്നു. സ്വന്തമായുള്ള നാലേക്കര്‍ ഭൂമിയില്‍ ഏലവും ഇഞ്ചിയും പച്ചക്കറികളും കൃഷിചെയ്താണ് ഇവര്‍ കഴിഞ്ഞിരുന്നത്.

വിഷ്ണുവിന്റെ ഭാര്യ ആതിര. രണ്ടു വയസുള്ള ഗൗതം മകനാണ്. വിനീത് അവിവാഹിതനാണ്. മൃതദേഹങ്ങള്‍ പോസ്റ്റുമോര്‍ട്ടത്തിനായി ഇടുക്കി മെഡിക്കല്‍ കോളേജിലേക്ക് മാറ്റി.


വൈദ്യുതി ലൈന്‍ പൊട്ടി വീണാല്‍ വൈദ്യുതി ഓഫീസില്‍ വിവരം അറിയിക്കുന്നതിനൊപ്പം പരിസരത്തുള്ളവര്‍ക്കും മുന്നറിയിപ്പ് നല്കുക. പാടത്ത് ലൈന്‍ പൊട്ടിക്കിടക്കുന്നത് കണ്ടാല്‍ അടുത്തുചെല്ലുകയോ വെള്ളത്തില്‍ ചവിട്ടുകയോ ചെയ്യരുത്. മരമോ ശിഖരങ്ങളോ ലൈനില്‍ തട്ടിയാല്‍ അറ്റകുറ്റപ്പണിക്ക് മുതിരാതെ വൈദ്യുതി ജീവനക്കാരെ അറിയിച്ച് നീക്കം ചെയ്യുക വൈദ്യുതലൈന്‍ താഴ്ന്നു കിടക്കുന്നതു കണ്ടാലും അധികൃതരെ അറിയിക്കേണ്ടതാണ്.