ലോകകപ്പ് ക്രിക്കറ്റിനിടെ ചില വൈറല്‍ കാഴ്ചകളുമുണ്ട്. ഏകദിന ലോകകപ്പില്‍ ഇന്ത്യയെ തോല്‍പിച്ചാല്‍ ഒരു ബംഗ്ലദേശ് ക്രിക്കറ്റ് താരത്തിനൊപ്പം ധാക്കയില്‍ ഡേറ്റിനു പോകുമെന്ന് പാക്കിസ്ഥാനി നടി സെഹര്‍ ഷിന്‍വാരി. ''ഞങ്ങളുടെ ബംഗാളി ബന്ധുക്കള്‍ അടുത്ത മത്സരത്തില്‍ പ്രതികാരം ചെയ്യും. ഇന്ത്യയെ തോല്‍പിച്ചാല്‍ ബംഗാളി താരത്തിനൊപ്പം ഡേറ്റിനായി ഞാന്‍ ധാക്കയിലേക്കു പോകും.''സെഹര്‍ എക്‌സ് പ്ലാറ്റ്‌ഫോമിമായ ട്വിറ്ററില്‍ പ്രതികരിച്ചു.

അമ്മദാബാദ് നരേന്ദ്ര മോദി സ്റ്റേഡിയത്തില്‍ പാക്കിസ്ഥാനെ ഇന്ത്യ കീഴടക്കിയതോടെയാണ് 'അസാധാരണ ഓഫറുമായി' പാക്കിസ്ഥാന്‍ നടി രംഗത്തെത്തിയത്. ടോസ് നഷ്ടപ്പെട്ട് ബാറ്റിങ്ങിനിറങ്ങിയ പാക്കിസ്ഥാന്‍ 42.5 ഓവറില്‍ 191 റണ്‍സിന് പുറത്തായി. മറുപടി ബാറ്റിങ്ങില്‍ മൂന്ന് വിക്കറ്റ് നഷ്ടത്തില്‍ 30.3 ഓവറില്‍ ഇന്ത്യ വിജയത്തിലെത്തി.

ക്യാപ്റ്റന്‍ രോഹിത് ശര്‍മയുടെ അര്‍ധ സെഞ്ചറിയാണ് അനായാസ വിജയത്തിലേക്ക് ഇന്ത്യയെ നയിച്ചത്. 63 പന്തുകള്‍ നേരിട്ട രോഹിത് ശര്‍മ 86 റണ്‍സെടുത്തു. ഇന്ത്യയ്ക്കായി ശ്രേയസ് അയ്യരും അര്‍ധ സെഞ്ചറി (62 പന്തില്‍ 53) തികച്ചു. അഹമ്മദാബാദ് നരേന്ദ്ര മോദി സ്റ്റേഡിയത്തില്‍ പാക്കിസ്ഥാന്‍ ടീമിന് യാതൊരു തരത്തിലുള്ള പിന്തുണയും ലഭിച്ചില്ലെന്ന് പാക്കിസ്ഥാന്‍ ക്രിക്കറ്റ് ടീം ഡയറക്ടര്‍ മിക്കി ആര്‍തര്‍ കഴിഞ്ഞ ദിവസം ആരോപിച്ചിരുന്നു.

പുണെ മഹാരാഷ്ട്ര ക്രിക്കറ്റ് അസോസിയേഷന്‍ സ്റ്റേഡിയത്തില്‍ ഇന്ത്യയ്‌ക്കെതിരെ ടോസ് നേടിയ ബംഗ്ലദേശ് ബാറ്റു ചെയ്തത്. ന്യൂസീലന്‍ഡിനെതിരായ മത്സരത്തില്‍ പരുക്കേറ്റ ക്യാപ്റ്റന്‍ ഷാക്കിബ് അല്‍ ഹസന്‍ ഇല്ലാതെയാണ് ബംഗ്ലദേശ് ഇന്ത്യയെ നേരിടുന്നത്. പാക്കിസ്ഥാനെ തകര്‍ത്ത അതേ ടീമുമായാണ് ഇന്ത്യ പുണെയിലും കളിച്ചത്.

ആരാധകരെ ആവേശക്കൊടുമുടിയിലെത്തിച്ചു കൊണ്ടാണ് ഇന്ത്യന്‍ സൂപ്പര്‍ താരം വിരാട് കോലി ബംഗ്ലാദേശിനെതിരായ ഏകദിന ലോകകപ്പ് മത്സരത്തില്‍ സെഞ്ചുറി നേടിയത്. മത്സരത്തില്‍ കോലിയുടെ അപരാജിത സെഞ്ചുറി ഇന്ത്യയ്ക്ക് ത്രസിപ്പിക്കുന്ന വിജയം സമ്മാനിച്ചു. എന്നാല്‍ കോലിയുടെ സെഞ്ചുറിയുമായി ബന്ധപ്പെട്ടൊരു കാര്യമാണ് ഇപ്പോള്‍ സമൂഹമാധ്യമങ്ങളില്‍ വൈറലാകുന്നത്.

അമ്പയര്‍ റിച്ചാര്‍ഡ് കെറ്റില്‍ബറോയുടെ ഒരു തീരുമാനമാണ് ഈ സംഭവത്തിനാധാരം. ഇന്ത്യയുടെ ഇന്നിങ്സിലെ 42-ാം ഓവറിലാണ് സംഭവമരങ്ങേറിയത്. നസും അഹമ്മദാണ് പന്തെറിയാനെത്തിയത്. അപ്പോള്‍ ഇന്ത്യയ്ക്ക് ജയിക്കാന്‍ രണ്ട് റണ്‍സും കോലിയ്ക്ക് സെഞ്ചുറി തികയ്ക്കാന്‍ മൂന്ന് റണ്‍സുമായിരുന്നു വേണ്ടിയിരുന്നത്. ആദ്യ പന്ത് തന്നെ നസും ലെഗ് സൈഡിലേക്കെറിഞ്ഞു. ഇത് വൈഡാണെന്നാണ് കോലി പോലും കരുതിയത്.

എന്നാല്‍ ഏവരെയും അത്ഭുതപ്പെടുത്തിക്കൊണ്ട് അമ്പയര്‍ റിച്ചാല്‍ഡ് കെറ്റില്‍ബറോ പന്ത് വൈഡ് വിളിച്ചില്ല. ഇത് ആരാധകരെ ഞെട്ടിച്ചു. ഇന്ത്യന്‍ ക്രിക്കറ്റ് ടീമംഗങ്ങള്‍ ഇതിനുപിന്നാലെ ഡ്രസ്സിങ് റൂമില്‍ ചിരിക്കുന്നതും കാണാമായിരുന്നു. അമ്പയറുടെ വ്യത്യസ്തമായ മുഖഭാവവും ക്യാമറ കൃത്യമായി ഒപ്പിയെടുത്തു. അമ്പയര്‍ കോലിയുടെ സെഞ്ചുറിയ്ക്ക് കണ്ണടച്ചെന്ന് പലരും സമൂഹമാധ്യമങ്ങളിലൂടെ കുറിച്ചു. അമ്പയറുടെ തീരുമാനം ശരിവെച്ചും വിമര്‍ശിച്ചും ചര്‍ച്ചകള്‍ സമൂഹമാധ്യമങ്ങളില്‍ കൊഴുക്കുകയാണ്.

ഓവറിലെ മൂന്നാം പന്തില്‍ സിക്സടിച്ചുകൊണ്ട് കോലി സെഞ്ചുറി തികയ്ക്കുകയും ടീമിന് വിജയം സമ്മാനിക്കുകയും ചെയ്തു. ഈ ലോകകപ്പിലെ കോലിയുടെ ആദ്യ സെഞ്ചുറിയാണിത്. അന്താരാഷ്ട്ര ക്രിക്കറ്റിലെ കോലിയുടെ സെഞ്ചുറിയുടെ എണ്ണം ഇതോടെ 78 ആയി വര്‍ധിച്ചു. ഏകദിനത്തില്‍ 48 സെഞ്ചുറികളുമായി.

ഇതോടെ ബംഗ്ലാ കടുവകളെ വീഴ്ത്തി ലോകകപ്പില്‍ വിജയ തേരോട്ടം തുടര്‍ന്ന് ഇന്ത്യ. ലോകകപ്പിലെ നാലാം മത്സരത്തില്‍ ബംഗ്ലദേശിനെ ഏഴു വിക്കറ്റിനു വീഴ്ത്തിയാണ് ഇന്ത്യ തുടര്‍ച്ചയായ നാലാം ജയം സ്വന്തമാക്കിയത്. ഇതോടെ പാക് നടി സേഫായി. ഇനി ഡേറ്റിന് പോകേണ്ട.