കണ്ണീരടക്കാനാവാതെ..... വീട്ടുകാര്‍ ആശുപത്രിയിലായ സമയം വീട് കുത്തിത്തുറന്ന് മോഷണം, 31 പവന്‍ സ്വര്‍ണവും പണവും കവര്‍ന്നു. കടുത്തുരുത്തി മാന്‍വെട്ടം മേമ്മുറി നെടുതുരുത്ത് മ്യാലില്‍ എന്‍.കെ ജോയിയുടെ വീട്ടിലാണ് മോഷണം നടന്നത്.


മകള്‍ ജൂലിയുടെ അസുഖവുമായി ബന്ധപ്പെട്ട് ശനിയാഴ്ച കോട്ടയം തെള്ളകത്തെ ആശുപത്രിയിലായിരുന്നു ജോയിയും ഭാര്യ ലിസിയും. ഈ സമയമാണ് മോഷണം. 31 പവന്‍ സ്വര്‍ണാഭരങ്ങളും 25,000 രൂപയുമാണ് മോഷണം പോയത്. വീടിന്റെ മുന്‍വശത്തെ വാതിലിന്റെ പൂട്ടുതുറന്ന മോഷ്ടാക്കള്‍ കട്ടിലിലെ കിടക്കയ്ക്കടിയില്‍ വച്ചിരുന്ന താക്കോലുകള്‍ കണ്ടെത്തി. ഇതുപയോഗിച്ച് അഞ്ച് മേശകളും അലമാരകളും തുറന്നാണ് മോഷണം നടത്തിയിരിക്കുന്നത്. ജോയി ആശുപത്രിയില്‍ നിന്ന് മടങ്ങിയെത്തിയപ്പോഴാണ് മോഷണവിവരം അറിയുന്നത്.

കുറുപ്പന്തറ-കല്ലറ റോഡില്‍ മാന്‍വെട്ടം പെട്രോള്‍പമ്പിനോട് ചേര്‍ന്നാണ് വീട്. സ്ഥലത്തെത്തിച്ച പൊലീസ് നായ കുറുപ്പന്തറ ഭാഗത്തേക്ക് ഓടിയശേഷം മാന്‍വെട്ടം കുരിശുപള്ളിയുടെ മുന്നിലെത്തി നിന്നു. സമീപസ്ഥലങ്ങളില്‍ നിന്നും പൊലീസിന് സിസിടിവി ദൃശ്യങ്ങള്‍ ലഭ്യമായിട്ടുണ്ട്. ഇത് പരിശോധിച്ച് മോഷ്ടാക്കളുടെ ചിത്രം ലഭ്യമായി. ജില്ലാ പൊലീസ് മേധാവി എ ഷാഹുല്‍ ഹമീദിന്റെ നിര്‍ദ്ദേശമനുസരിച്ച് ഡിവൈ.എസ്.പി കെ.ജി അനീഷിന്റെ നേതൃത്വത്തിലെ പ്രത്യേക അന്വേഷണ സംഘമാണ് സംഭവം അന്വേഷിക്കുന്നത്.

ബന്ധുവിന്റെ വിവാഹത്തിന് ധരിക്കാന്‍ ബാങ്ക് ലോക്കറില്‍ നിന്നെടുത്തുവച്ച ആഭരണങ്ങള്‍ ഇന്ന് തിരികെ വയ്ക്കാനിരിക്കെയാണ് മോഷണമുണ്ടായത്.