കേരളത്തിലെ ആദ്യ ബാറ്ററി എനെര്‍ജി സ്റ്റോറേജ് പദ്ധതിയുടെ നിർമ്മാണോദ്ഘാടനം വൈദ്യുതിവകുപ്പ് മന്ത്രി കെ. കൃഷ്ണൻകുട്ടി നിർവ്വഹിച്ചു. കാസർകോട് മൈലാട്ടി 220 കെ വി സബ്സ്റ്റേഷൻ പരിസരത്താണ് 125 മെഗാവാട്ട് / 500 മെഗാവാട്ട് അവർ ശേഷിയുള്ള ബെസ് പദ്ധതി യാഥാർത്ഥ്യമാകുന്നത്. 135 കോടി രൂപയുടെ കേന്ദ്ര സർക്കാർ വയബിലിറ്റി ഗ്യാപ് ഫണ്ട് സഹായത്തോടെ നിർമ്മിക്കുന്ന പദ്ധതി, സോളാർ എനർജി കോർപറേഷൻ ഓഫ് ഇന്ത്യയുമായി സഹകരിച്ചാണ് കെ എസ് ഇ ബി നടപ്പാക്കുന്നത്.

4 മണിക്കൂർ തുടർച്ചയായോ അല്ലാതെയോ വൈദ്യുതി ലഭ്യമാക്കാനാകുന്ന രാജ്യത്തെ ആദ്യ ബാറ്ററി എനെർജി സ്റ്റോറേജ് പദ്ധതിയാണിത് എന്ന സവിശേഷതയും ഉണ്ട്. സംസ്ഥാനത്തിനോ കെ എസ് ഇ ബിക്കോ പ്രാരംഭ മുതൽമുടക്കില്ല എന്നതാണ് മറ്റൊരു വലിയ സവിശേഷത.

സംസ്ഥാനത്ത്, പുരപ്പുറ സൗരോർജ്ജ നിലയങ്ങളിൽ നിന്നുൾപ്പെടെ പകൽ സമയത്ത് കുറഞ്ഞ വിലയ്ക്ക് സുലഭമായ വൈദ്യുതി ഉന്നതശേഷിയുള്ള ബാറ്ററികളിൽ ശേഖരിച്ച്, വൈദ്യുതി ഉപയോഗം കൂടിയ വൈകുന്നേരത്തെ പീക്ക് മണിക്കൂറുകളിൽ ലഭ്യമാക്കുന്നതിനുള്ള സംവിധാനമാണ് BESS എന്ന ചുരുക്കപ്പേരിൽ അറിയപ്പെടുന്ന ബാറ്ററി എനെർജി സ്റ്റോറേജ് സിസ്റ്റം. മൈലാട്ടിയിൽ സ്ഥാപിക്കുന്ന 125 മെഗാവാട്ട് / 500 മെഗാവാട്ടവർ ബാറ്ററി എനർജി സ്റ്റോറേജ് സിസ്റ്റം രാജ്യത്തെ തന്നെ ആദ്യ നാല് മണിക്കൂർ സ്റ്റോറേജ് സംവിധാനമാണ്.

ഉദ്ദേശം 550 കോടി രൂപ മുതൽ മുടക്ക് വരുന്ന പദ്ധതി മുൻകൂർ പേയ്മെന്റ് നൽകാതെ താരിഫ് അടിസ്ഥാനമാക്കി ബിൽഡ് ഓൺ ഓപ്പറേറ്റ് (ബി.ഓ.ഓ.) മാതൃകയിലാണ് നടപ്പാക്കുന്നത്. ബെസ് പദ്ധതിയുടെ നിർമ്മാണച്ചെലവ് അധിക ബാധ്യത വരാതെ പീക്ക് സമയത്തെ വൈദ്യുതി വാങ്ങൽച്ചെലവിൽ കുറവ് വരുന്ന തുകയിൽ നിന്നും നൽകാൻ കഴിയും. താരതമ്യേന കുറഞ്ഞ നിർമ്മാണ കാലയളവ് മാത്രം വേണ്ടി വരുന്ന ഈ പദ്ധതി 2026 ഒക്ടോബറിൽ പൂർത്തീകരിക്കാനാണ് ലക്ഷ്യമിടുന്നത്.