ഇന്നലത്തെ ലോകകപ്പ് ക്രിക്കറ്റില്‍ ആരാധകര്‍ ടെന്‍ഷനടിച്ചത് കോഹ്ലി സെഞ്ച്വറി നേടുമോ എന്നായിരുന്നു. കോഹ്ലി 80 റണ്‍ കഴിഞ്ഞപ്പോള്‍ ജയിക്കാന്‍ 20 റണ്‍ വേണ്ടി വന്നതാണ് ആശങ്കയ്ക്കിടയാക്കിയത്. തകര്‍ത്തടിച്ചിരുന്ന രാഹുല്‍ പിന്നീട് കോഹ്ലിക്കായി കാഴ്ചക്കാരനായി. ഇടയ്ക്ക് ഒരു റണ്‍മാത്രം അടിച്ചു. പല ഈസി സിംഗിള്‍ പോലും രാഹുല്‍ കോഹ്ലിക്കായി ഓടാതെ ഒഴിവാക്കി. അവസാനം സിക്‌സറോടെ കോഹ്ലി സെഞ്ച്വറി നേടി.

അങ്ങനെബംഗ്ലാ കടുവകളെ വീഴ്ത്തി ലോകകപ്പില്‍ വിജയ തേരോട്ടം തുടര്‍ന്ന് ഇന്ത്യ. ലോകകപ്പിലെ നാലാം മത്സരത്തില്‍ ബംഗ്ലദേശിനെ ഏഴു വിക്കറ്റിനു വീഴ്ത്തിയാണ് ഇന്ത്യ തുടര്‍ച്ചയായ നാലാം ജയം സ്വന്തമാക്കിയത്. ബംഗ്ലദേശ് ഉയര്‍ത്തിയ 257 റണ്‍സ് വിജയലക്ഷ്യം 41.3 ഓവറില്‍ ഇന്ത്യ മറികടന്നു. സെഞ്ചറി നേടിയ വിരാട് കോഹ്ലി(97 പന്തില്‍ 103*), അര്‍ധസെഞ്ചറി നേടിയ ഓപ്പണര്‍ ശുഭ്മാന്‍ ഗില്‍ (55 പന്തില്‍ 53), ക്യാപ്റ്റന്‍ രോഹിത് ശര്‍മ (40 പന്തില്‍ 48), കെ.എല്‍.രാഹുല്‍ (34 പന്തില്‍ 34*) എന്നിവരുടെ ബാറ്റിങ്ങാണ് ഇന്ത്യയ്ക്ക് അനായാസ വിജയം സമ്മാനിച്ചത്.

42ാം ഓവറിലെ മൂന്നാം പന്തില്‍ വിജയത്തിലേക്ക് രണ്ടു റണ്‍സ് മാത്രം വേണമെന്നിരിക്കെ സിക്‌സര്‍ പറത്തിയാണ് കോഹ്ലി വിജയറണ്‍ കുറിച്ചത്. ഇതോടെ ഈ ലോകകപ്പിലെ തന്റെ ആദ്യ സെഞ്ചറിയും കോഹ്ലി തികച്ചു. നാല് മത്സരങ്ങളില്‍നിന്ന് എട്ടു പോയിന്റുമായി ഇന്ത്യ രണ്ടാം സ്ഥാനത്താണ്. രണ്ടു പോയിന്റുള്ള ബംഗ്ലദേശ് ഏഴാം സ്ഥാനത്താണ്. 22നു ന്യൂസീലന്‍ഡിനെതിരെയാണ് ഇന്ത്യയുടെ അടുത്ത മത്സരം.

മറുപടി ബാറ്റിങ്ങില്‍ രോഹിത്തും ഗില്ലും ചേര്‍ന്നു മികച്ച തുടക്കമാണ് ഇന്ത്യയ്ക്കു നല്‍കിയത്. ഒന്നാം വിക്കറ്റില്‍ ഇരുവരും ചേര്‍ന്ന് 88 റണ്‍സെടുത്തു. ലോകകപ്പില്‍ മികച്ച ഫോമിലുള്ള ക്യാപ്റ്റന്‍ രോഹിത്ത് രണ്ടു സിക്‌സും ഏഴു ഫോറും സഹിതം 40 പന്തിലാണ് 48 റണ്‍സെടുത്തത്. 15ാം ഓവറില്‍ ഹസന്‍ മഹ്‌മൂദാണ് രോഹിത്തിനെ വീഴ്ത്തിയത്. പിന്നാലെയെത്തിയ കോഹ്ലി, തുടക്കം മുതല്‍ ഫോമിലായിരുന്നു. ഗില്ലും കോഹ്ലിയുടെ ചേര്‍ന്ന് രണ്ടാം വിക്കറ്റില്‍ 44 റണ്‍സെടുത്തു. അര്‍ധസെഞ്ചറി തികച്ചതിനു പിന്നാലെ 20ാം ഓവറില്‍ ഗില്‍ പുറത്തായി. നാലാമനായെത്തിയ ശ്രേയസ് അയ്യറിന് ഏറെ നേരെ നിലയുറപ്പിക്കാനായില്ല. 25 പന്തില്‍ 19 റണ്‍സെടുത്ത അയ്യര്‍, 30ാം ഓവറില്‍ പുറത്തായി. നാലാം വിക്കറ്റില്‍ രാഹുലും കോഹ്ലിയും ചേര്‍ന്ന് ഇന്ത്യയെ വിജയത്തിലെത്തിക്കുകയായിരുന്നു. ബംഗ്ലദേശിനായി മെഹ്ദി ഹസന്‍ മിറാസ് രണ്ടു വിക്കറ്റും ഹസന്‍ മഹ്‌മൂദ് ഒരു വിക്കറ്റും നേടി.

ടോസ് നേടി ബാറ്റിങ്ങിന് ഇറങ്ങിയ ബംഗ്ലദേശ് 50 ഓവറില്‍ എട്ട് വിക്കറ്റ് നഷ്ടത്തിലാണ് 256 റണ്‍സെടുത്തത്. 82 പന്തില്‍ 66 റണ്‍സെടുത്ത ലിറ്റന്‍ ദാസാണ് ബംഗ്ലദേശിന്റെ ടോപ് സ്‌കോറര്‍. ഓപ്പണര്‍മാര്‍ മികച്ച തുടക്കം നല്‍കിയിട്ടും അതു മുതലെടുക്കാന്‍ പിന്നാലെയെത്തിയ ബംഗ്ലദേശ് ബാറ്റര്‍മാര്‍ക്കു സാധിച്ചില്ല. ഓപ്പണിങ് വിക്കറ്റില്‍ 93 റണ്‍സിന്റെ കൂട്ടുകെട്ടാണ് തന്‍സിദ് ഹസനും ലിറ്റന്‍ ദാസും ചേര്‍ന്നു പടുത്തുയര്‍ത്തിയത്. 43 പന്തുകള്‍ നേരിട്ട തന്‍സിദ് ഹസന്‍ 51 റണ്‍സെടുത്തു. 15ാം ഓവറില്‍ കുല്‍ദീപ് യാദവിന്റെ പന്തില്‍ എല്‍ബിഡബ്ല്യു ആയാണ് തന്‍സിദ് പുറത്തായത്.

പിന്നാലെയെത്തിയ ക്യാപ്റ്റന്‍ നജ്മുല്‍ ഹുസെയ്ന്‍ ഷാന്റോയും (എട്ട്), മെഹ്ദി ഹസന്‍ മിറാസും (മൂന്ന്) അതിവേഗം മടങ്ങിയതോടെ ബംഗ്ലദേശ് പ്രതിരോധത്തിലായി. ഇതോടെ ബംഗ്ലദേശ് സ്‌കോറിങ്ങിന്റെ വേഗവും കുറഞ്ഞു. അര്‍ധ സെഞ്ചറി നേടിയ ലിറ്റന്‍ ദാസിനെ രവീന്ദ്ര ജഡേജയുടെ പന്തില്‍ ശുഭ്മന്‍ ഗില്‍ ക്യാച്ചെടുത്തു പുറത്താക്കി.

അതേസമയം ഏകദിന ലോകകപ്പില്‍ ഇന്ത്യയ്ക്കു തിരിച്ചടിയായി ഹാര്‍ദിക് പാണ്ഡ്യയുടെ പരുക്ക്. മത്സരത്തിലെ ഒന്‍പതാം ഓവറില്‍ പന്തെറിയുന്നതിനിടെയാണ് ഹാര്‍ദിക്കിന് കാലില്‍ പരുക്കേറ്റത്. തുടര്‍ന്ന് ടീം ഫിസിയോമാരെത്തി താരത്തെ പരിശോധിച്ചു. മുടന്തിയാണ് ഹാര്‍ദിക് ഗ്രൗണ്ട് വിട്ടത്. ബംഗ്ലദേശിനെതിരെ തന്റെ ആദ്യ ഓവറിലെ മൂന്നു പന്തുകള്‍ എറിഞ്ഞതിനു പിന്നാലെയായിരുന്നു താരത്തിനു പരുക്കേറ്റത്.

പാണ്ഡ്യയുടെ ഓവറിലെ ശേഷിക്കുന്ന മൂന്ന് പന്തുകള്‍ വിരാട് കോഹ്ലിയാണ് പിന്നീട് എറിഞ്ഞു തീര്‍ത്തത്. മൂന്നു പന്തില്‍നിന്നു കോഹ്ലി വഴങ്ങിയത് രണ്ട് റണ്‍സുകള്‍ മാത്രം. ബാറ്റിങ്ങിലും ബോളിങ്ങിലും ഇന്ത്യയുടെ വിശ്വസ്തനായിരുന്ന ഹാര്‍ദിക് പാണ്ഡ്യ അടുത്ത മത്സരങ്ങളില്‍ കളിക്കുമോയെന്നും വ്യക്തമല്ല.