ഭാര്യയുമായി അവിഹിത ബന്ധമുണ്ടെന്ന സംശയത്തെത്തുടർന്ന് സുഹൃത്തായ ഓട്ടോറിക്ഷാ ഡ്രൈവറെ മർദ്ദിച്ച് കൊലപ്പെടുത്തി കുഴിച്ചുമൂടിയ കേസിൽ ഒന്നാം പ്രതിക്ക് ജീവപര്യന്തം തടവും 1,35,00 രൂപ പിഴയും. കല്ലിയൂർ പാലപ്പൂര് ചാനൽക്കര പൊറ്റവിള വീട്ടിൽ വിശ്വംഭരന്റെ മകൻ മുള്ളൻ രതീഷിനെയാണ് തിരുവനന്തപുരം ഏഴാം അഡീഷണൽ ജില്ലാ കോടതി ജഡ്ജി അനിറ്റ് ജോസഫ് ശിക്ഷിച്ചത്. വെട്ടുകാട് ബാലനഗർ തൈവിളാകം വീട്ടിൽ രംഗൻ നാടാരുടെ മകൻ രതീഷ് (32) ആണ് കൊല്ലപ്പെട്ടത്.

​കേസിനാസ്പദമായ സംഭവം

വെട്ടുകാടുള്ള ലഹരിവിമോചന കേന്ദ്രത്തിലെ ക്യാന്റീൻ നടത്തിപ്പുകാരന്റെ മകളെ അവിടെ ചികിത്സയ്ക്കെത്തിയ പ്രതി രതീഷ് പ്രണയിച്ച് വിവാഹം കഴിച്ചിരുന്നു. ഇവരുടെ കുടുംബവുമായി നേരത്തേ പരിചയമുണ്ടായിരുന്ന ഓട്ടോഡ്രൈവർ രതീഷ്, യുവതിയെ വിവാഹം കഴിക്കാൻ താൽപര്യപ്പെട്ടിരുന്ന വിവരം പ്രതി അറിഞ്ഞിരുന്നു. പിന്നീട് കുഞ്ഞിന്റെ ചോറൂണ് ചടങ്ങിനായി വെട്ടുകാട് പള്ളിയിലെത്തിയപ്പോൾ പ്രതിയും ഓട്ടോഡ്രൈവറും തമ്മിൽ പരിചയപ്പെടുകയും അടുത്ത സുഹൃത്തുക്കളാവുകയും ചെയ്തു.

​തുടർന്ന് ചാനൽക്കരയിലെ പ്രതിയുടെ വീട്ടിൽ രതീഷ് പതിവായി എത്തുകയും, അടുത്തുള്ള ഒഴിഞ്ഞ പുരയിടത്തിലിരുന്ന് പ്രതിയുടെ മറ്റ് സുഹൃത്തുക്കൾക്കൊപ്പം ഇവർ മദ്യപിക്കുകയും പതിവായിരുന്നു. എന്നാൽ തെങ്ങുകയറ്റത്തൊഴിലാളിയായ പ്രതി വീട്ടിലില്ലാത്ത സമയത്തും ഓട്ടോഡ്രൈവർ വീട്ടിൽ വരുന്നതിനെച്ചൊല്ലി പ്രതി ഭാര്യയെ സംശയിക്കുകയും ഉപദ്രവിക്കുകയും ചെയ്തിരുന്നു. ഇതോടെ ഭാര്യ കുട്ടികളുമായി സ്വന്തം വീട്ടിലേക്ക് മാറി.

​2016 ഓഗസ്റ്റ് 28-ന് മദ്യപിക്കാനായി ഓട്ടോഡ്രൈവർ രതീഷിനെ പ്രതി വീട്ടിലേക്ക് വിളിച്ചുവരുത്തി. തുടർന്ന് പ്രതിയും സുഹൃത്തുക്കളായ അന്യൻ ദിലീപ്, പട്ടാച്ചി കുട്ടപ്പൻ എന്നിവരും ചേർന്ന് മദ്യപിക്കുന്നതിനിടെ രതീഷുമായി വാക്കുതർക്കമുണ്ടായി. പ്രകോപിതരായ മൂവരും ചേർന്ന് സ്റ്റീൽ വളയും മറ്റും ഉപയോഗിച്ച് രതീഷിനെ ക്രൂരമായി മർദ്ദിച്ച് കൊലപ്പെടുത്തിയ ശേഷം മൃതദേഹം കാടുപിടിച്ചുകിടന്നിരുന്ന പുരയിടത്തിൽ കുഴിച്ചിടുകയായിരുന്നു.

​തുമ്പായത് ഓട്ടോറിക്ഷ

കൊലപാതകത്തിന് ശേഷം രാത്രിയിൽ പ്രതികൾ രതീഷിന്റെ ഓട്ടോറിക്ഷ അടിച്ചും വെട്ടിയും നശിപ്പിക്കുന്നത് നാട്ടുകാരിൽ ചിലർ കണ്ടിരുന്നു. പിന്നീട് തെളിവ് നശിപ്പിക്കുന്നതിനായി പ്രതികൾ ഓട്ടോറിക്ഷ പൂങ്കുളത്തുള്ള ഒരു വർക്ക്‌ഷോപ്പിൽ ഉപേക്ഷിച്ചു.

​രതീഷിനെ കാണാനില്ലെന്ന ബന്ധുക്കളുടെ പരാതിയിൽ വലിയതുറ പോലീസ് അന്വേഷണം ആരംഭിച്ചു. രണ്ട് മാസത്തിന് ശേഷം കേടുവരുത്തിയ നിലയിൽ ഓട്ടോറിക്ഷ കണ്ടെത്തിയതാണ് കേസിൽ നിർണായകമായത്. തുടർന്ന് നടത്തിയ വിശദമായ അന്വേഷണത്തിൽ പുരയിടത്തിൽ കുഴിച്ചിട്ട നിലയിൽ രതീഷിന്റെ ജീർണിച്ച മൃതദേഹം കണ്ടെത്തുകയായിരുന്നു. പൂന്തുറ സി.ഐ ആയിരുന്ന കെ.ബി. മനോജ് കുമാറാണ് കേസ് അന്വേഷിച്ച് കുറ്റപത്രം സമർപ്പിച്ചത്.

​കേസിലെ രണ്ടും മൂന്നും പ്രതികളായ അന്യൻ ദിലീപ്, പട്ടാച്ചി കുട്ടപ്പൻ എന്നിവർ വിചാരണയ്ക്ക് മുൻപേ ഒളിവിൽ പോയി. കേസിൽ പ്രോസിക്യൂഷൻ ഭാഗത്തുനിന്ന് 22 സാക്ഷികളെ വിസ്തരിക്കുകയും 44 രേഖകളും 7 തൊണ്ടിമുതലുകളും കോടതിയിൽ ഹാജരാക്കുകയും ചെയ്തു. പ്രോസിക്യൂഷന് വേണ്ടി പബ്ലിക് പ്രോസിക്യൂട്ടർ കെ. വേണി ഹാജരായി.