ഉപരാഷ്ട്രപതി സി.പി. രാധാകൃഷ്ണൻ രണ്ടുദിവസത്തെ സന്ദർശനത്തിനായി ഇന്ന് കൊച്ചിയിൽ എത്തും. ഉച്ചയ്ക്ക് 2.10- ന് നെടുമ്പാശ്ശേരി വിമാനത്താവളത്തിൽ ഇറങ്ങുന്ന അദ്ദേഹത്തെ സംസ്ഥാന സർക്കാർ ഔദ്യോഗിക ബഹുമതികളോടെ സ്വീകരിക്കുകയും ചെയ്യും.

തുടർന്ന് ചങ്ങനാശ്ശേരിക്ക് പോകുന്ന അദ്ദേഹം എസ്.ബി. കോളജിന്റെ ശതാബ്ദിയാഘോഷ സമാപനച്ചടങ്ങിൽ പങ്കെടുക്കും. രാത്രി കൊച്ചിയിൽ തങ്ങുന്ന ഉപരാഷ്ട്രപതി നാളെ 11-ന് തൃശ്ശൂരിൽ നടത്തറ ഗാനാശ്രമത്തിന്റെ ശിലാസ്ഥാപന ചടങ്ങിൽ പങ്കെടുക്കുകയും ചെയ്യും. ഒന്നരയോടെ നെടുമ്പാശ്ശേരി വിമാനത്താവളത്തിൽ നിന്ന് മടങ്ങിപ്പോകുന്നതാണ്.
അതേസമയം ഉപരാഷ്ട്രപതിയുടെ സന്ദർശനത്തോടനുബന്ധിച്ച് കൊച്ചി നഗരത്തിൽ ഗതാഗതനിയന്ത്രണങ്ങൾ ഏർപ്പെടുത്തിയിട്ടുണ്ട്. ഇന്ന് വൈകുന്നേരം 5 മുതൽ 7 വരെയും ഞായറാഴ്ച രാവിലെ 8 മുതൽ 11 വരെയുമാണ് ഗതാഗതനിയന്ത്രണം ഏർപ്പെടുത്തിയിട്ടുള്ളത്.

വാത്തുരുത്തി ജങ്ഷൻ മുതൽ ഹൈക്കോടതി ജങ്ഷൻ വരെയുള്ള വില്ലിങ്ടൺ ഐലൻഡ്, നേവൽ ബേസ്, തേവര,എം.ജി. റോഡ്, ബാനർജി റോഡ്, പാർക്ക് അവന്യൂ റോഡ്, ഷണ്മുഖം റോഡ് ഭാഗങ്ങളിലാണ് ഗതാഗതനിയന്ത്രണവും ഡ്രോൺ നിയന്ത്രണവുമുള്ളത്.

ഫോർട്ട്‌കൊച്ചി, മട്ടാഞ്ചേരി ഭാഗത്തു നിന്ന് ഹൈക്കോടതി, കണ്ടെയ്‌നർ റോഡ്, ഇടപ്പള്ളി എന്നീ ഭാഗങ്ങളിലേക്ക് വരുന്ന വാഹനങ്ങൾ തോപ്പുംപടി ബി.ഒ.ടി. പാലം, അലക്‌സാണ്ടർ പറമ്പിത്തറ പാലം, കുണ്ടന്നൂർ ജങ്ഷൻ, വൈറ്റില, കടവന്ത്ര, കെ.കെ. റോഡ്, ഹൈക്കോടതി ജങ്ഷൻ, ബോൾഗാട്ടി ജങ്ഷൻ വഴി കണ്ടെയ്‌നർ ഭാഗത്തേക്ക് പോകേണ്ടതാണ്. അല്ലെങ്കിൽ ഫോർട്ട്‌കൊച്ചി വൈപ്പിൻ ജങ്കാർ സർവീസ് ഉപയോഗിക്കണം. വൈപ്പിൻ ഭാഗത്തുനിന്ന് ഫോർട്ട്‌കൊച്ചി, മട്ടാഞ്ചേരി ഭാഗത്തേക്ക് പോകേണ്ട വാഹനങ്ങൾ ഹൈക്കോടതി ജങ്ഷനിൽ നിന്ന് കലൂർ, കടവന്ത്ര, വൈറ്റില, കുണ്ടന്നൂർ വഴിപോകണം. അല്ലെങ്കിൽ ഫോർട്ട്‌കൊച്ചി വൈപ്പിൻ ജങ്കാർ ഉപയോഗിക്കുകയും വേണം.

തേവര ഫെറി ഭാഗത്തു നിന്ന് കലൂർ-ഇടപ്പള്ളി ഭാഗത്തേക്ക് വരുന്ന ചെറുവാഹനങ്ങൾ പണ്ഡിറ്റ് കറുപ്പൻ റോഡിലൂടെ മട്ടമ്മൽ ജങ്ഷൻ, പനമ്പിള്ളി നഗർ, കെ.കെ. റോഡ്, കലൂർ ജങ്ഷൻ വഴി പോകണം. വൈറ്റില ഭാഗത്തുനിന്നും ഇടപ്പള്ളി ഭാഗത്തു നിന്നും ഹൈക്കോടതി ഭാഗത്തേക്ക് വരുന്ന വാഹനങ്ങൾക്ക് വി.വി.ഐ.പി. യാത്ര നടക്കുന്ന സമയത്ത് ഹൈക്കോടതി ജം​ഗ്ഷൻ വരെ മാത്രമേ പോകാൻ കഴിയൂ. എം.ജി. റോഡിലൂടെയുള്ള വാഹനഗതാഗതം ഭാഗികമായി നിയന്ത്രിക്കുന്നതാണ്.