ഒളിവിലായ ചിദംബരം തിരികെയെത്തി; എഐസിസി ആസ്ഥാനത്ത് നാടകീയമായി രംഗത്തെത്തി പത്രസമ്മേളനം; തുടര്‍ന്ന് വസതിയിലെത്തിയപ്പോള്‍ പ്രകോപനവുമായി പ്രവര്‍ത്തകര്‍; വീടിന്റെ മതില്‍ ചാടിക്കടന്ന് അകത്ത് കയറിയ സിബിഐ ചിദംബരത്തെ അറസ്റ്റ് ചെയ്തു
ഐഎന്‍എക്‌സ് മീഡിയ അഴിമതിക്കേസില്‍ സിബിഐ ലുക്കൗട്ട് നോട്ടീസ് പുറപ്പെടുവിച്ച മുന്‍ കേന്ദ്രമന്ത്രി പി. ചിദംബരത്തെ സിബിഐ അറസ്റ്റ് ചെയ്തു. കാണാതായ ചിദംബരം എഐസിസി ആസ്ഥാനത്താണ് മടങ്ങിയെത്തിയത്. കപില്‍ സിബലിന്റെ വാഹനത്തില്‍ എഐസിസി ആസ്ഥാനത്തെത്തിയ ചിദംബരം നേതാക്കള്‍ക്കൊപ്പം വാര്‍ത്താ സമ്മേളനം നടത്തി. എന്നാല്‍, വാര്‍ത്താ സമ്മേളനത്തിനു പിന്നാലെ അദ്ദേഹം പാര്‍ട്ടി ആസ്ഥാനത്തു നിന്ന് മടങ്ങി വസതിയിലെത്തി. പിന്നാലെയെത്തിയ സിബിഐ സംഘത്തിന് അകത്ത് കയറാനായില്ല. ഗേറ്റ് പൂട്ടി പ്രവര്‍ത്തകര്‍ കാവല്‍ നിന്നു. എന്നാല്‍ സിബിഐ സംഘം മതില്‍ ചാടിക്കടന്ന് ചിദംബരത്തെ ചോദ്യം ചെയ്തു. പിന്നീട് കൂടുതല്‍ സിബിഐ ഉദ്യോഗസ്ഥര്‍ എത്തിയാണ് അറസ്റ്റ് ചെയ്ത് സിബിഐ ആസ്ഥാനത്തേക്ക് മാറ്റിയത്.
ഐഎന്‍എക്‌സ് മീഡിയ അഴിമതിക്കേസുമായി ബന്ധപ്പെട്ട് ഡല്‍ഹി ഹൈക്കോടതി മുന്‍കൂര്‍ജാമ്യാപേക്ഷ തള്ളിയതിനെ തുടര്‍ന്ന് ചൊവ്വാഴ്ച അര്‍ധരാത്രിയടക്കം മൂന്നുതവണ ചിദംബരത്തിന്റെ വസതിയില്‍ സിബിഐ സംഘമെത്തിയിരുന്നു. പക്ഷേ, അദ്ദേഹത്തെ കണ്ടെത്താനായിരുന്നില്ല. ഇതിനു പിന്നാലെയാണ് ചിദംബരത്തിനെതിരെ സിബിഐ ലുക്ക് ഔട്ട് നോട്ടീസ് പുറപ്പെടുവിച്ചിരുന്നത്.
അതിനിടെ, ചിദംബരത്തിന്റെ മുന്‍കൂര്‍ ജാമ്യാപേക്ഷ വെള്ളിയാഴ്ച പരിഗണിച്ചേക്കുമെന്നും സൂചനകള്‍ വന്നിരുന്നു. ഹര്‍ജിയില്‍ പിഴവുള്ളതിനാല്‍ ജാമ്യാപേക്ഷ പരിഗണിക്കുന്നത് ഇന്ന് ലിസ്റ്റ് ചെയ്തിരുന്നില്ല. വെള്ളിയാഴ്ചത്തേയ്ക്ക് ഹര്‍ജി ലിസ്റ്റ് ചെയ്തതായാണ് സുപ്രീംകോടതി രജിസ്ട്രാര്‍ അറിയിച്ചത്.
ബുധനാഴ്ച സുപ്രീം കോടതിയില്‍ രണ്ട് തവണ ഹര്‍ജികള്‍ ജസ്റ്റീസ് എന്‍.വി. രമണയുടെ ബെഞ്ചില്‍ കേസ് പരാമര്‍ശിക്കാന്‍ അഭിഭാഷകന്‍ ശ്രമിച്ചെങ്കിലും ഹര്‍ജിയില്‍ പിഴവുകളുണ്ടെന്ന് ചൂണ്ടിക്കാട്ടിയും തീരുമാനം ചീഫ് ജസ്റ്റീസിന്റേതാണെന്ന് ചൂണ്ടിക്കാട്ടിയും ഹര്‍ജി ബെഞ്ച് പരിഗണിച്ചിരുന്നില്ല. ഇതിനു പിന്നാലെയാണ് ഹര്‍ജി വെള്ളിയാഴ്ചത്തേക്ക് ലിസ്റ്റ് ചെയ്തതായി അറിയിച്ചത്.
https://www.facebook.com/Malayalivartha
