ആ കാഴ്ച ഏവരേയും കണ്ണീരിലാഴ്ത്തി..... യാത്രയയപ്പു ചടങ്ങില്‍ മറുപടിപ്രസംഗം നടത്തിയശേഷം അധ്യാപകന്‍ വേദിയില്‍ കുഴഞ്ഞുവീണു മരിച്ചു. ഭരതന്നൂര്‍ ഗവ. എച്ച്എസ്എസ് ഹിന്ദി അധ്യാപകന്‍ കോരാണി ചെമ്പകമംഗലം ആലപ്പുറംകുന്ന് പൊയ്കയില്‍വിളവീട്ടില്‍ എസ്. പ്രഫുലന്‍ (56) ആണ് മരിച്ചത്.

ശനിയാഴ്ച രാവിലെ 11.30-നാണ് സംഭവം നടന്നത്. സ്‌കൂളില്‍നിന്നു വിരമിക്കുന്ന പ്രഫുലനും ഇവിടെനിന്നു മറ്റ് സ്‌കൂളുകളിലേക്കു സ്ഥലംമാറ്റം ലഭിച്ച എട്ട് അധ്യാപകര്‍ക്കുംവേണ്ടി യാത്രയയപ്പു ചടങ്ങ് സംഘടിപ്പിച്ചിരുന്നു. പ്രഫുലന്‍ യാത്രയയപ്പു സ്വീകരണത്തിനുശേഷം സഹപ്രവര്‍ത്തകരോടു മറുപടിപ്രസംഗം നടത്തി മടങ്ങിയെത്തി കസേരയില്‍ ഇരുന്നു. തുടര്‍ന്ന് മറ്റൊരധ്യാപകന്‍ പ്രസംഗിക്കാന്‍ തുടങ്ങിയപ്പോള്‍ നിശ്ചലമായിരിക്കുന്ന ഇദ്ദേഹത്തെക്കണ്ട് സഹപ്രവര്‍ത്തകര്‍ അടുത്തെത്തി കുലുക്കിവിളിക്കുമ്പോഴാണ് അബോധാവസ്ഥയിലാണെന്നു മനസ്സിലാക്കിയത്. ഉടന്‍തന്നെ പാങ്ങോടിലെ സ്വകാര്യ ആശുപത്രിയിലെത്തിച്ചെങ്കിലും ജീവന്‍ രക്ഷിക്കാന്‍ കഴിഞ്ഞില്ല. മൃതദേഹം ഭരതന്നൂര്‍ സ്‌കൂളില്‍ പൊതുദര്‍ശനത്തിനുവെച്ചശേഷം നാലുമണിയോടെ ചെമ്പകമംഗലത്തെ വീട്ടിലേക്കു കൊണ്ടുപോയി.

സംസ്‌കാരം ഞായറാഴ്ച രാവിലെ 10.30-ന് വീട്ടുവളപ്പില്‍ നടന്നു. ഭാര്യ: കെ. സിന്ധു (ആനച്ചല്‍ ഗവ. യുപിഎസ് അധ്യാപിക). വില്‍പ്പാട്ട്, കഥാപ്രസംഗം തുടങ്ങിയ കലകളിലൊക്കെ സജീവ സാന്നിധ്യമായിരുന്ന പ്രഫുലന്‍ മറുപടിപ്രസംഗത്തില്‍ നാലുവരി കവിതകൂടി പാടിയാണ് വേദി ഒഴിഞ്ഞത്. തൊട്ടുമുന്നില്‍ യാത്രയയപ്പ് സമ്മേളനത്തില്‍ വികാരാധീനനായി സംസാരിച്ച സഹപ്രവര്‍ത്തകന്റെ വിയോഗം ഇപ്പോഴും കൂടെയുള്ളവര്‍ക്ക് ഉള്‍ക്കൊള്ളാനാകുന്നില്ല.