ട്രാന്‍സ്‌ജെന്‍ഡര്‍ ദമ്പതികളുടെ കുഞ്ഞിന് പുതിയ ജനന സര്‍ട്ടിഫിക്കറ്റ് നല്‍കാന്‍ ഉത്തരവ്
ട്രാന്‍സ്‌ജെന്‍ഡര്‍ ദമ്പതികളുടെ കുഞ്ഞിന്റെ ജനന സര്‍ട്ടിഫിക്കറ്റില്‍ 'രക്ഷിതാക്കള്‍' എന്ന് രേഖപ്പെടുത്താന്‍ ഹൈക്കോടതിയുടെ അനുമതി. കുട്ടിയുടെ ജനന സര്‍ട്ടിഫിക്കറ്റില്‍ നിന്ന് അച്ഛന്‍, അമ്മ എന്ന് കൊടുത്തിരിക്കുന്നത് ഒഴിവാക്കണമെന്നും കോടതി ഉത്തരവിട്ടു. ജസ്റ്റിസ് എ എ സിയാദ് റഹ്മാന്റേതാണ് ഉത്തരവ്. ട്രാന്‍സ്‌ജെന്‍ഡര്‍ ദമ്പതികളായ സഹദിന്റെയും സിയാ പവലിന്റെയും ഹര്‍ജിയിലാണ് ഹൈക്കോടതി ഉത്തരവ്. ഇരുവരും കോഴിക്കോട് സ്വദേശികളാണ്. 2023ലാണ് ദമ്പതികള്‍ക്ക് കുഞ്ഞ് ജനിച്ചത്. രാജ്യത്തെ ആദ്യ ട്രാന്‍സ്‌ജെന്‍ഡര്‍ രക്ഷിതാക്കള്‍ കൂടിയാണ് ഇവര്‍.
നിലവിലെ ജനന സര്‍ട്ടിഫിക്കറ്റില്‍ അച്ഛന്‍, അമ്മ എന്ന് രേഖപ്പെടുത്തിയിരിക്കുന്നത് മാറ്റി 'രക്ഷിതാക്കള്‍' എന്നാക്കി പുതിയ സര്‍ട്ടിഫിക്കറ്റ് നല്‍കാനാണ് കോടതിയുടെ നിര്‍ദേശം. നിലവിലെ സര്‍ട്ടിഫിക്കറ്റില്‍ പിതാവിന്റെ സ്ഥാനത്ത് സിയാ പവല്‍ എന്നും മാതാവിന്റെ സ്ഥാനത്ത് സഹദ് എന്നുമാണ് നല്‍കിയിരിക്കുന്നത്. എന്നാല്‍ ഇരുവരും വര്‍ഷങ്ങള്‍ക്ക് മുന്‍പുതന്നെ സ്ത്രീയായും പുരുഷനായും മാറിയിരുന്നു.
തുടര്‍ന്ന് ഇരുവരും സര്‍ട്ടിഫിക്കറ്റില്‍ മാറ്റം വരുത്തുന്നതിനായി കോര്‍പ്പറേഷനില്‍ അപേക്ഷ നല്‍കി. എന്നാല്‍ അപേക്ഷ നിരസിച്ച കോര്‍പ്പറേഷന്‍ ഇരുവരെയും മാതാപിതാക്കളായി രേഖപ്പെടുത്തി ജനന സര്‍ട്ടിഫിക്കറ്റ് നല്‍കുകയായിരുന്നു. തുടര്‍ന്നാണ് ദമ്പതികള്‍ ഹൈക്കോടതിയെ സമീപിച്ചത്.
https://www.facebook.com/Malayalivartha
